កីឡា

កប់ហ្មង់! សប្តាហ៍មុន ONE ផ្តល់ប្រាក់រង្វាន់១៥ម៉ឺនដុល្លារដល់កីឡាករ៣នាក់វ៉ៃល្អ

បានផុស

៥ ខែ មុន

នៅ

ថ្ងៃពុធ ១៩ មករា ២០២២

ដោយ

ស្ថាប័នប្រដាល់ ONE Championship បានផ្តល់រង្វាន់ជាប្រាក់លើកទឹកចិត្ត៣រង្វាន់ដែល១រង្វាន់មានចំនួន៥ម៉ឺនដុល្លារ សរុប១៥ម៉ឺនដុល្លារអាមេរិកអត្តពលិកដែលប្រកួតបានល្អនៅព្រឹត្តិការណ៍ ONE: HEAVY HITTERS កាលពីថ្ងៃសុក្រ ទី១៤ ខែមករា ដែលជាកម្មវិធីប្រកួតទី១បើកឆាកឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយពេលព្រឹត្តិការណ៍ដ៏អស្ចារ្យប្រចាំរាត្រី និងមានគូប្រកួតទាក់ទាញជាច្រើន ប៉ុន្តែបានវាយតម្លៃថា កីឡាករ កីឡាការិនី៣នាក់ដែលប្រកួតល្អឥតខ្ចោះ និងទាក់ចិត្តអ្នកគាំទ្រខ្លាំងជាងដែលត្រូវបានជ្រើសរើសផ្តល់ប្រាក់រង្វាន់លើកទឹកចិត្ត។

ជើងខ្លាំងទាំង៣នាក់ដែលអគ្គនាយក និងជានាយកប្រតិបត្តិ ONE លោក Chatri Sityodtong ជ្រើសរើសគឺអ្នកលេងគុនចម្រុះរុស្ស៊ី Saygid Izagakhmaev, តារាឆ្នើមជប៉ុន Senzo Ikeda និងកីឡាការិនីបេឡារុស្ស Ekaterina “Barbie” Vandaryeva ទទួលបានប្រាក់រង្វាន់ម្នាក់ៗ៥ម៉ឺនដុល្លារអាមេរិកដូចគ្នា។

អ្នកគាំទ្រប្រហែលជាដឹងថា កីឡាករ Izagakhmaev ដែលហ្វឹកហាត់ជាមួយកំពូលអ្នកលេងគុនចម្រុះ Khabib Nurmagomedov បានប្រើជំនាញឃ្លេឥតខ្ចោះដើម្បីបញ្ឈប់អតីតអ្នកដណ្តើមខ្សែក្រវាត់ពិភពលោក James Nakashima ឲ្យបោះបង់ចោលការប្រកួតក្នុងទឹកទី២សម្រាប់ការប្រកួតលើកដំបូងនៅសង្វៀន ONE។

ចំណែកអ្នកលេងគុនចម្រុះជប៉ុន Ikeda បានបញ្ចេញសមត្ថភាពដ៏អស្ចារ្យក្នុងការប្រើកណ្តាប់ដៃវ៉ៃពីចម្ងាយរហូតផ្តួលកីឡាករ Elipitua “The Magician” Siregar ឲ្យសន្លប់។

ចុងក្រោយកីឡាការិនីបេឡារុស្ស Vandaryeva ទទួលបានការចាប់អារម្មណ៍យ៉ាងខ្លាំងពីអ្នកគាំទ្រនៅពេលនាងប្រើកណ្តាប់ដៃឆ្វេង-ស្តាំដូចម៉ាស៊ីនដេរសន្ធាប់លើកីឡាការិនីវ័យក្មេងថៃ Supergirl ប៉ុន្តែត្រូវបានចៅក្រមកាត់សេចក្តីឲ្យនាងចាញ់ពិន្ទុមិនឯកច្ឆន្ទ។ យ៉ាងណា ការប្រកួតដ៏អស្ចារ្យរបស់នាងត្រូវបានមេរបស់ស្ថាប័នជ្រើសរើសជាអ្នកទទួលបានប្រាក់រង្វាន់៥ម៉ឺនដុល្លារអាមេរិក។

សូមបញ្ជាក់ថា កាលពីដើមខែមករានេះ ស្ថាប័នប្រដាល់ ONE Championship បានប្រកាសពីការផ្តល់ប្រាក់រង្វាន់លើកទឹកចិត្តដល់អត្តពលិកបង្ហាញសមត្ថភាពល្អឥតខ្ចោះនៅលើសង្វៀនរាល់ព្រឹត្តិការណ៍ប្រកួត។

រង្វាន់ក្នុងមួយព្រឹត្តិការណ៍ហោចណាស់មាន១ និងច្រើនបំផុតរហូតដល់៥រង្វាន់ ហើយអ្នកចាញ់ក៏អាចទទួលបានរង្វាន់ដែរឲ្យតែប្រកួតជក់ចិត្ត៕