កីឡា

វង្ស វិឆ័យ ប៉ះជើងខ្លាំងជាម្ចាស់ខ្សែក្រវាត់មកពីថៃព្រឹកថ្ងៃសៅរ៍

បានផុស

២ សប្តាហ៍ មុន

នៅ

ថ្ងៃព្រហស្បតិ៍ ៣០ មិថុនា ២០២២

ដោយ

អ្នកប្រដាល់គុនខ្មែរទម្ងន់ធ្ងន់ វង្ស វិឆ័យ វិលមកកាន់សង្វៀនទៀតហើយ បន្ទាប់ពីបានផ្តួលកីឡាករថៃ កងកាន់វ៉ាន វ៉ស៊ូងនើន ក្នុងទឹកទី៤កាលពីថ្ងៃទី២៦ ខែមិថុនា ឆ្នាំ២០២២នៅសង្វៀនបាយ័ន។

ការវិលមកសង្វៀនលើកនេះ វង្ស វិឆ័យ ជួបជើងខ្លាំងម្នាក់ទៀតគឺកីឡាករ ស៊ីរិស័ក្តិ ក.កេសនុន (Sirisak kor.kesanun) ទម្ងន់៧១គីឡូក្រាម ក្នុងតំណែងគូឯកកម្មវិធី «Missile ថាមពលអ្នកប្រយុទ្ធគុនខ្មែរ» វេលាម៉ោង៨ព្រឹក ថ្ងៃសៅរ៍ ទី២ ខែកក្កដា ឆ្នាំ២០២២នៅសង្វៀន BTV។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមពិតទៅ វង្ស វិឆ័យ បានបាត់មុខពីសង្វៀនជាច្រើនខែហើយនៅក្នុងអន្តរកាលកូវីដ-១៩ដែលបានបើកការប្រកួតប្រដាល់ឡើងវិញកាលពីចុងឆ្នាំ២០២១កន្លងទៅ។ ការវិលត្រឡប់មកសង្វៀនជាថ្មី កីឡាកររូបនេះបានផ្តួលកីឡាករថៃ កងកាន់វ៉ាន ឲ្យសន្លប់ក្នុងទឹកទី៤។

វង្ស វិច័យ ជាអ្នកប្រដាល់មួយរូបដែលកីឡាករប្រដាល់ខ្មែរដូចគ្នាពិបាកយកឈ្នះណាស់។ ដៃគូគុនខ្មែររបស់គេសុទ្ធតែជើងខ្លាំងដូចជា ធឿន ធារ៉ា, ឈឿង ល្វៃ, ថៃ រិទ្ធី និង ឡុង សុភី ជាដើម ប៉ុន្តែឥឡូវនេះជាពេលដែលប្រកួតជាមួយកីឡាករបរទេស។

វង្ស វិឆ័យ មានកាយសម្បទាល្អ និងអាវុធចេញចម្រុះ។ រូបគេអាចប្រើកណ្តាប់ដៃបានល្អ ទាត់ក៏មានទម្ងន់ ហើយក៏អាចឡើងជង្គង់បានល្អថែមទៀត។ ជាមួយគ្នានេះ រូបគេក៏អាចប្រើកែងបានដែរ ដូច្នេះអាចនិយាយបានថា អាវុធសំខាន់ទាំង៤គឺកណ្តាប់ដៃ ទាត់ ជង្គង់ និងកែង រូបគេចេញបានល្អទាំងព្រម។

ចំណែកកីឡាករថៃ Sirisak មានបទពិសោធច្រើនក្នុងការឡើងសង្វៀនទាំងក្នុងប្រទេស និងក្រៅប្រទេស។ កីឡាករថៃរូបនេះធ្លាប់ឈ្នះខ្សែក្រវាត់ជាច្រើនគ្រឿង និងប្រវត្តិប្រកួតជាង១០០ដង។ រូបគេពូកែចូលចាប់អោប ឡើងជង្គង់ និងវាយកែង។

ព្រឹកថ្ងៃសៅរ៍ជាមួយគ្នានេះ អ្នកលេងគុនខ្មែរ ពេជ្រ កក្កដា ក៏ប្រកួតមិត្តភាពអន្តរជាតិជាមួយកីឡាករថៃ គី Khing Petch ផងដែរ៕