កីឡា

ចំណុចខ្លះៗដែល ពេជ្រ សម្បត្តិ ស័ក្តិសមឈ្នះ ផាត់ថាណា យប់មិញ

បានផុស

១ year មុន

នៅ

ថ្ងៃចន្ទ ២៤ តុលា ២០២២

ដោយ

អ្នកប្រដាល់គុនខ្មែរ ពេជ្រ សម្បត្តិ ត្រូវបានចៅក្រមផ្តល់ពិន្ទុឲ្យឈ្នះកីឡាករថៃ ផាត់ថាណា ដើម្បីក្លាយជាជើងឯកខារ៉ាប៉ាវ រដូវកាលទី៨ ឆ្នាំ២០២២ អមដោយប្រាក់រង្វាន់៦ពាន់ដុល្លារអាមេរិកកាលពីយប់មិញនៅសង្វៀនបាយ័នស្ទឹងមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកទស្សនាមួយចំនួនអាចនឹងគិតថា ពេជ្រ សម្បត្តិ មិនសមឈ្នះ ផាត់ថាណាទេ បន្ទាប់ពីតស៊ូគ្នា៥ទឹកពេញដែលទទួលបានការគាំទ្រខ្លាំងពីអ្នកទស្សនាផ្ទាល់រាប់ពាន់នាក់ និងតាមកញ្ចក់ទូរទស្សន៍រាប់សិបម៉ឺននាក់។

សូមលើកយកចំណុចប្រៀបធៀបគ្នាមួយចំនួនដែលបង្ហាញពីការពិតនៅលើសង្វៀនទាំង៥ទឹក។

កណ្តាប់ដៃ៖ ពេជ្រ សម្បត្តិ វាយចេញកណ្តាប់ដៃបានច្រើនចាប់ពីទឹកទី១ដល់ទឹកទី៥ ហើយក៏ចំគោលដៅបានច្រើនដែរ។ ទឹកទី១ ផាត់ថាណា មានប្រៀប ប៉ុន្តែទឹកនេះ ពេជ្រ សម្បត្តិ ក៏វ៉ៃចូលកណ្តាប់ដៃពេញៗពីរបីដៃដែរ។ ទឹកទី២ ពេជ្រ សម្បត្តិ មានប្រៀបវិញតាមកណ្តាប់ដៃវ៉ៃចំគោលដៅបានច្រើន ស្របពេល ផាត់ថាណា ចេញកណ្តាប់ដៃបានមួយៗ។ ទឹកទី៣ ផាត់ថាណា ហាក់ធ្វើបានល្អវិញដោយបានប្តូរកណ្តាប់ដៃចំគោលដៅបានច្រើន។ ៣ទឹកដំបូង កីឡាករថៃអាចនឹងគិតថា ខ្លួនមានប្រៀប ដូច្នេះនៅទឹកទី៤ និងទី៥ រូបគេភាគច្រើនរង់ចាំ និងធាក់ទល់លើពោះរបស់ ពេជ្រ សម្បត្តិ ដែលព្យាយាមសម្រុកចូលវ៉ៃកណ្តាប់ដៃ។ ទឹកទី៤ និងទី៥ កីឡាករកម្ពុជាប្រើកណ្តាប់ដៃវ៉ៃចូលបានល្អដែលធ្វើឲ្យរូបគេទទួលបានពិន្ទុច្រើនជាងក្នុងពីរទឹកចុងក្រោយ។
ទាត់៖ ផាត់ថាណា ទាត់បានច្រើនចាប់ពីទឹកទី១ដល់ទឹកទី៣ ប៉ុន្តែទឹកទី៤ និងទី៥ រូបគេមិនសូវទាត់បានច្រើនទេ។ ផ្ទុយទៅវិញ រូបគេប្រើជើងធាក់លើពោះរបស់ ពេជ្រ សម្បត្តិ ដើម្បីទប់ស្កាត់ភាគច្រើន ដូច្នេះការធាក់ទប់ស្កាត់នេះពេលខ្លះមិនត្រូវបានចៅក្រមផ្តល់ពិន្ទុទេ។ ទោះជាយ៉ាងណា ពេជ្រ សម្បត្តិ ក៏ទាត់បានច្រើនដែរ ថ្វីបើរូបគេកម្ពស់ទាបជាង។
ជង្គង់៖ ផាត់ថាណា ប្រើជង្គង់បានច្រើនជាង ពេជ្រ សម្បត្តិ មែន ប៉ុន្តែជាក់ស្តែងមិនចូលគោលដៅពេញៗទេ។ រាល់ពេលខ្លួនជាប់គ្នា ពេជ្រ សម្បត្តិ តែងតែអោបខ្លួនរបស់ ផាត់ថាណា ជាប់រហូត ដូច្នេះកីឡាករថៃមិនបានចេញជង្គង់ស្រួលៗនោះទេ។ ជង្គង់ដែលកីឡាករថៃចេញបានល្អគឺពីចម្ងាយ។ ជាមួយគ្នានេះ កីឡាករកម្ពុជាក៏អាចឡើងជង្គង់បានខ្លះៗដែរ។
កែង៖ ពេជ្រ សម្បត្តិ ប្រើកែងរូសពេលអោប ខណៈ ផាត់ថាណា ប្រើកែងពីចម្ងាយ។ យ៉ាងណា ការប្រកួតនេះមិនសូវប្រើកែងច្រើនគួរឲ្យកត់សំគាល់ទេ។
ស្មារតីប្រយុទ្ធ៖ ពេជ្រ សម្បត្តិ អង់អាចក្នុងការដើរចូលវ៉ៃ ស្របពេល ផាត់ថាណា ប្រើក្បាច់ទប់ការពារ វាយបក។ ចាប់ពីទឹកទី១រហូតដល់ទឹកទី៥ សម្បត្តិ ដើរចូលវ៉ៃរហូត។ បើក្នុងករណីពិន្ទុប្រហាក់ប្រហែលគ្នា ប៉ុន្តែ សម្បត្តិ មានស្មារតីប្រយុទ្ធល្អជាង ដូច្នេះអាចនិយាយបានថា សម្បត្តិ ស័ក្តិសមទទួលបានជ័យជម្នះច្រើនជាង។