Cristiano Ronaldo Jnr កូនប្រុសរបស់ RC7 បានធ្វើការយ៉ាងលំបាកចាប់តាំងពីការចេញដំណើរទៅកាន់ប្រទេសអារ៉ាប៊ីសាអូឌីតជាមួយឪពុករបស់គេ ហើយកំពុងហ្វឹកហាត់ជាមួយក្មេងៗក្នុងក្រុមថ្នាលដែលចាស់ជាងខ្លួន២ឆ្នាំនៅតំបន់មជ្ឈិមបូព៌ាមួយនេះ។

យុវជនកីឡាករ Cristiano Jnr បានធ្វើឱ្យមានការចាប់អារម្មណ៍យ៉ាងខ្លាំងនៅក្នុងប្រទេសអារ៉ាប៊ីសាអូឌីត ហើយត្រូវបានគេរាយការណ៍ថា កំពុងហ្វឹកហាត់ជាមួយកីឡាករដែលមានអាយុច្រើនជាងគាត់២ឆ្នាំ។ Ronaldo វ័យ៣៧ឆ្នាំបានចុះហត្ថលេខាលើកិច្ចព្រមព្រៀងរយៈពេល ២ឆ្នាំកន្លះជាមួយ Al-Nassr នៅថ្ងៃចូលឆ្នាំសកល។

បន្ទាប់ពីការរង់ចាំអស់ជាច្រើនសប្តាហ៍ ទីបំផុតកំពូលតារាថ្មីរបស់ Al-Nassr បានបង្ហាញខ្លួនឱ្យ Saudi Pro League កាលពីថ្ងៃអាទិត្យយប់មិញក្នុងជ័យជម្នះ ១-០ របស់ Al-Nassr លើ Ettifaq ប៉ុន្តែកូនប្រុសច្បងរបស់ខ្សែប្រយុទ្ធព័រទុយហ្គាល់រូបនេះបានប្រឹងប្រែងធ្វើការចាប់តាំងពីបានចូលរួមជាមួយឪពុករបស់គេនៅអារ៉ាប៊ីសាអូឌីត។

Cristiano Jnr ធ្លាប់លេងនៅថ្នាលយុវជនរបស់ក្លិប Manchester United ខណៈពេលដែលឪពុករបស់គេនៅក្លិបនោះ ប៉ុន្តែក្មេងអាយុ ១២ឆ្នាំពេលនេះកំពុងហ្វឹកហាត់នៅប្រទេសអារ៉ាប៊ីសាអូឌីត នេះបើយោងតាមរបាយការណ៍ថ្មីមួយពី The Sun ។

របាយការណ៍គូសបញ្ជាក់ថា Cristiano Jnr កំពុងហ្វឹកហាត់នៅក្រុមថ្នាល Mahd Academy ដែលជាមជ្ឈ មណ្ឌលកីឡាជាតិក្នុងប្រទេសអារ៉ាប៊ីសាអូឌីត។ កីឡាករវ័យក្មេងដែលអាចត្រូវបានគេរាយការណ៍ថាបានត្រលប់ទៅ Real Madrid ដើម្បីភ្ជាប់ជាមួយសាលារបស់ពួកគេនោះ ត្រូវបានគេនិយាយថាកំពុងហ្វឹកហាត់ក្នុងក្រុមអាយុលើសខ្លួនពី ២ឆ្នាំរួចទៅហើយ៕

ប្រភព៖ mirror.co.uk

អត្ថបទ៖ មន្នីរ័ត្ន