កីឡា

អ្នកជំនាញពន្យល់«មន្តគាថា»លើខ្សែក្រវាត់របស់ ព្រំ សំណាង ឈ្នះយប់មិញ

បានផុស

១ ខែ មុន

នៅ

ថ្ងៃចន្ទ ៦ កុម្ភៈ ២០២៣

ដោយ

កីឡាករប្រដាល់គុនខ្មែរ ព្រំ សំណាង បានផ្តួលកីឡាករអង់គ្លេស Thomas Carpenter ដើម្បីទទួលបានខ្សែក្រវាត់មួយគ្រឿងនៅកម្មវិធីប្រដាល់ Thai Fight នៅប្រទេសថៃកាលពីថ្ងៃអាទិត្យ ទី៥ ខែកុម្ភៈ ឆ្នាំ២០២៣នេះ។

ជ័យជម្នះរបស់ ព្រំ សំណាង ទទួលបានស្វាគមន៍ និងសាទរយ៉ាងខ្លាំងពីអ្នកគាំទ្រ និងប្រជាពលរដ្ឋខ្មែរ ហើយក៏ទទួលបានប្រាក់ឧបត្ថម្ភលើកទឹកចិត្តដ៏ច្រើនសន្ធឹកសន្ធាប់ពីមហាជន។

ជាមួយគ្នានេះ នៅលើខ្សែក្រវាត់ក៏ទទួលបានការចាប់អារម្មណ៍ពីមហាជនពាក់ព័ន្ធនឹងភាសាបាលីដែលជាមន្តគាថាចារជាអក្សរខ្មែរ។ មន្តគាថាត្រូវបានចារនៅផ្នែកកណ្តាល ខាងឆ្វេង និងខាងស្តាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពុទ្ធសាសនាដើម្បីការអប់រំនៃកម្ពុជា ដែលមានព្រះតេជគុណ ហាក់ សៀងហៃ បានសរសើរនៅលើផេក Facebook ថា
–នមោ ពុទ្ធាយ ៖ សូមនមស្ការថ្វាយបង្គំចំពោះព្រះសម្មាសម្ពុទ្ធ
–ឧ អា ក ស៖

ឧ គឺ ឧដ្ឋានសម្បទាៈ ដល់ព្រមដោយការប្រឹងប្រែង
អា គឺ អារក្ខសម្បទាៈ ដល់ព្រមដោយការថែរក្សា
ក គឺ កល្យាណមិត្តតាៈ មានមិត្តល្អ
ស គឺ សមជីវិតាៈ ចិញ្ចឹមជីវិតដោយស្មើ (ចេះចាយវាយ ទុកដាក់)

គិតជាវិជ្ជមាន៖
អក្សរសាស្រ្ត វប្បធម៌យើង មានឥទ្ធិពលផ្សព្វផ្សាយជ្រួតជ្រាបដល់ប្រទេសជិតខាងយកទៅប្រើប្រាស់ ដូចនេះ បើបានផ្សព្វផ្សាយទៅកាន់ពិភពលោកទៀត កាន់តែល្អប្រពៃ។

ជាមួយគ្នាបុរសឈ្មោះ ប្រាក់ ចាន់រ៉េត សរសេរលើគណនី Facebook របស់លោក និងត្រូវបានព្រះតេជគុណ ហាក់ សៀងហៃ បានពន្យល់ខ្លឹមសារលំអិតថា
១-ផ្នែករង្វង់កណ្តាល ដែលមានរូបព្រះសង្ឃនៅកណ្តាល
–នជាលីតិ (បណ្ដូលគាថាព្រះសិម្ពលី ប្រើដើម្បីឱ្យសម្បូរលាភដូចព្រះសិម្ពលី)
–នមោពុទ្ធាយ (គាថានមស្សការចំពោះព្រះពុទ្ធ)
-ឧអកស (គាថាសម្រាប់ស្វែងរកប្រយោជន៍បច្ចុប្បន្ន)

-ឧ : ឧដ្ឋានសម្បទា (ប្រឹងប្រែងរកទ្រព្យ)
-អ : អារក្ខសម្បទា (ថែរក្សាទ្រព្យដែលរកបានឱ្យគង់)
-ក : កល្យាណមិត្តតា (សេពគប់តែមិត្តល្អ)
-ស : សមជីវិតា (ចាយវាយសមរម្យ មិនខ្ជះខ្ជាយពេក មិនក្បិតក្បៀតពេក។

–មអឧ (គាថារំលឹកដល់ព្រះរតនត្រ័យ)

-ម : មហាសង្ឃ (ព្រះសង្ឃ)
-អ : អរហំ សម្មាសម្ពុទ្ធ (ព្រះពុទ្ធ)
-ឧ : ឧត្តមធម្ម (ព្រះធម៌)

២-ផ្នែកខាងឆ្វេងរង្វង់

–ពុទ្ធសំមិ (គាថាដល់នូវព្រះរតនត្រ័យជាទីពឹង)

-ពុ : ពុទ្ធំ
-ទ្ធ : ធម្មំ
-សំ : សង្ឃំ
-មិ : គច្ឆាមិ

*ពុទ្ធសំមិ=ពុទ្ធំ ធម្មំ សង្ឃំ (សរណំ) គច្ឆាមិ (ខ្ញុំសូមដល់នូវព្រះពុទ្ធ ព្រះធម៌ ព្រះសង្ឃ ជាទីពឹងទីរលឹក).

៣-ផ្នែកខាងស្ដាំ

–នមពធ=នមោពុទ្ធាយ (គាថានមស្សការព្រះពុទ្ធ)

លោកពន្យល់ទៀតថា ការចារគាថា ជាអក្សរខ្មែរនៅលើខ្សែក្រវាត់ខាងលើ បានធ្វើឱ្យមនុស្សខ្មែរមួយចំនួនគិតថា ជារឿងមិនត្រឹមត្រូវ ដ្បិតវាជាអក្សរខ្មែរ មិនគួរថៃយកទៅប្រើទេ។ យើងគួរបើកចិត្តឱ្យចិត្តទូលាយ ហើយគូរតែមានមោទកភាពវិញទើបល្អជាង ព្រោះថៃដែលទទួលឥទ្ធិពលពីយើង បានរក្សាទំនៀមទម្លាប់បែបនេះបានល្អជាងយើង។ បើនៅស្រុកខ្មែរយើងវិញ ជំនឿលើអក្សរយ័ន្តអស់នេះ មិននៅសល់ច្រើនទេ បើធៀបនឹងថៃ ព្រោះតែអស់លោកអ្នកប្រាជ្ញពុទ្ធសាសនាលង្ការវង្សមួយចំនួន ដៀលត្មះថាជាតិរច្ឆានវិជ្ជា មិនឱ្យរៀនសូត្រ។ យើងមើលចុះ នៅស្រុកថៃសម្បូរអ្នកប្រាជ្ញខាងពុទ្ធសាសនាលង្ការវង្សច្រើនជាងយើងឆ្ងាយណាស់ តែអស់លោកអ្នកប្រាជ្ញទាំងនោះ មិនទោមនស្សអីខ្លាំង នឹងទំនៀមទម្លាប់ពុទ្ធសាសនាដើម ដូចស្រុកយើងទេ។ ទំនៀមទម្លាប់បុរាណ បើមិនប៉ះពាល់ប្រយោជន៍ប្រជាជនទេ យើងគួរតែរក្សាទុក។ បើយើងមិនថែរក្សាទេ ពេលមានគេយកទៅថែរក្សាជំនួសយើងហើយ យើងកុំទៅទារពីគេអី ព្រោះយើងមិនស្រឡាញ់ផង៕