កីឡា

តើភ្លើងគប់ត្រូវពន្លត់ឬយ៉ាងណាពេលឡើងយន្តហោះ?

បានផុស

១ year មុន

នៅ

ថ្ងៃព្រហស្បតិ៍ ២៣ មីនា ២០២៣

ដោយ

ព្រះអគ្គិជ័យកីឡា និងភ្លើងគប់សម្រាប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ត្រូវបានដង្ហែទៅដល់ប្រទេសវៀតណាមហើយកាលពីល្ងាចមិញ បន្ទាប់ពីត្រូវបានដង្ហែឡើងយន្តហោះនៅអាកាសយានដ្ឋានអន្តរជាតិក្នុងខេត្តសៀមរាប កាលពីរសៀលថ្ងៃទី២២ ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីព្រះមហាក្សត្រប្រោសប្រទានព្រះអគ្គិឲ្យឆេះភ្លើងគប់រួចកាលពីព្រឹកថ្ងៃអង្គារ៍ ទី២១ ខែមីនាមកត្រូវតែរក្សាឲ្យឆេះរហូតពោលគឺមិនត្រូវឲ្យរលត់ឡើយ ប៉ុន្តែនៅពេលដង្ហែទៅកាន់ប្រទេសផ្សេង និងត្រូវដាក់តាមយន្តហោះ តើភ្លើងគប់ដែលកំពុងឆេះត្រូវពន្លត់ ឬយ៉ាងណា?

តាមការផ្សាយផ្ទាល់លើផេករបស់វត្តរាជបូណ៌ បន្ទាប់ពីពិធីបុណ្យអភិសេកព្រះអគ្គិជ័យកីឡារួចរាល់ តំណាងគណៈកម្មការរៀបចំ និងជាអ្នកថែរក្សាព្រះអគ្គិជ័យកីឡាបានពន្យល់ថា សម្រាប់ការដង្ហែទៅកាន់អាកាសយានដ្ឋានខេត្តសៀមរាប និងយកដាក់លើយន្តហោះគឺមិនអាចយកភ្លើងគប់ទាំងមូលទៅដាក់បានទេ ពីព្រោះខ្លាចមានគ្រោះថ្នាក់ជាយថាហេតុណាមួយកើតឡើងនៅលើយន្តហោះ។

«នេះជាយប់ទី១ហើយដែលត្រូវតម្កល់ទុកក្នុងវត្តរាជបូណ៌នេះ។ ថ្ងៃស្អែកនឹងត្រូវដង្ហែយកទៅកាន់ប្រទេសផ្សេងៗទៀតក្នុងតំបន់អាស៊ាន។ យើងត្រូវចម្លងជាចង្កៀងព្រះអគ្គិជ័យកីឡាដើម្បីយកទៅដាក់ក្នុងយន្តហោះ។ យើងអត់អាចដាក់ភ្លើងគប់ទាំងមូលបានទេ គឺខ្លាចឆាប់ឆេះ តែយើងមានចម្លងចង្កៀព្រះអគ្គិរបស់យើង។ ខាងយន្តហោះគេមានរៀបគ្រប់គ្រង និងមានប្រអប់សម្រាប់ការពារ ហើយក៏មានចង្កៀងចម្លងច្រើនទៀត។ ក្នុងនោះក៏បានចម្លងយកចង្កៀងមួយទៅទុកភ្នំពេញដែរ។ បន្ទាប់ពីរត់ដង្ហែក្នុងប្រទេសវៀតណាម ពេលយប់ចង្កៀងអគ្គិជ័យកីឡានឹងរក្សាទុកនៅស្ថានទូតខ្មែរប្រចាំនៅប្រទេសវៀតណាម»។

បន្ទាប់មក ព្រះអគ្គិជ័យកីឡា និងភ្លើងគប់ នឹងត្រូវដង្ហែទៅកាន់ប្រទេសហ្វីលីពីន ឥណ្ឌូណេស៊ី ទីម័រខាងកើត ម៉ាឡេស៊ី សិង្ហបុរី ថៃ មីយ៉ាន់ម៉ា និងចុងក្រោយប្រទេសឡាវ មុនពេលចូលមកកម្ពុជាវិញតាមខេត្តស្ទឹងត្រែង រួចបន្តឆ្លងកាត់ខេត្តក្រចេះ ត្បូងឃ្មុំ កំពង់ចាម និងខេត្តជាច្រើនទៀតនៅក្នុងប្រទេសកម្ពុជា មុនពេលចូលរាជធានីភ្នំពេញនៅយប់ថ្ងៃទី២៨ ខែមេសា៕