ប្រធានក្លិប Barcelona បាននិយាយថា “ទ្វារតែងតែបើកចំហសម្រាប់ Lionel Messi”

ប្រធានក្លិប Barcelona លោក Joan Laporta បាននិយាយថា ទ្វារតែងតែបើកចំហរសម្រាប់ Lionel Messi ក្នុងការវិលត្រឡប់មកវិញនៅរដូវក្តៅ សម្រាប់អតីតកីឡាករឆ្នើមរបស់ពួកគេ។

វាកើតឡើងបន្ទាប់ពី Sergio Aguero បាននិយាយថាគេជឿថាមានឱកាស ៥០ភាគរយដែលអតីតមិត្តរួមក្រុម​អាហ្សង់ទីន​របស់ខ្លួននឹងចុះហត្ថលេខាឡើងវិញសម្រាប់អតីតក្លិបរបស់គេ។ ហើយ លោក Laporta បន្ទាប់មកបានសារភាពថាមានចំណាប់អារម្មណ៍ក្នុងការនាំយក Messi ត្រលប់ទៅ Nou Camp ប្រសិនបើកិច្ចព្រមព្រៀងអាចឈានមកដល់។

លោកបានប្រាប់ Marca ថា៖ «ខ្ញុំត្រូវតែរកវិធីដើម្បីកែលម្អទំនាក់ទំនងបច្ចុប្បន្នរបស់ Messi ជាមួយ Barca។ យើងនឹងចាំមើល ប៉ុន្តែគាត់ដឹងថាទ្វាររបស់ Barca តែងតែបើកចំហរសម្រាប់គាត់»។

«Messi គឺជាកីឡាករល្អបំផុតក្នុងប្រវត្តិសាស្ត្របាល់ទាត់។ គេគឺជាកីឡាករដ៏សំខាន់បំផុតក្នុងប្រវត្តិសាស្ត្ររបស់ Barca។ ប៉ុន្តែ ខ្ញុំត្រូវតែប្រយ័ត្ននឹងអ្វីដែលខ្ញុំនិយាយ ព្រោះគាត់ជាកីឡាកររបស់ PSG ហើយខ្ញុំត្រូវតែគោរព»។ លោក Joan Laporta បានសង្កត់ធ្ងន់។

Messi បានបញ្ចប់ទំនាក់ទំនងរយៈពេល ២១ឆ្នាំរបស់ខ្លួនជាមួយ Barcelona ក្នុងឆ្នាំ២០២១ ដោយផ្លាស់ទៅ Paris Saint-Germain ក្នុងកិច្ចសន្យារយៈពេល ២ឆ្នាំចំពេល Barca  មានការលំបាកផ្នែកហិរញ្ញវត្ថុ។

កិច្ចព្រមព្រៀងនោះនឹងបញ្ចប់នៅរដូវក្តៅនេះ (អំឡុងខែមិថុនា) ហើយមានជំនឿកាន់តែខ្លាំងឡើងថា Messi នឹងមិនបន្តស្នាក់នៅទីក្រុងប៉ារីសទៀតទេ មានន័យថាម្ចាស់ជើងឯក World Cup នឹងក្លាយជាកីឡាករ​ដែលគ្មានតម្លៃខ្លួននៅចុងរដូវកាលនេះ។

កីឡាករវ័យ ៣៥ឆ្នាំរូបនេះត្រូវបានគេនិយាយថាអាចនឹងការផ្លាស់ទៅលីគអាមេរិក (MLS) ជាមួយក្លិប Inter Miami របស់ David Beckham ក៏ដូចជាចូលរួមជាមួយ Cristiano Ronaldo ដោយការចុះហត្ថលេខាលើ​កិច្ចព្រមព្រៀង​ទៅលេងនៅប្រទេសអារ៉ាប៊ីសាអូឌីត។

ទោះបីជាយ៉ាងណាក៏ដោយ មិត្តជិតស្និទ្ធ Aguero បាននិយាយថា គេគិតថា Messi នឹងស្វែងរកការល្បួង​ឱ្យត្រលប់ទៅ Nou Camp ពិបាកនឹងទប់ទល់។ ថ្លែងទៅកាន់ TyC Sports អតីតខ្សែប្រយុទ្ធ Manchester City បាននិយាយថា៖ «ខ្ញុំគិតថា Leo Messi គួរតែចូលនិវត្តន៍នៅ Barca។ Barcelona គឺជាផ្ទះរបស់គាត់ ហើយគាត់គួរ​តែបញ្ចប់អាជីពរបស់គាត់នៅទីនោះ។ អារម្មណ៍របស់ខ្ញុំគឺថាមានឱកាស ៥០ភាគរយដែលគាត់នឹងត្រលប់មកវិញ»។

Laporta មិនបានលាក់បាំងពីបំណងប្រាថ្នារបស់ខ្លួនក្នុងការនាំយកវីរៈបុរសរបស់ក្លិបត្រឡប់​ទៅប្រទេសអេស្ប៉ាញវិញ​នោះទេ។

Messi រីករាយនឹងរដូវកាលទី២ ដ៏មានផ្លែផ្កានៅក្នុងរដ្ឋធានីរបស់ប្រទេសបារាំង ដោយស៊ុតបញ្ចូលទីបាន ១៨គ្រាប់ ក្នុង ៣១ប្រកួតសម្រាប់ក្រុមកំពូលតារាង Ligue 1 ខណៈដែលពួកគេខិតទៅជិតការឈ្នះពានរង្វាន់ម្ដងទៀត។

ទោះជាយ៉ាងណាក៏ដោយ Messi បានប្រឈមមុខនឹងការរិះគន់មួយចំនួនពីអ្នកគាំទ្រ បន្ទាប់ពីក្លិបបានបរាជ័យម្តងទៀត​ក្នុងការបង្វែរពីភាពខ្លាំងតែនៅក្នុងលីគរបស់ពួកគេ ទៅជាភាពជោគជ័យនៅក្របខ័ណ្ឌ Champions League។

ចំពោះ PSG នៅតែមានក្តីសង្ឃឹមក្នុងការបញ្ចុះបញ្ចូល Messi ឱ្យបន្តនៅក្លិបមួយរដូវកាលទៀត ហើយមានសញ្ញា​បន្ទាប់ពីការប្រកួត World Cup ថាកិច្ចព្រមព្រៀងជិតដល់ការត្រៀមរវាងក្លិប និងកីឡាករ។

ទោះជាយ៉ាងណាក៏ដោយ ឥឡូវនេះវាហាក់ដូចជាថាប្រធានក្រុមអាហ្សង់ទីននឹងផ្ទេរចេញនៅរដូវក្តៅនេះ ជាមួយនឹងរបាយការណ៍កាលពីសប្តាហ៍មុនដែលបញ្ជាក់ថាក្លិប Al-Hilai របស់អារ៉ាប៊ីសាអូឌីត បានត្រៀមខ្លួនរួចរាល់ហើយក្នុងការដាក់សំណើរជូន Messi នូវកិច្ចព្រមព្រៀង ១៧២លានផោន​ក្នុងមួយឆ្នាំសម្រាប់ថ្លៃពលកម្មរបស់គេ៕

ប្រភព៖ dailymail.co.uk

អត្ថបទ៖ មន្នីរ័ត្ន