កីឡា

ការប្រកួតបាល់ទាត់មិត្តភាពខ្មែរ-ថៃពានសតវត្សរ៍នៃព្រះធម៌ នឹងបង្កើនចំណងមិត្តភាព

បានផុស

១ year មុន

នៅ

ថ្ងៃអង្គារ ២៥ កុម្ភៈ ២០២៥

ដោយ

កម្ពុជាបានទទួលរៀបចំការប្រកួតបាល់ទាត់មិត្តភាពជាមួយប្រទេសថៃដែលគ្រោង ធ្វើនៅថ្ងៃទី៨ ខែមីនា ឆ្នាំ២០២៥ ក្រោមមូលបទ«សតវត្សរ៍នៃព្រះធម៌»នៅពហុកីឡដ្ឋានជាតិអូឡាំពិក ដើម្បីអបអរសាទរខួបអនុស្សាវរីយ៍ លើកទី៧៥ នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងព្រះរាជាណាចក្រថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី២៤ ខែកុម្ភៈ ឆ្នាំ២០២៥ ប្រទេសទាំងពីរបានរៀបចំធ្វើសន្និសីទសារព័ត៌មានលើកទី២ នៅសណ្ឋាគារ សូហ្វីតែល ភ្នំពេញ ភូគីត្រា បន្ទាប់ពីលើកទី១បានរៀបចំនៅទីក្រុងបាងកក ប្រទេសថៃ កាលពីថ្ងៃទី១២ ខែកុម្ភៈ ឆ្នាំ២០២៥ ស្តីពីការប្រកួតបាល់ទាត់មិត្តភាពដើម្បីរឹតចំណងមិត្តភាពទ្វេភាគី។

លោក ខូវ ឆាយ ប្រធានសហព័ន្ធប្រដាល់គុនខ្មែរជាសហស្ថាបនិករៀបចំព្រឹត្តិការណ៍បាល់ទាត់មិត្តភាពនេះមានប្រសាសន៍ថា ការរៀបចំព្រឹត្តិការណ៍នេះឡើងគឺដើម្បីបង្កើនភាពស្និទ្ធស្នាល ស្វែងយល់ពីវប្បធម៌សន្តិភាពរវាងប្រទេសទាំងពីរ ព្រមទាំងប្រទេសនៅក្នុងតំបន់ទន្លេមេគង្គ។ ប្រជាជនទាំងអស់ដែលបានកើតឡើងនៅក្នុងតំបន់ទន្លេមេគង្គប្រៀបដូចជាកើតចេញពីផ្ទៃម្តាយតែមួយ ដោយសារតែភាគច្រើនជាអ្នកគោរពព្រះពុទ្ធសាសនា ដូច្នេះត្រូវតែមានទំនាក់ទំនងល្អជាមួយគ្នាដើម្បីបង្កើតវប្បធម៌នៃការរស់នៅដោយសន្តិភាព។

លោក ស៊ុផាឆៃ វីរៈភូជុង សហស្ថាបនិករៀបចំបានលើកឡើងថា នេះគ្រាន់តែជំហានទី១នៃកម្មវិធីប្រកួតបាល់ទាត់រវាងប្រទេសកម្ពុជា និងថៃ ប៉ុណ្ណោះ ប៉ុន្តែនៅពេលខាងមុខ នឹងមានរៀបចំការប្រកួតជាបន្តបន្ទាប់ទៀតជាមួយប្រទេសនៅតាមដងទន្លេមេគង្គមានកម្ពុជា ថៃ ឡាវ វៀតណាម មីយ៉ាន់ម៉ា ហើយអាចឈានដល់ការប្រកួតជាមួយក្រុមរបស់ប្រទេសឥណ្ឌាដែលជាទឹកដីកំណើតរបស់ព្រះពុទ្ធ ហើយឈានដល់ជាមួយជប៉ុន ចិន និងកូរ៉េថែមទៀត។

លោកមានប្រសាសន៍ថា ៖«នៅតំបន់ទន្លេមេគង្គភាគច្រើនជាអ្នកគោរពប្រតិបត្តិព្រះពុទ្ធសាសនា ដូច្នេះក្នុងនាមជាកូនចៅជំនាន់ក្រោយស្ថិតនៅលើទឹកដីសុវណ្ណភូមិដែលគោរពប្រតិបត្តិព្រះពុទ្ធសាសនារាប់ពាន់ឆ្នាំមកហើយគឺត្រូវបន្តរួមរស់នៅជាមួយគ្នាដ៏សុខសាន្តក្នុងនាមជាប្រជាជាតិនៃសហគមន៍អាស៊ានតែមួយ»។

ជាមួយគ្នានេះ តារាចម្រៀង ខេម ប្រធានក្រុមបាល់ទាត់តារាកម្ពុជា បានលើកឡើងថា ៖«យើងជាប្រទេសជិតខាង ក្នុងនាមជាតារាសិល្បៈដូចគ្នា យើងត្រូវបង្កើតសម្ព័ន្ធភាពនៃក្តីស្រឡាញ់ជាមួយគ្នាឲ្យបានច្រើន។ ទោះបីជានៅតាមបណ្តាញសង្គមឃើញមានបញ្ហាបន្តិចបន្តួចរវាងប្រទេសទាំងពីរមែន តែក្នុងនាមជាតារាសិល្បៈគប្បីចូលរួមធ្វើអ្វីដើម្បីបង្ហាញពីក្តីស្រឡាញ់ រាប់រកគ្នា និងបង្កើតទំនាក់ទំនងល្អរវាងគ្នានិងគ្នា»។

នៅចុងបញ្ចប់នៃសន្និសីទសារព័ត៌មាន អ្នកចូលរួមទាំងអស់បាននាំគ្នាសូត្រធម៌នមស្សការព្រះរតនត្រ័យដើម្បីផ្សាយមេត្តា និងអនុមោទនារួមគ្នា។

តាមការគ្រោង ទុក ក្រុមបាល់ទាត់គុនខ្មែរ នឹងប្រកួតជាមួយក្រុមបាល់ទាត់មួយថៃ ហើយក្រុមបាល់ទាត់តារាកម្ពុជា ប្រកួតជាមួយក្រុមបាល់ទាត់តារាថៃ គិតចាប់ពីម៉ោង៣រសៀលទៅនៅពហុកីឡដ្ឋានជាតិអូឡាំពិក។

ក្រុមបាល់ទាត់គុនខ្មែរសុទ្ធតែកីឡាករប្រដាល់ល្បីៗប្រចាំប្រទេសកម្ពុជា។ ក្រុមបាល់ទាត់មួយថៃក៏មានកីឡាករល្បីៗជាច្រើនដូចជា Saenchai ជាដើមដែលនឹងមកចូលរួមប្រកួតដែរ។ ទាំងក្រុមបាល់ទាត់តារាកម្ពុជា និងក្រុមតារាថៃ មានដូចជា តារាសម្តែង តារាចម្រៀង តារាម៉ូដែល YouTuber, Vlogger, តារា TikTok នៃប្រទេសកម្ពុជា និងប្រទេសថៃ៕