ធ្លាប់​តែ​កក្រើកសង្វៀនគ្រុឌគុនខ្មែរ លើកនេះក្រុម​គុនខ្មែរ ប៉ះ​ក្រុមប្រដាល់ថៃ កក្រើកវាលស្មៅ

ធ្លាប់តែកក្រើកលើសង្វៀនគ្រុឌគុនខ្មែរ លើកនេះក្រុមហ៊ុន វឌ្ឍនៈ ប៊្រូវើរី សហការជាមួយសហព័ន្ធប្រដាល់គុនខ្មែរ រៀបចំព្រឹត្តិការណ៍​ដ៏កក្រើកមួយទៀតនៅលើវាលស្មៅខៀវខ្ចីវិញម្តងគឺ​ការ​ប្រកួត​បាល់ទាត់​ពានរង្វាន់មិត្តភាព«សតវត្សរ៍នៃព្រះធម៌»។

បង​ប្អូន​​ធ្លាប់តែឃើញកីឡាករគុនខ្មែរនៅលើសង្វៀនប្រដាល់ លើកនេះបងប្អូនពិតជាចង់ដឹង ចង់ឃើញ ពួក​គេ​បង្ហាញខ្លួនជាកីឡាករបាល់ទាត់។ តើវានឹងមានអ្វីថ្មីកើតឡើង នៅ​ពេល​ក្រុម​កីឡាករ​គុន​ខ្មែរ​ត្រូវជួបក្រុមប្រដាល់ថៃ ក្នុងការប្រកួតបាល់ទាត់មិត្តភាពវិញម្តង។

ការប្រកួតនេះនឹងធ្វើឱ្យអ្នកគាំទ្រគុនខ្មែរពេញចិត្តស្តូក។ ទន្ទឹមរង់ចាំទស្សនា ព្រឹត្តិការណ៍មួយនេះ សម្រាប់អ្នកគាំទ្រទាំងអស់គ្នានឹងបានជួបកីឡាករប្រដាល់គុនខ្មែរល្បីៗជាច្រើនរូប ពិសេសក្រុមកីឡាប្រដាល់ថៃ ក្នុងនោះក៏មានក្រុមបាល់ទាត់តារាកម្ពុជា នឹងត្រូវប្រកួតជាមួយក្រុម បាល់ទាត់តារាថៃ ដែល​ប្រជុំ​ដោយ​តារាសម្តែង តារាចម្រៀងល្បីៗ តារាម៉ូដែល YouTuber, Vlogger, តារា TikTok នៃប្រទេសទាំង២។ ព្រឹត្តិការណ៍នេះនឹងធ្វើឱ្យកក្រើកពហុកីឡដ្ឋានជាតិអូឡាំពិកម្តងទៀត។

អ្នកគាំទ្រក៏ត្រៀមចិត្តរួចរាល់ហើយផងដែរថា នឹងមានអ្វីកើតឡើងនាពេលប្រកួតនេះ​ដើម្បី​ដណ្តើម​ពានរង្វាន់មិត្តភាព «សតវត្សរ៍នៃព្រះធម៌»​ជា​លើកដំបូងសម្រាប់ក្រុមគុនខ្មែរ-ថៃ។ ក្នុងនោះក៏ឃើញមានការចូលរួមចំណែកសហការឧបត្ថម្ភធំពីក្រុមហ៊ុន វឌ្ឍនៈ ប្រ៊ូវើរី ផងដែរ ក្នុងការលើកស្ទួយវិស័យកីឡានៅកម្ពុជា។ នេះជាចំណងមិត្តភាពនៃប្រទេសទាំងពីរ ដើម្បីផ្សារភ្ជាប់នូវវប្បធម៌សន្តិភាព ​បង្កើន​ចំណងមិត្តភាព និងសាមគ្គីភាព ក៏ដូចជាប្រទេសនៅជាប់ដងទន្លេមេគង្គផ្សេងទៀត ដែលសុទ្ធតែអ្នក​គោរព​ប្រតិបត្តិ​ព្រះពុទ្ធសាសនា។

កុំភ្លេចចូលរួមទស្សនាឱ្យបានច្រើនកុះករ លើកទឹកចិត្តដល់ក្រុមប្រដាល់គ្រុឌគុនខ្មែរ និងក្រុមបាល់ទាត់តារាកម្ពុជា ទាំងអស់គ្នា នៅពហុកីឡដ្ឋានជាតិអូឡាំពិក ថ្ងៃទី៨ ខែមីនា ឆ្នាំ២០២៥ នៅលើទឹកដីនៃព្រះរាជាណាចក្រកម្ពុជា៕