កីឡា

គ្មានអ្វីបារម្ភទេ ឈឿង ល្វៃ វិលចូលជំរំហ្វឹកហាត់ជម្រើសជាតិវិញហើយ

បានផុស

២ years មុន

នៅ

ថ្ងៃចន្ទ ១៧ មេសា ២០២៣

ដោយ

កីឡាករប្រដាល់គុនខ្មែរ និងឃីកបុកស៊ីងជម្រើសជាតិកម្ពុជា ឈឿង ល្វៃ បានវិលចូលជំរំហ្វឹកហាត់ក្រុមជម្រើសជាតិកម្ពុជាវិញហើយ បន្ទាប់ពីប្រកួតជាមួយកីឡាករថៃ Sammy កាលពីថ្ងៃទី១៥ ខែមេសា នៅខេត្តសៀមរាប ក្នុងពិធីបុណ្យចូលឆ្នាំថ្មីប្រពៃណីជាតិ។

ឈឿង ល្វៃ ត្រូវបានកីឡាករថៃ Sammy ទាត់ឲ្យខូចជើងក្រោមរហូតបោះចោលការប្រកួតក្នុងទឹកទី៤ ប៉ុន្តែមុនពេលចាញ់អ្នកលេងគុនខ្មែររូបនេះបានវាយកែង និងទាត់ផ្កាប់ចានឲ្យលោកអាជ្ញាកណ្តាល ជា រិទ្ធ រាប់៨ដល់ទៅពីរដងលើកីឡាករថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការខូចជើងក្រោមរបស់ ឈឿង ល្វៃ បានធ្វើឲ្យអ្នកគាំទ្រមួយចំនួនព្រួយបារម្ភក្រែងមានសភាពធ្ងន់ធ្ងររំខានដល់ការហ្វឹកហាត់ក្នុងការត្រៀមខ្លួនសម្រាប់ប្រកួតកីឡាស៊ីហ្គេម លើកទី៣២ ឆ្នាំ២០២៣ ក្នុងនាមជាម្ចាស់ផ្ទះ។

ទោះបីជាយ៉ាងណា លោក ហេង សុឃន ប្រធានសហព័ន្ធកីឡាប្រដាល់ឃីកបុកស៊ីងកម្ពុជាបានប្រាប់សារព័ត៌មានកម្ពុជាថ្មីនៅព្រឹកថ្ងៃទី១៧ ខែមេសា ថា គ្មានអ្វីធ្ងន់ធ្ងរគួរឲ្យព្រួយបារម្ភទេ។

លោកបានបញ្ជាក់ថា ៖«អត់អីទេ គាត់ (ឈឿង ល្វៃ) មកជំរំហ្វឹកហាត់វិញហើយ។ អត់អីទេ កីឡាតែងតែមានប៉ះទង្គិចតិចតូច ហើយសហព័ន្ធបាន និងកំពុងខិតខំមើលថែគាត់ និងជម្រើសជាតិផ្សេងទៀត។ យើងបានយកចិត្តទុកដាក់ថែទាំតាំងពីស៊ីហ្គេម លើកទី៣១ នៅប្រទេសវៀតណាម»។

តាមប្រសាសន៍របស់សម្តេចតេជោ ហ៊ុន សែន កាលពីយប់ថ្ងៃទី១៦ ខែមេសា ស្នើឲ្យសហព័ន្ធកីឡាប្រដាល់គុនខ្មែរ និងឃីកបុកស៊ីង យកចិត្តទុកដាក់ និងពិនិត្យមើលគ្រប់អត្តពលិកជម្រើសជាតិទាំងអស់ ដែលត្រៀមស៊ីហ្គេម មិនត្រូវអនុញ្ញាតឲ្យឡើងប្រកួតញឹកញាប់ទៀតទេដើម្បីកុំឲ្យកើតមានបញ្ហាជាយថាហេតុណាមួយរំខានដល់ការត្រៀមខ្លួន និងការប្រកួតដែលកាន់តែខិតជិតចូលមកដល់៕

អត្ថបទ៖ វីរបុត្រ