កីឡា

ឡុង សុភី វិលមកសង្វៀនវិញនៅរក្សាក្បាច់វ៉ៃដដែល

បានផុស

៣ years មុន

នៅ

ថ្ងៃចន្ទ ១៩ មិថុនា ២០២៣

ដោយ

កីឡាករចាស់វស្សា ឡុង សុភី បានចាញ់ពិន្ទុកីឡាករថៃ យ៉តឌីហ្សែល លូកចៅម៉ៃសៃថង សម្រាប់ការប្រកួតមិត្តភាពនៅកម្មវិធីខារ៉ាបាវ សង្វៀនបាយ័នស្ទឹងមានជ័យ បន្ទាប់ពីតស៊ូគ្នា៥ទឹក យប់ថ្ងៃអាទិត្យ ទី១៨ ខែមិថុនា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការពិតលើសង្វៀនបង្ហាញថា ឡុង សុភី បានប្រើពេល៥ទឹកពេញតាមរយៈការដើរចូលវ៉ៃ ឆកកណ្តាប់ដៃលើពោះរបស់ដៃគូ និងអោបឡើងជង្គង់ ប៉ុន្តែគ្មានប្រសិទ្ធភាពឡើយ។ ផ្ទុយទៅវិញ កីឡាករថៃ យ៉តឌីហ្សែល ដែលបានការពារ និងថយក្រោយបានទាត់មួយៗ និងចំគោលដៅបានច្រើនដែលធ្វើឲ្យរូបគេទទួលបានជ័យជម្នះដោយពិន្ទុ។

តាមរយៈការប្រកួតនេះឃើញថា ក្បាច់វ៉ៃរបស់ ឡុង សុភី គ្មានអ្វីប្លែកឡើយពោលគឺទម្លាប់ដើរចូល ឆកកណ្តាប់ដៃលើពោះដៃគូ និងធាក់នៅតែដដែល។ ទោះជាយ៉ាងណា រូបគេនៅតែមានកម្លាំងស៊ុហ្វប្រកួតបាន៥ទឹកពេញ។

នេះជាលើកទី២ដែលឡើង សុភី បានឡើងប្រកួត បន្ទាប់ពីបានបាត់មុខពីសង្វៀនប្រដាល់គុនខ្មែរអស់រយៈពេលប្រហែលជា៤ឆ្នាំហើយ។ កាលពីខែមុនការវិលត្រឡប់មកកាន់សង្វៀនជាថ្មី រូបគេបានឈ្នះពិន្ទុកីឡាករឡាវ ស៊ីធឿន។

កីឡាករចាស់វស្សាមួយចំនួនទទួលបានឱកាសឡើងសង្វៀនវិញមានដូចជា ឡុង សុវណ្ណឌឿន និង ម៉ឺន សុភា ជាដើម បន្ទាប់ពីកីឡាករជួរមុខមួយចំនួនជាប់ភារកិច្ចក្នុងក្រុមជម្រើសជាតិទាំងគុនខ្មែរ និងឃីកបុកស៊ីង ហើយក៏ជាពេលវេលាដែលពួកគេចាប់ផ្តើមអាជីពសាថ្មីដើម្បីទទួលបានប្រាក់ចំណូល៕