ទើបបង្ហាត់បាន២ខែ លោក Pep មាន​មោទនភាព​ចំពោះក្រុមព្រះ​ខ័ន​រាជ​ស្វាយរៀង

លោក Pep Munoz ​មាន​មោទនភាព​ និង​រីក​រាយ​ចំពោះ​​​ក្រុម​កីឡាករ​ព្រះ​ខ័ន​រាជ​ស្វាយរៀង​ដែល​ចាប់​បាន​លឿន​នូវ​អ្វី​ដែល​លោក​​បាន​បង្ហាត់ បន្ទាប់​ពី​លោក​បាន​ចូល​ខ្លួន​មក​ដឹក​នាំ​ក្លិប​មួយ​នេះ​កាល​ពី​ដើម​ខែ​ឧសភា​កន្លង​ទៅ។

បុរស​សញ្ជាតិ​អេស្ប៉ាញ​អាយុ​៤៣​ឆ្នាំ​បាន​ចុះ​កុងត្រា​ក្លាយ​ជា​គ្រូ​បង្គោល​របស់​ព្រះ​ខ័ន​រាជ​ស្វាយរៀង​កាល​ពី​ថ្ងៃ​ទី​៦ ខែ​ឧសភា ឆ្នាំ​២០២៣។ ក្នុង​រយៈ​ពេល​ប្រមាណ​២​ខែ​នេះ លោក​បាន​​​បង្វឹក​បង្ហាត់​​ក្រុម​ព្រះ​ខ័ន​រាជ​ស្វាយរៀង​យ៉ាង​សកម្ម​ជា​រៀង​រាល់​ថ្ងៃ​នៅ​ទី​លាន​ហ្វឹក​ហាត់​របស់​ព្រះ​ខ័ន​រាជ​ស្វាយ​រៀង​តាម​បណ្តោយ​វិថី​ឈ្នះ​ឈ្នះ។

លោក Pep បាន​​ប្រាប់​«កម្ពុជា​ថ្មី»​ក្នុង​បទ​សម្ភាស​មួយ​ថា ៖«រយៈ​ពេល​២​ខែ​កន្លង​ទៅ​នេះ ការ​ហ្វឹក​ហាត់ ​កីឡាករ​ពិត​ជាខិត​ខំ​ប្រឹង​ប្រែងខ្លាំង។ ​ពួក​គេ​ចាប់​​បាន​លឿន​តាម​ហ្គេម​ម៉ូដែល​​របស់​ខ្ញុំ។ ខ្ញុំ​ពិត​ជា​មាន​មោនភាព​ចំពោះ​អ្វី​ដែល​ក្រុម​បាន​ខិត​ខំ​ហ្វឹក​ហាត់។ ពួក​គេ​ហ្វឹក​ហាត់​ខ្លាំង ហើយ​មាន​ទ្រឹស្តី​ផ្សេង​​ៗ​ជា​មុន។ ពួកគេ​​​មាន​លក្ខខណ្ឌ​​ល្អ ហើយ​ចាប់​បាន​លឿន»។

«​លំហាត់​ដែល​​​យើង​កំពុង​ធ្វើ​គឺ​ការ​​រក្សា​បាល់ និងគ្រប់​គ្រង​ការ​ប្រកួត​ឲ្យ​បាន​ច្រើន។ មុន​នឹង​បាល់​ដល់​ជើង កីឡាករ​ត្រូវ​គិត​ទុក​ឲ្យ​ហើយ គិត​ឲ្យ​លឿន ​ថា​តើ​​ត្រូវ​លេង​​យ៉ាង​ម៉េច​ទៅ​មុខ? ផ្នែក​នេះ​​ជា​រឿង​លំបាក​ក្នុង​​បាល់​ទាត់។ យើង​ត្រូវគិត​ពីស្ថានភាព យើង​ត្រូវ​គិត​ពី​ការ​ប្រកួត​បន្ទាប់​។ របៀប​ដែល​​ត្រូវ​ចែក​បាល់ មិន​មែន​គ្រាន់​តែ​មើល​ទៅ​លើ​​​បាល់​​ម្យ៉ាង​នោះ​ទេ។ នេះ​ជា​របៀប​ដែល​មិន​ងាយស្រួល​ផ្លាស់​ប្តូរទេ។ ខ្ញុំ​បាន​ព្យាយាម​ជំរុញ​ឲ្យ​​កីឡាករ​គិត​លើ​រឿង​នេះ ហើយ​ពួក​គាត់​រីក​ចម្រើន​បាន​លឿន»។ លោក​បានពន្យល់។

សម្រាប់​ទម្រង់​លេង​នៅ​លើទី​លាន លោក Pep Munoz ​​បាន​​ផ្តោត​សំខាន់​​គឺ​​កីឡាករ​ធ្វើ​ការងារ​ជា​ក្រុម​​ជា​ជាង​គិត​ថា ខ្លួន​មាន​តួនាទី​ជា​ខ្សែ​ការពារ ខ្លួន​ជា​ខ្សែ​បម្រើ ឬ​ខ្លួន​ជា​ខ្សែ​ប្រយុទ្ធ។

លោក​មាន​ប្រសាសន៍​ថា ៖«គោល​បំណង​របស់​យើង​គឺ​លេង​ជា​ក្រុម។ ​យើង​មិន​ចែក​ដាច់​គ្នា​ទាំង​ស្រុង​រវាង​តំបន់​ការពារ បម្រើ ឬ​ប្រយុទ្ធ​ទេ។ បើ​យើង​​នៅ​តំបន់​ការពារ​គឺ​ការពារ​ទាំង​អស់​គ្នា។ បើ​នៅ​តំបន់​បម្រើ​គឺ​បម្រើ​រួម​គ្នា ហើយ​បើ​ដល់​តំបន់​​ប្រយុទ្ធ​គឺ​ប្រយុទ្ធ​រួម​គ្នា ប៉ុន្តែ​យើង​​ត្រូវ​​មាន​តុល្យភាព​​​ក្នុង​ការ​ប្រែ​ប្រួល​ចុះ​ឡើង»។

រហូត​ដល់​ពេល​នេះ ព្រះ​ខ័ន​រាជ​ស្វាយរៀង​មាន​សមាជិក​គ្រប់​គ្រាន់​ហើយ​ទាំង​តំបន់​ការពារ បម្រើ​ និង​ប្រយុទ្ធ ប៉ុន្តែ​នៅ​កូតា​កីឡាករ​តំបន់​អាស៊ាន​ម្នាក់​ទៀត​ដែល​ព្រះ​ខ័ន​រាជ​ស្វាយរៀង​មិន​ទាន់​បំពេញ។

ដើម​ខែ​កក្កដា​ខាង​មុខ​នេះ ព្រះ​ខ័ន​រាជ​ស្វាយរៀង​នឹង​ធ្វើ​ដំណើរ​ទៅ​ប្រទេស​ថៃ​ដើម្បី​ហ្វឹក​ហាត់ និង​ប្រកួត​មិត្តភាព​កម្តៅ​សាច់​ដុំ​២​ប្រកួត​ជា​មួយ​ក្លិប​លីគ​កំពូល​ថៃ និង​ក្លិប​លីគ​ថៃ​លំដាប់​ទី​២។

ជុំ​វិញ​ការ​ទៅ​ប្រកួត​មិត្តភាព​នៅ​ថៃ លោក Pep បាន​​ប្រាប់​​ថា ៖«មិត្តភាព​កម្តៅ​សាច់​ដុំ​ខាង​មុខ​នេះ​ជាពេល​វេលា​មួយ​ដែល​ក្រុម​របស់​យើងត្រូវ​ស្វែង​ចិត្ត​គ្នា​ឲ្យ​កាន់​តែ​ល្អ​ប្រសើរ។ គោល​បំណង​សំខាន់​ចំពោះ​ការ​​ប្រកួត​មិត្តភាព​នៅ​ថៃ​​គឺ​ដើម្បី​អភិវឌ្ឍ​ស្មារតី​ក្រុម​។ យើង​នឹង​ចំណាយ​ពេល​វេលា​​នៅ​ជា​មួយ​គ្នា និង​មាន​ការ​ប្រកួតមិត្តភាព។ ជាសប្តាហ៍​ដែល​យើង​ពង្រឹង​ក្រុម​មុន​ពេល​រដូវ​កាល​ថ្មី​ចូល​មក​ដល់។ នេះ​ជា​ឱកាស​ល្អ​ដែល​ក្រុម​ត្រូវ​បង្កើត​គំនិត​រួម​គ្នា»។

លោក Pep ជាគ្រូបង្វឹកសញ្ជាតិអេស្ប៉ាញដែលកាន់អាជ្ញាប័ណ្ណកម្រិតយូហ្វាប្រូឡាយសិន​ដែល​មាន​បទពិសោធ​​ជា​ច្រើន​ឆ្នាំ។ លោក​បាន​ចាប់ផ្តើមអាជីពជាគ្រូបង្វឹកដំបូងនៅក្រុម UE Lleida ក្នុងប្រទេសអេស្ប៉ាញមុនទៅចូលរួមជាមួយក្លិបយក្ស FC Barcelona។ ចំណាយរយៈពេល៤ឆ្នាំជាមួយក្រុម​យុវជន​ U19 និង Barcelona B លោកបានជួយឲ្យក្រុមឈ្នះពានរង្វាន់ U19 UEFA Champion League ម្តង និងឈ្នះពានលីគ២ដង មុនទៅកាន់ប្រទេសចិន ដែលជាកន្លែងលោកចំណាយពេល ៧ឆ្នាំដឹកនាំក្រុមជាច្រើននៅប្រទេសចិនដូចជា Huanghai FC, Shandong Fc និងក្រុមជម្រើសជាតិចិន៕

អត្ថបទ៖ វីរបុត្រ