កីឡា

កីឡាករបារាំង-ខ្មែរ ចាន់ សីហា ប្រាប់មូលហេតុវិលមកកាន់សង្វៀនជាថ្មី

បានផុស

៣ years មុន

នៅ

ថ្ងៃព្រហស្បតិ៍ ៦ កក្កដា ២០២៣

ដោយ

កីឡាករប្រដាល់បារាំងសញ្ជាតិខ្មែរ ចាន់ សីហា នឹងឡើងសង្វៀនជាសាជាថ្មីដោយត្រូវជួបកីឡាករវៀតណាម ត្រាន មិញទ្រុង នាល្ងាចថ្ងៃអាទិត្យ ទី៩ ខែកក្កដានេះនៅសង្វៀនបាយ័នស្ទឹងមានជ័យ។

នេះជាការវិលត្រឡប់មកកាន់សង្វៀនជាថ្មីរបស់អ្នកប្រដាល់ ចាន់ សីហា បន្ទាប់ពីរូបគេបានខកខានឡើងសង្វៀនរយៈពេលប្រហែលជា៦ឆ្នាំកន្លងទៅហើយ។ ពាក់ព័ន្ធនឹងការវិលត្រឡប់មកកាន់សង្វៀនជាថ្មីនេះ រូបគេបានបញ្ជាក់ថា តម្លៃខ្លួននៃការប្រកួតគុនខ្មែរនាពេលបច្ចុប្បន្ននេះប្រសើរជាងមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាន់ សីហា បានប្រាប់«កម្ពុជាថ្មី»ថា ៖«ការប្រកួតគុនខ្មែរឥឡូវនេះទទួលបានតម្លៃខ្លួនប្រសើរជាងមុន។ ម្យ៉ាងទៀត វាជាកីឡាដែលខ្ញុំចូលចិត្ត តែមែនទែនទៅ ខ្ញុំក៏ត្រូវការចំណូលចិញ្ចឹមគ្រួសារ»។

«ឃើញហើយ មួយរយៈពេលចុងក្រោយនេះ មានកីឡាករចាស់ៗជាច្រើនបានវិលមកប្រកួតវិញ។ យើងពិតជាស្រឡាញ់គុនខ្មែរ តែយើងក៏ត្រូវការចំណូលផ្គត់ផ្គង់គ្រួសារ។ យ៉ាងណា ខ្ញុំក៏ទទួលបានការគាំទ្រពីក្រុមគ្រួសារដែលជំរុញឲ្យខ្ញុំវិលមកប្រកាន់សង្វៀនវិញដែរ»។ ចាន់ សីហា បានបន្ថែម។

កីឡាករដែលបានមករស់នៅប្រទេសកម្ពុជាតាំងពីអាយុ៥ឆ្នាំបានឲ្យដឹងទៀតថា រយៈពេលប៉ុន្មានឆ្នាំដែលខ្លួនបានឃ្លាតឆ្ងាយពីសង្វៀនក៏ដោយសារមានគ្រួសារ និងមានកូនស្រីពីរនាក់ ដូច្នេះរូបគេចំណាយពេលវេលាដើម្បីមើលថែប្រពន្ធកូនដែលជាហេតុធ្វើឲ្យផ្អាកពីប្រដាល់។ ទោះបីជាយ៉ាងណា នៅពេលកូនស្រីជាទីស្រឡាញ់ទាំងពីរអាយុកាន់តែច្រើនបានផ្តល់ឱកាសឲ្យរូបគេដកឃ្លាកមកហ្វឹកហាត់ប្រដាល់ឡើងវិញ។

ចាន់ សីហា បានប្រាប់ថា កីឡាប្រដាល់គុនខ្មែរត្រូវការពេលវេលាលះបង់ និងខិតខំប្រឹងប្រែងខ្លាំងណាស់ពោលគឺត្រូវការពេលវេលាហ្វឹកហាត់ពេញលេញទើបគុណភាពឈានដល់កម្រិតល្អ។

កីឡាករអាយុ៣៣ឆ្នាំបាននិយាយថា ៖«ប្រដាល់ជាកីឡាដ៏គ្រោះថ្នាក់មួយ មិនដូចកីឡាផ្សេងៗទេ។ យើងត្រូវការត្រៀមចិត្ត និងចំណាយពេល៤ទៅ៥ម៉ោងក្នុងការហ្វឹកហាត់មួយៗថ្ងៃ»។

ពេលនេះ ចាន់ សីហា បានត្រៀមខ្លួនទាំងកាយសម្បទា និងស្មារតីរួចរាល់ហើយ។ រូបគេបានប្តេជ្ញាធ្វើឲ្យបានល្អបំផុត និងមិនឲ្យអ្នកគាំទ្រខកបំណងឡើយ។ កីឡាករដែលទទួលបានសញ្ជាតិខ្មែរជាច្រើនឆ្នាំមកហើយធ្លាប់ប្រកួតបាន២២ដង ក្នុងនោះឈ្នះ២០ដង ចាញ់២ដង និងធ្លាប់ផ្តួលដៃគូឲ្យសន្លប់៨ដង។ ការប្រកួតចុងក្រោយ រូបគេបានឈ្នះកីឡាករ ម៉ានូ សិល្បៈ ទឹកទី៥៕

អត្ថបទ៖ វីរបុត្រ

Related Topics:កីឡាប្រដាល់គុនខ្មែរ ចាន់ សីហា

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា