លន បញ្ញា ឈ្នះខ្សែក្រវាត់ទី៤ក្នុងអាជីពក្រោយផ្ដួលជើងខ្លាំងអាហ្រ្វិក

កីឡាករគុនខ្មែរ លន បញ្ញា ​បាន​ផ្ដួលកីឡាករ អិនសេដូ ហ្គូមបេ នៅពាក់កណ្តាលទឹកទី៣​ដើម្បីក្លាយជាម្ចាស់ខ្សែក្រវាត់គ្រុឌគុនខ្មែរអន្តរជាតិ ទម្ងន់៦៥គីឡូក្រាម កាលពីយប់ថ្ងៃទី៣ ខែសីហា ឆ្នាំ២០២៣ នៅសង្វៀនទូរទស្សន៍ជាតិកម្ពុជា។

ជំនួបដ៏​ជក់​ចិត្ត​កាល​ពី​យប់​មិញ​ នៅ​ទឹកទី១ និងទឹកទី២ កីឡាករ ហ្គូមបេ ​បាន​ព្យាយាមសម្រុក​យ៉ាង​ខ្លាំង ប៉ុន្តែ​​កីឡាករម្ចាស់​ស្រុក​បាន​ប្រើបច្ចេកទេសការពារ​យ៉ាង​ល្អ។ អ្វីៗបានប្រែប្រួលនៅពាក់កណ្ដាលទឹកទី៣ លន បញ្ញា ទាត់មួយជើងចូលពោះទឹកធ្វើឲ្យ ហ្គូមបេ ឈឺចុកចាប់និងមិន​អាចបន្តការប្រកួតបាន។

ក្រោយជ័យជម្នះនេះលោកគ្រូ ធន់ សុភា ដែលជាគ្រូបង្វឹកកីឡាករ លន បញ្ញា និយាយថា៖«ខ្ញុំសប្បាយចិត្តដោយឃើញ បញ្ញា ធ្វើបានល្អក្នុងការប្រកួត។ ជាក់ស្តែងកីឡាករអាហ្រិកខាងត្បូង ព្យាយាមវ៉ៃឲ្យ បញ្ញា សន្លប់នៅទឹកទី១និងទី២ ប៉ុន្តែបញ្ញាអាចគ្រប់គ្រងស្ថានការបាន ហើយវាយបកឈ្នះវិញ»។

កីឡាករ អិនសេដូ ហ្គូមបេ ជា​ជើងខ្លាំងអាហ្រ្វិកខាងត្បូង ដែលធ្លាប់ប្រកួតស្មើពិន្ទុជាមួយជើងខ្លាំង​ថៃ Rodtang កាលពីឆ្នាំ២០១៧ និងចាញ់ខ្លាចាស់ សែនឆៃ កាលពីឆ្នាំ២០១៦។ រូប​គេ​មានប្រវត្តិប្រកួត ៦៥លើក ឈ្នះ៥៥ ចាញ់៥ មិនដែលស្មើ ផ្តួលដៃគូ ២១ដង។

លន បញ្ញា នៅតែដាក់គោលបន្តខំហ្វឹកហាត់និងចង់ស្វែងរកខ្សែក្រវាត់បន្ថែមទៀត ទោះបច្ចុប្បន្នរូបគេមានជាម្ចាស់ខ្សែក្រវាត់៤ស្ថាប័នផ្សេងគ្នា និង​ឈ្នះ​មេដាយ​មាស ប្រាក់​ស៊ីហ្គេម។ យប់មិញនេះក៏ជាសមិទ្ធផល​ថ្មី​សម្រាប់ក្លិបមជ្ឍមណ្ឌលកីឡាកងយោធពលខេមរភូមិន្ទ ដែលមានលោកគ្រូ ធន់ សុភា ជាគ្រូបង្វឹក ក្នុង​នោះ​កីឡាករ២រូបរបស់លោកគ្រូគឺ កីឡាករ លន បញ្ញា និង កីឡាករ ធន់ រិទ្ធី បាននាំខ្សែក្រវាត់ចំនួន ២គ្រឿងចូលក្លិប។

កីឡាករដែលមានដើមកំណើតមកពីខេត្តព្រៃវែង លន បញ្ញា មិនទាន់ស្គាល់ពាក្យថាចាញ់ទេជាង៣ឆ្នាំហើយក្នុងការប្រកួតគុនខ្មែរ។ រូបគេ​ធ្លាប់ប្រកួត១០៣ដង ឈ្នះ៨២ ចាញ់១៧ ស្មើ៤និងផ្តួលដៃគូឲ្យបោះបង់ការប្រកួតចំនួន៤២លើក៕

អត្ថបទ៖ ផា រតនា