កីឡា

ប៉ះគ្នាថ្ងៃស្អែក លោក Félix មើលឃើញប៉ាគីស្ថានជាឧបសគ្គធំ

បានផុស

១ year មុន

នៅ

ថ្ងៃពុធ ១១ តុលា ២០២៣

ដោយ

លោក Félix Dalmás នឹងដឹកនាំក្រុមជម្រើសជាតិកម្ពុជាតទល់ជាមួយជម្រើសជាតិ ប៉ាគីស្ថាន ជាលើកទី៣ នៅពេលត្រូវប៉ះគ្នាក្នុងវគ្គជម្រុះជុំទី១ ជើងឯកពិភពលោក ឆ្នាំ២០២៦ (FIFA World Cup 2026) វេលាម៉ោង៧យប់ ថ្ងៃព្រហស្បតិ៍ ទី១២ ខែតុលា ឆ្នាំ២០២៣ នៅពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកគ្រូបង្វឹកកម្ពុជាបានមើលឃើញក្រុមប៉ាគីស្ថានខុសប្លែកស្ទើរទាំងស្រុង បើប្រៀបធៀបនឹងជួបគ្នាកាលពីឆ្នាំ២០១៩។ ពួកគេមានការផ្លាស់ប្តូរកីឡាករច្រើន និងមានគ្រូបង្វឹកថ្មី ជាពិសេសកីឡាករមកពីតំបន់អឺរ៉ុបច្រើន។

លោក Félix បានលើកឡើងថា ៖«ក្រុមប៉ាគីស្ថានឥឡូវនេះ កីឡាករសុទ្ធតែមានគុណភាព។ កីឡាករជាច្រើនលូតលាស់បាល់ទាត់នៅអឺរ៉ុប។ ប្រៀបធៀបពេលនោះ នឹងពេលនេះគឺខុសគ្នាខ្លាំងមែនទែន។ ពួកគេមានកីឡាករក្មេងៗដែលមានគុណភាពខ្ពស់»។

«ខ្ញុំអាចនិយាយបានថា ពេលនេះ ពួកគេខុសប្លែកស្ទើរទាំងស្រុង។ អីចឹងហើយពួកគេនឹងជាបញ្ហាប្រឈមដ៏ធំសម្រាប់យើង។ មិនត្រឹមតែកីឡាករទេ សូម្បីតែគ្រូក៏ថ្មីដែលមានបទពិសោធច្រើនក្នុងការដឹកនាំក្រុមជម្រើសជាតិ។ ជារួមគឺជាឧបសគ្គធំសម្រាប់ពួកយើង»។ លោកបានសង្កត់ធ្ងន់។

ក្នុងចំណោមកីឡាករប៉ាគីស្ថានដែលបានមកដល់កម្ពុជាកាលពីប៉ុន្មានថ្ងៃមុននេះមានកីឡាករ ៦រូបលេងនៅក្រៅប្រទេស។ ១. អ្នកចាំទី Yousuf Butt វ័យ៣៣ឆ្នាំ របស់ក្លិប Ishøj IF លីគទី៤ដាណឺម៉ាក។ ២. ខ្សែការពារ Abdullah Iqbal វ័យ២១ឆ្នាំ របស់ក្លិប Boldklubben af 1893 ប្រទេសដាណឺម៉ាក។ ៣. ខ្សែប្រយុទ្ធ Abdul Arshad វ័យ២០ឆ្នាំ របស់ក្លិប Hellerup IK លីគទី៣ ប្រទេសដាណឺម៉ាក។ ៤. ខ្សែការពារ Easah Suliman វ័យ២៥ឆ្នាំ របស់ក្លិប Sumgayit FK ក្នុងលីគកំពូលប្រទេសអាស៊ែបៃហ្សង់។ ៥. ខ្សែបម្រើ Rahis Nabi វ័យ២៤ឆ្នាំ របស់ក្លិប Digenis Akritas Morphou FC លីគលំដាប់ទី២ ប្រទេសសាយប្រឹស និង ៦. ខ្សែប្រយុទ្ធ Otis Khan វ័យ២៨ឆ្នាំ របស់ក្លិប Grimsby Town F.C. លីគទី៤របស់អង់គ្លេស។ រូបគេជាអតីតយុវជន Manchester United និង Barnsley FC។

កីឡាករ Rahis Nabi អតីតយុវជនជម្រើសជាតិអង់គ្លេស

នេះជាលើកទី៣ ដែលលោក Filex ដឹកនាំក្រុមកម្ពុជាប៉ះប៉ាគីស្ថាន បន្ទាប់ពី២លើកកន្លងមកទទួលបានជ័យជម្នះទាំង២ក្នុងវគ្គជម្រុះជុំទី១ FIFA World Cup 2022 កាលពីឆ្នាំ២០១៩។ កាលណោះ ជើងទី១ កម្ពុជាឈ្នះប៉ាគីស្ថាន ដោយលទ្ធផល ២-០ នៅទឹកដីកម្ពុជា និង ជើងទី២ ឈ្នះដោយលទ្ធផល ១-២ នៅទឹកដីកណ្តាលក្នុងប្រទេសកាតារ៕

អានបន្ថែម៖ ប៉ាគីស្ថានមានកីឡាករលេងក្រៅប្រទេស៦នាក់ត្រៀមប៉ះកម្ពុជាជម្រុះ World Cup

អត្ថបទ៖ វីរបុត្រ