ប៉ាគីស្ថានមានកីឡាករលេងក្រៅប្រទេស៦​នាក់ត្រៀមប៉ះកម្ពុជាជម្រុះ World Cup

ក្រុម​បាល់ទាត់ជម្រើសជាតិប៉ាគីស្ថានបានធ្វើដំណើរមកដល់កម្ពុជា​កាលពីព្រឹកថ្ងៃទី៩ ខែកញ្ញា ឆ្នាំ២០២៣ ​ដើម្បី​ប្រកួត​ជា​មួយ​ក្រុម​ជម្រើស​ជាតិ​កម្ពុជា វេលា​ម៉ោង​៧​យប់ ថ្ងៃទី១២ ខែតុលា ឆ្នាំ២០២៣ ក្នុងវគ្គជម្រុះបឋមពានរង្វាន់បាល់ទាត់ពិភពលោក​ឆ្នាំ​២០២៦ (FIFA World Cup 2026)។

រឿងដែលគួរឲ្យចាប់អារម្មណ៍ពាក់ព័ន្ធនឹង​បញ្ជីឈ្មោះ​ជម្រើសជាតិប៉ាគីស្ថានគឺមានកីឡាករ៦រូប ដែលកំពុងប្រកបអាជីពនៅក្រៅប្រទេស។ ក្នុងចំណោមនោះក៏មានកីឡាករមួយចំនួនដែលជាកូនកាត់ និងមានបទពិសោធលេងក្នុងនាមជាយុវជនរបស់អង់គ្លេសផងដែរ។

អ្នកចាំទី Yousuf Butt វ័យ៣៣ឆ្នាំ លេងឲ្យក្លិប Ishøj IF ក្នុងលីគលំដាប់ទី៤របស់ប្រទេសដាណឺម៉ាក។ រូប​គេ​ដែល​មាន​ដើម​​​​កំណើត​នៅក្នុងទីក្រុង Copenhagen ប្រទេសដាណឺម៉ាក​ជាអ្នកចាំទីដែលមានបទពិសោធច្រើន​​ធ្លាប់​លេងឲ្យក្លិប​១១ផ្សេងគ្នាក្នុងប្រទេសដាណឺម៉ាក។

ខ្សែការពារ Abdullah Iqbal វ័យ២១ឆ្នាំ ​ដែល​មានដើមកំណើត​នៅប្រទេសដាណឺម៉ាក បច្ចុប្បន្ន​កំពុង​លេងឲ្យក្លិប Boldklubben af 1893 ក្នុងលីគលំដាប់ទី២របស់ប្រទេសដាណឺម៉ាក។

ខ្សែប្រយុទ្ធ Abdul Arshad វ័យ២០ឆ្នាំ ដែល​មានដើមកំណើត​​​នៅ​ប្រទេដាណឺម៉ាក បច្ចុប្បន្ន​កំពុង​លេងឲ្យក្លិប Hellerup IK ក្នុងលីគលំដាប់ទី៣របស់ប្រទេសដាណឺម៉ាក។ រូប​គេ​ធ្លាប់​បង្ហាញខ្លួនជាមួយក្លិបបាន៨លើក និងស៊ុតបញ្ចូលទីបាន៩គ្រាប់។

ខ្សែការពារ Easah Suliman វ័យ២៥ឆ្នាំ កំពុងលេងឲ្យក្លិប Sumgayit FK ក្នុងលីគកំពូលប្រទេសអាស៊ែបៃហ្សង់។ កីឡាករ​ដែល​មាន​ដើម​កំណើរ​​នៅទីក្រុង Birmingham ប្រទេសអង់គ្លេស ជាអតីតសមាជិកក្រុមជម្រើសជាតិអង់គ្លេសមួយរូប ដែលជួយឲ្យអង់គ្លេសឈ្នះពានរង្វាន់យុវជន​ទ្វីបអឺរ៉ុបអាយុក្រោម១៩ឆ្នាំ ប៉ុន្តែនៅឆ្នាំ២០២៣ រូបគេក៏សម្រេចចិត្តចូលលេងឲ្យក្រុមជម្រើសជាតិប៉ាគីស្ថាន។

ខ្សែបម្រើ Rahis Nabi វ័យ២៤ឆ្នាំ ជា​សមាជិក​ក្លិប Digenis Akritas Morphou FC ក្នុងលីគលំដាប់ទី២របស់ប្រទេសសាយប្រឹស។ កីឡាករ​ដែល​មាន​ដើម​កំណើត​​នៅទីក្រុង Birmingham ប្រទេសអង់គ្លេស ជាអតីតកីឡាករយុវជនរបស់ក្លិប West Bromwich Albion និងក្រុមជម្រើសជាតិអង់គ្លេសអាយុក្រោម១៧ឆ្នាំ។

ខ្សែប្រយុទ្ធ Otis Khan វ័យ២៨ឆ្នាំ ជា​សមាជិក​ក្លិប Grimsby Town F.C. ក្នុងលីគលំដាប់ទី៤របស់ប្រទេស​អង់គ្លេស។ រូប​គេ​​មានបទពិសោធច្រើន​នៅក្នុងប្រទេសអង់គ្លេស​ និង​​ជាអតីតយុវជនរបស់ក្លិប Manchester United និង Barnsley FC៕

អត្ថបទ៖ ផា រតនា