កីឡា

លោកគ្រូ Pep Muñoz «កម្ពុជាគួរទទួលបាន២កៅអីនៅ AFC Cup»

បានផុស

១ year មុន

នៅ

ថ្ងៃព្រហស្បតិ៍ ២ វិច្ឆិកា ២០២៣

ដោយ

លោក Pep Muñoz គ្រូបង្គោលក្លិបបាល់ទាត់ព្រះខ័នរាជស្វាយរៀងបានមើលឃើញពីកម្រិតគុភាពរបស់ក្លិបបាល់ទាត់អាជីពនៅកម្ពុជាគួរទទួលបានហោចណាស់២កៅអីពីសហព័ន្ធកីឡាបាល់ទាត់ទ្វីបអាស៊ីដើម្បីចូលរួមប្រកួតវគ្គសន្សំពិន្ទុក្នុងពូលនៃពានរង្វាន់ AFC Cup។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Muñoz បានលើកឡើងថា ៖«ប្រាកដណាស់! កម្ពុជាគួរតែបានកៅអីច្រើនជាងហ្នឹង។ ខ្ញុំដឹងថា គេឲ្យកៅអីអាស្រ័យលើដំណើរការពិន្ទុ និងគុណភាពលីគ។ អ្នកដឹងទេ? ពេលខ្ញុំដឹកនាំក្លិបនៅលីគកំពូលចិន ក្លិបខ្លះលេងក្នុងពាន AFC Champions League មានគុណភាពមិនលើសក្លិបកម្ពុជាយើងប៉ុន្មានទេ។ ក្លិបខ្លះប្រហាក់ប្រហែលឬទាបជានៅកម្ពុជាក៏មាន»។

«ខ្ញុំគិតថា AFC គួរពិនិត្យ ពិចារណាមើលពីលីគកម្ពុជា ក្លិបបាល់ទាត់កម្ពុជាដើម្បីវាយតម្លៃ។ ក្លិបនៅលីគកម្ពុជាមួយចំនួនមានគុណភាពខ្ពស់ដែលអាចប្រកួតប្រជែងនៅកម្រិត AFC Cup បាន។ ប្រទេសខ្លះមានកៅមួយឬពីរលេងនៅ AFC Cup តែកម្រិតលីគរបស់ពួកគេអន់ជាងលីគកម្ពុជាទៀត។ អីចឹងខ្ញុំគិតថា កម្ពុជាគួរទទួលបានហោចណាស់ក៏២កៅអីដែរនៅវគ្គចែកពូល AFC Cup»។

លោកគ្រូបង្វឹកព្រះខ័នរាជស្វាយរៀងបានបន្ថែមថា ឥឡូវនេះភ្នំពេញក្រោនជាក្លិបតំណាងឲ្យកម្ពុជាកំពុងធ្វើបានល្អនៅពានរង្វាន់ AFC Cup។ ប្រសិនបើក្លិបនេះកាន់តែធ្វើបានល្អ និងបានឡើងទៅកាន់វគ្គបន្តទៀតនោះកាន់តែមានអត្ថប្រយោជន៍ដល់ក្លិបរបស់កម្ពុជានៅរដូវកាលក្រោយក្នុងពានរង្វាន់លំដាប់អាស៊ី។

នៅរដូវកាល២០២៣-២៤ សហព័ន្ធកីឡាបាល់ទាត់អាស៊ីបានផ្តល់ឲ្យក្លិបជើងឯកលីគកំពូលកម្ពុជាតែ២៥%នៃកន្លះកៅអីប៉ុណ្ណោះដើម្បីប្រកួតជម្រុះនៅតំបន់អាស៊ាន។ ជាក់ស្តែងភ្នំពេញក្រោនក្នុងនាមជាជើងឯកលីគកំពូលកម្ពុជាបានឈ្នះក្រុមជើងឯកឡាវទើបបានកន្លះកៅអីឡើងទៅប្រកួតខ្វែងដើម្បីដណ្តើមកៅអីជាមួយក្រុមសិង្ហបុរីទើបបាន១កៅអីឡើងទៅវគ្គចែកពូលក្នុងពានរង្វាន់ AFC Cup។

នៅវគ្គសន្សំពិន្ទុក្នុងពូល ភ្នំពេញក្រោន បានឈ្នះក្រុមជើងឯកមីយ៉ាន់ម៉ា Shan United ដែលជាក្រុមមានកៅអីនៅវគ្គចែកពូលស្រាប់ដោយលទ្ធផល ៤-០ និងបន្តឈ្នះក្រុមជើងឯកហ្វីលីពីន DH Cebu ដែលទទួលបានកៅអីនៅវគ្គចែកពូលស្រាប់ដោយលទ្ធផល 0-៣ មុនពេលបន្តឈ្នះក្រុមខ្លាំងរបស់អូស្ត្រាលី ដោយលទ្ធផល ៣-០ ទៀត។

តាមរយៈលទ្ធផលនេះបញ្ជាក់ឲ្យឃើញថា ក្រុមជើងឯកលីគកំពូលកម្ពុជាក្នុងនាមជាក្រុមឆ្លងកាត់វគ្គជម្រុះ២ដំណាក់កាលទើបឈានទៅដល់វគ្គចែកពូល ប៉ុន្តែនៅវគ្គចែកពូលបានយកឈ្នះក្រុមខ្លាំងមកពី៣ប្រទេសផ្សេងគ្នា។ ដូច្នេះក្លិបរបស់កម្ពុជាមានដូចជា ព្រះខ័នរាជស្វាយរៀង និងវិសាខាជាដើមគឺសុទ្ធតែខ្លាំងមិនចាញ់ភ្នំពេញក្រោនប៉ុន្មានឡើយដែលពួកគេស័ក្តិសមលេងនៅពានរង្វាន់លំដាប់អាស៊ីដែរ ប្រសិនបើមានកៅអី៕