ទីបំផុត! ក្រុមឧទ្ទាម ELN ដោះលែងឪពុករបស់ខ្សែប្រយុទ្ធ Luis Diaz ដោយសុវត្ថិភាព

រដ្ឋាភិបាលកូឡុំប៊ីនិយាយថា ក្រុមឧទ្ទាមកងទ័ពរំដោះជាតិ (ELN) បានដោះលែងឪពុករបស់កីឡាករបាល់ទាត់ Liverpool ខ្សែប្រយុទ្ធ Luis Diaz ហើយ បន្ទាប់ពីចាប់កាលពីជិត ២សប្តាហ៍មុន។

នៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ គណៈប្រតិភូកូឡុំប៊ីដែលកំពុងចរចាជាមួយ ELN ក្នុងការស្វែងរកកិច្ចព្រមព្រៀងសន្តិភាពបានស្វាគមន៍ការដោះលែងលោក Luis Manuel Diaz ប៉ុន្តែបាននិយាយថាការចាប់ជំរិតរបស់គាត់ “មិនគួរកើតឡើងទេ” ។

ប៉ុស្តិ៍ទូរទស្សន៍ក្នុងស្រុកបានបង្ហាញពីឪពុករបស់ Diaz នៅលើអាកាសយានដ្ឋាន ក្នុងទីក្រុង Valledupar កាលពីថ្ងៃព្រហស្បតិ៍ បន្ទាប់ពីបានចេញពីឧទ្ធម្ភាគចក្រ។ ខ្សែប្រយុទ្ធក្រុមបាល់ទាត់ជម្រើសជាតិកូឡុំប៊ី និងលេងឱ្យក្លិបហង្សក្រហម Liverpool បានអង្វរអ្នកចាប់ជំរិតឱ្យដោះលែងឪពុករបស់ខ្លួន ដែលត្រូវបានចាប់ធ្វើជាចំណាប់ខ្មាំងដោយការបាញ់ប្រហារនៅភាគខាងជើងប្រទេសកូឡុំប៊ី កាលពីថ្ងៃទី៣១ ខែតុលា។

ភរិយារបស់លោក Manuel Diaz ឈ្មោះ Cilenis Marulanda ក៏ត្រូវបានចាប់ធ្វើជាចំណាប់ខ្មាំងផងដែរ ប៉ុន្តែត្រូវបានជួយសង្គ្រោះជាច្រើនម៉ោងក្រោយមក។ រដ្ឋាភិបាលកូឡុំប៊ីបានដាក់សម្ពាធ​លើ​ក្រុម​ ELN ឱ្យដោះលែងលោក Manuel Diaz ដែលការចាប់​របស់ពួកគេបានកំណត់ឡើងវិញនូវកិច្ចខិតខំប្រឹងប្រែងដើម្បីចរចាសន្តិភាពយូរអង្វែងជាមួយក្រុមឧទ្ទាម។

បទឈប់បាញ់រយៈពេលប្រាំមួយខែរវាងរដ្ឋាភិបាល និង ELN ត្រូវបានមកដល់នៅក្នុងខែសីហា ខណៈ​ប្រទេសកូឡុំប៊ីព្យាយាមផ្លាស់ទីឆ្ងាយពីវិធីសាស្រ្តដែលផ្តោតលើយោធាចំពោះក្រុមប្រដាប់អាវុធដូចជា ELN ដែលបានជួយបញ្ឆេះជម្លោះស៊ីវិលដែលបានសម្លាប់មនុស្សជាង ៤៥០,០០០នាក់ក្នុងរយៈពេលជាង ៦០ឆ្នាំ។

ប្រធានាធិបតីកូឡុំប៊ី លោក Gustavo Petro ដែលនៅតែប្តេជ្ញាចិត្តចំពោះយុទ្ធសាស្ត្រស្វែងរកសន្តិភាពទាំងស្រុង បាននិយាយនៅក្នុងការបង្ហោះប្រព័ន្ធផ្សព្វផ្សាយសង្គមបន្ទាប់ពីការដោះលែងលោក Manuel Diaz ថា “ជយោសន្តិភាព និងសេរីភាព” ។

សេចក្តីថ្លែងការណ៍របស់រដ្ឋាភិបាលបាននិយាយថា ចំណាប់ខ្មាំងដែលនៅសេសសល់ទាំងអស់ដែលត្រូវបានឃុំខ្លួនដោយ ELN ត្រូវតែត្រូវបានដោះលែង ប៉ុន្តែវាមិនបានផ្តល់ការប៉ាន់ស្មានថាតើមានមនុស្សប៉ុន្មាននាក់ដែលកំពុងត្រូវបានឃុំខ្លួននៅឡើយ៕

ប្រែសម្រួល៖ មន្នីរ័ត្ន