លោក វ៉ាត់ ចំរើន ជំរុញឲ្យសម្ព័ន្ធកីឡាយូដូកម្ពុជាធ្វើបដិវត្តកម្មឌីជីថល

វគ្គសិក្សា​សាមគ្គីអូឡាំពិកស្ដីពីគ្រូបង្វឹកកីឡាយូដូ កម្រិតថ្នាក់ជាតិកម្រិត​២ (Judo Level 2) បាន​បិទ​បញ្ចប់​កាល​ពី​រសៀល​ថ្ងៃ​ទី​១២ ខែ​មិថុនា ឆ្នាំ​២០២៤ នៅ​ទី​ស្នាក់​ការ​គណៈកម្មាធិការ​ជាតិ​អូឡាំពិក​កម្ពុជា បន្ទាប់​ពី​បាន​បើក​​តាំងពីថ្ងៃទី៥ ខែមិថុនា។

ក្នុងពិធីបិទវគ្គសាមគ្គីអូឡាំពិកស្ដីពីឡគ្រូបង្វឹកកីឡាយូដូ កម្រិតថ្នាក់ជាតិ លោក លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការ​នៃ​គណៈកម្មាធិការជាតិអូឡាំពិកកម្ពុជា​ បានជំរុញឲ្យសហព័ន្ធកីឡាយូដូកម្ពុជា ធ្វើបដិវត្តកម្មឌីជីថល។ ការ​ផ្ដោតសំខាន់លើការពង្រឹងការផ្សព្វផ្សាយបែបឌីជីថល នៅលើប្រព័ន្ធបណ្ដាញសង្គមឲ្យមានភាពទូលំទូលាយ ដើរទាន់សម័យបច្ចេកវិទ្យា​បច្ចុប្បន្ន ដើម្បីឲ្យប្រជាជានកម្ពុជាបានស្គាល់ និង​យល់ដឹងពីកីឡាយូដូឲ្យកាន់តែច្បាស់។

នៅពេលសហព័ន្ធធ្វើការផ្សព្វផ្សាយពីព័ត៌មាន និងសកម្មភាពកីឡាយូដូបានទូលំទូលាយ ជាកត្តាមួយបង្កភាពងាយស្រួលដល់ជនជាតិខ្មែរ និងជនបរទេស ដែលមានបំណងចង់ហ្វឹកហាត់លក្ខណៈអាជីព និង​សុខភាព​ដែល​ងាយស្រួលក្នុងការស្វែងរកព័ត៌មានក៏ដូចជាទីកន្លែងហ្វឹកហាត់។

លោក វ៉ាត់ ចំរើន បាននិយាយថា ៖«យើងគួរនាំគ្នាធ្វើបដិវត្តកម្មឌីជីថល ដើម្បីរួមគ្នាផ្សព្វផ្សាយពីកីឡាយូដូររបស់យើង ក្នងនាមជាសហព័ន្ធ។ លោកគ្រូ អ្នកគ្រូទាំងអស់ គូរតែព្យាយាមបង្ហោះសកម្មភាពកីឡាយូដូជាប្រចាំថ្ងៃយ៉ាងតិច​មួយ​ក្នុងមួយថ្ងៃ។ ជាពិសេសសកម្មភាពប្លែកៗរួមមាន តិចនិក បច្ចេកទេស ក្នុងទំព័រហ្វេកបុករបស់សហព័ន្ធកីឡាយូដូកម្ពុជា»។

លោក វ៉ាត់ ចំរើន បានសង្កត់ធ្ងន់ថា ៖«យើងជាសកម្មជនក្នុងវិស័យយូដូ ប៉ុន្តែយើងអត់ចេះពីរបៀបផ្សាយធ្វើយ៉ាងមិចទាក់ទាញដើម្បីឲ្យមហាជនស្គាល់ពីយូដូនេះ។ ដូច្នេះយើងត្រូវជួយគ្នា មានព័ត៌មាន​យើងត្រូវបង្ហោះចែករំលែក ពីព្រោះមានជនបរទេសមួយចំនួនដែលមកកម្ពុជា តែងតែសួរថាកីឡាយូដូគេហាត់នៅទីណា។ ពួកគេចង់ទៅហាត់​ដើម្បី​សុខភាព​។ ពេលយើងផ្សព្វផ្សាយព័ត៌មានច្រើន នោះវាបង្កភាពងាយស្រួលដល់ពួកគេ។ នៅពេលពួកគេចូលហាត់យើងនឹងទទួលបានបទពិសោធ និងចែករំលែកចំណេះដឹងឲ្យគ្នាទៅវិញទៅមក»។

សូម​បញ្ជាក់​ថា វគ្គ​បណ្តុះ​បណ្តាល សាមគ្គីអូឡាំពិកស្ដីពីគ្រូបង្វឹកកីឡាយូដូ កម្រិតថ្នាក់ជាតិកម្រិត​២ មាន​សិក្ខាកាម​ចំនួន​​២០​នាក់​បាន​ចូល​រួម​សិក្ខា។ ជា​លទ្ធផល​នៃ​ការ​សិក្សា សិក្ខាកាម​១៥​នាក់ ក្នុង​នោះ​មាន​នារី​៦​នាក់​ទទួល​បាន​និទ្ទេស​ល្អ ខណៈ​៣​នាក់​ទទួល​បាន​និទ្ទេស​មធ្យម និង​២​នាក់​ទទួល​បាន​និទ្ទេស​មធ្យម៕

លទ្ធផលក្រោយបញ្ចប់វគ្គសាមគ្គីអូឡាំពិកស្ដីពីឡគ្រូបង្វឹកកីឡាយូដូ កម្រិតថ្នាក់ជាតិ
-និទ្ទេសល្អ ចំនួន១៥នាក់ (ស្រី៦នាក់)
-និទ្ទេសល្អបង្គួរ ចំនួន៣នាក់ (ស្រី២នាក់)
-និទ្ទេសមធ្យម ចំនួន ២នាក់ (ស្រី១នាក់)

អត្ថបទ៖ ផា រតនា