កីឡា

លោកគ្រូ Koji នឹងដាក់កីឡាករថ្មីច្រើនប៉ះហុងកុង ល្ងាចនេះ

បានផុស

៦ ខែ មុន

នៅ

ថ្ងៃអង្គារ ១៥ តុលា ២០២៤

ដោយ

លោកគ្រូបង្វឹក Koji Gyotoku អាចនឹងប្រើប្រាស់កីឡាករថ្មីច្រើនសម្រាប់ជំនួបមិត្តភាពអន្តរជាតិជាមួយម្ចាស់ផ្ទះ ហុងកុង វេលាម៉ោង៦ល្ងាច ថ្ងៃទី១៥ ខែតុលា ឆ្នាំ២០២៤ នៅទឹកដីហុងកុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីដឹកនាំការប្រកួតផ្លូវការដំបូងទទួលបានជ័យជម្នះលើ ឆាយនីស តៃប៉ិ ដោយលទ្ធផល ៣-២ កាលពីថ្ងៃទី១១ ខែតុលា លោក Koji Gyotoku ត្រូវដឹកនាំសម្រាប់ការប្រកួតមិត្តភាពអន្តរជាតិជាលើកទី២ដែលត្រូវបានមហាជនចាប់អារម្មណ៍ពីចិត្តសាស្ត្ររៀបចំក្រុមរបស់លោក។

លោកបាននិយាយក្នុងសន្នីសីទសារព័ត៌មានថា ការដឹកនាំរបស់លោកទើបបានរយៈពេលខ្លី ដូច្នេះលោកមិនទាន់គិតដល់លើការបង្កើតទស្សនវិទូនៃការលេង ឬស្ទីលលេងប្រចាំក្រុមនៅឡើយទេ។ អ្វីដែលលោកគិតជាចម្បងនៅពេលនេះគឺធ្វើយ៉ាងណាឲ្យកីឡាករមានជំនឿលើខ្លួនឯង និងហ៊ានលេងដោយមិនខ្លាចញញើត ទោះជាដៃគូខ្លាំងកម្រិតណាក៏ដោយ។

ក្រោយចប់ការប្រកួតជាមួយ ឆាយនីស តៃប៉ិ លោក Koji Gyotoku បានមើលឃើញពីចំណុចខ្វះខាតមួយចំនួនដែលជះឥទ្ធិពលមិនល្អដល់ទម្រង់លេង។ ទី១ កីឡាករមិនជឿជាក់លើខ្លួនឯងដែលជាហេតុធ្វើឲ្យប៉ះពាល់ដល់ទម្រង់លេង និងទី២ កីឡាករមិនទាន់ជឿជាក់លើគ្រូបង្វឹកថ្មី។ ចំណុចទាំងនេះហើយដែលលោកត្រូវការអភិវឌ្ឍបំផុតដើម្បីបង្កើនទំនុកចិត្តសម្រាប់ការប្រកួតបន្ទាប់ៗ។

លទ្ធផលគឺជារឿងសំខាន់ហើយ ប៉ុន្តែលោក Koji Gyotoku ទំនងជាផ្តោតលើទម្រង់លេង និងទំនុកចិត្តរបស់ក្រុមទាំងមូលច្រើនជាង។ ក្នុងសន្និសីទសារព័ត៌មានមុនការប្រកួត លោកបានលើកឡើងថា លោកនឹងប្រើប្រាស់កីឡាករថ្មីៗឲ្យបានច្រើនដើម្បីបង្កើនទំនុកចិត្ត បទពិសោធ និងជឿជាក់លើខ្លួនឯង។

ការប្រើប្រាស់កីឡាករថ្មីឲ្យចូលលេងច្រើនសម្រាប់ការប្រកួតបន្ទាប់ មិនមែនជារឿងថ្មីសម្រាប់លោក Koji Gyotoku នោះទេ។ ជាក់ស្តែង លោកបានដឹកនាំ ក្រុម U20 កម្ពុជា ទទួលបានជ័យជម្នះ ៤-១ លើនេប៉ាល់ ក្នុងពានរង្វាន់ AFC U20 Asian Cup កាលពីខែកញ្ញាកន្លងទៅសម្រាប់ការប្រកួតដំបូង ប៉ុន្តែការប្រកួតទី២ លោកបានដាក់កីឡាករថ្មីជាងពាក់កណ្តាលក្នុងជម្រើស១១នាក់ដំបូងទល់នឹងក្រុមអ៊ូបេគីស្ថាន ដែលចាញ់ ០-៧។ យ៉ាងណា ការប្រកួតទី៣ លោកបានប្រើប្រាស់កីឡាករផ្សេងទៀតដែលបានយកឈ្នះ បារ៉ែន ១-០។

ការប្រកួតមិត្តភាពអន្តរជាតិ២លើកនេះគឺមិនគ្រប់គ្រាន់សម្រាប់លោកត្រៀមខ្លួនប្រកួត AFF Championship នាចុងឆ្នាំនេះទេ ដូច្នេះហើយលោកចង់ឲ្យសហព័ន្ធកីឡាបាល់ទាត់កម្ពុជារៀបចំឲ្យមានការប្រកួតមិត្តភាពមួយឬពីរប្រកួតបន្តទៀត ជាពិសេសគឺចង់ជួបដៃគូខ្លាំងជាងខ្លួន។