កីឡា

ត្រឹមជាង១ឆ្នាំ កីឡាករគុនខ្មែរ៩រូបឈ្នះរង្វាន់រថយន្តថ្មី

បានផុស

៣ ខែ មុន

នៅ

ថ្ងៃពុធ ២២ មករា ២០២៥

ដោយ

កីឡាករ កីឡាការិនីគុនខ្មែរកាន់តែមានជីវភាពធូរធារតាមរយៈការឡើងប្រកួតដែលមានតម្លៃខ្លួនខ្ពស់ ប្រាក់រង្វាន់ច្រើន និងប្រាក់ឧបត្ថម្ភផ្សេងៗ។ កីឡាករ កីឡាការិនីជាច្រើនបានកំពុងកសាងផ្ទះថ្មី ទិញសម្ភារប្រើប្រាស់ល្អ ម៉ូតូ និងរថយន្តតាមរយៈអាជីពឈឺខ្លួនមួយនេះដែលកំពុងរីកចម្រើននាពេលបច្ចុប្បន្ន។

បើនិយាយកីឡាករដែលឡើងប្រកួតទទួលបានរង្វាន់គឺស្ទើរតែនឹកស្មានមិនដល់ក្នុងរយៈប្រមាណជាងមួយឆ្នាំចុងក្រោយ។ កីឡាករ៩នាក់ទទួលបានរង្វាន់រថយន្តតាមរយៈការឡើងប្រកួត។

ពេជ្រ សម្បត្តិ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពេជ្រ សម្បត្តិ ទទួលបានរង្វាន់រថយន្តថ្មី១គ្រឿង បន្ទាប់ពីទទួលបានប្រជាប្រិយភាពជាងគេក្នុងចំណោមបេក្ខភាព៤រូបដែលបានចូលរួមប្រកួតកាលពីឆ្នាំ២០២៣។

ធឿន ធារ៉ា

អ្នកលេងពូថៅដៃ ធឿន ធារ៉ា ទទួលបានរង្វាន់រថយន្តថ្មី១គ្រឿង បន្ទាប់ពីបានក្លាយជាម្ចាស់ខ្សែក្រវាត់ក្នុងព្រឹត្តិការណ៍ប្រកួត 8 Men Tournament ដោយរូបគេបានយកឈ្នះដៃគូ៣នាក់ក្នុងមួយរាត្រី កាលពីចុងឆ្នាំ២០២៣។

អេ អាំម៉ារីនភូថង

កូនប្រុសរបស់លោកគ្រូ អេ ភូថង ទទួលបានរង្វាន់រថយន្តថ្មី១គ្រឿង បន្ទាប់ពីបានក្លាយជាបេក្ខភាពផ្តួលដៃគូបានលឿនជាងគេក្នុងចំណោមកីឡាករដែលមានឈ្មោះប្រកួតនៅប្រទេសអូស្ត្រាលី កាលពីចុងឆ្នាំ២០២៣។

លន បញ្ញា

កីឡាករសំបូរក្បាច់ លន បញ្ញា បានផ្តួលមិត្តរួមជាតិ មឿន សុខហ៊ុច ក្នុងទឹកទី២ ដើម្បីក្លាយជាម្ចាស់រង្វាន់រថយន្តថ្មី១គ្រឿង បន្ទាប់ពីជុំទី១បានផ្តួលដៃគូបរទេសកាលពីថ្ងៃទី១៤ ខែធ្នូ ឆ្នាំ២០២៣។

ឃីម បូរ៉ា

ឃីម បូរ៉ា បានផ្តួលដៃគូនៅជុំទី១ជាកីឡាករបរទេស និងបានឡើងទៅវគ្គផ្តាច់ព្រ័ត្រដើម្បីយកឈ្នះមិត្តរួមជាតិ សាន់ គុនខ្មែរ ទទួលបានរង្វាន់រថយន្តថ្មី១គ្រឿង កាលពីខែតុលា ឆ្នាំ២០២៣។

បឺត សង្ឃឹម

នៅជុំទី១ បឺត សង្ឃឹម បានផ្តួលកីឡាករថៃឲ្យសន្លប់ក្នុងទឹកទី១ និងបានបន្តផ្តួលមិត្តរួមជាតិ វ៉ាន់ វឿន ក្នុងទឹកទី១ វគ្គផ្តាច់ព្រ័ត្រ ដើម្បីទទួលបានរង្វាន់រថយន្តថ្មី១គ្រឿង នៅថ្ងៃទី១៧ ខែសីហា ឆ្នាំ២០២៤។

ចាន់ ប៊ុនហឿន

ជាថ្មីម្តងទៀត មឿន សុខហ៊ុច ទទួលបានឱកាសប្រកួតដណ្តើមរង្វាន់រថយន្តជាលើកទី២ ប៉ុន្តែរូបគេនៅតែធ្វើមិនបានសម្រេចដោយបានចាញ់មិត្តរួមជាតិ ចាន់ ប៊ុនហឿន ដោយពិន្ទុក្នុងវគ្គផ្តាច់ព្រ័ត្រ។ ដូច្នេះ ចាន់ ប៊ុនហឿន បានក្លាយជាម្ចាស់រថយន្តថ្មី។

ហង្សសុវណ្ណ ចាន់សុធី

អ្នកប្រដាល់ ហង្សសុវណ្ណ ចាន់សុធី មិនស្ថិតនៅក្នុងក្រសែភ្នែកមហាជនទេក្នុងចំណោមបេក្ខភាពបេក្ខភាពទាំង៨រូប ប៉ុន្តែរូបគេបានបង្កការភ្ញាក់ផ្អើល។ នៅជុំទី១ រូបគេបានផ្តួល ផន លីហួរ ក្នុងទឹកទី១ និងផ្តួលមិត្តរួមជាតិ ឡុង ជិន ទឹកទី១ ក្នុងវគ្គពាក់កណ្តាលផ្តាច់ព្រ័ត្រ។ នៅវគ្គផ្តាច់ព្រ័ត្រ រូបគេបានផ្តួល ពុធ សំបូរ ក្នុងទឹកទី៥ដើម្បីក្លាយជាម្ចាស់រថយន្តថ្មី។

ពុធ សំបូរ

បន្ទាប់ពីបរាជ័យលើកទី១ ពុធ សំបូរ មិនបានធ្វើឲ្យឱកាសប្រកួតដណ្តើមរថយន្តលើកទី២កន្លងហួសឡើយ។ នៅជុំទី១ រូបគេបានផ្តួល ទូត ដេវីត ឲ្យសន្លប់ក្នុងទឹកទី១ និងវគ្គផ្តាច់ព្រ័ត្របានផ្តួល ស៊ន រ៉ាគីម ក្នុងទឹកទី២ កាលពីថ្ងៃទី១៩ ខែមករា ឆ្នាំ២០២៥ ដើម្បីក្លាយជាម្ចាស់រថយន្តថ្មី៕

អត្ថបទ៖ វីរបុត្រ

Related Topics:កីឡាប្រដាល់គុនខ្មែរ