មុនដល់វេនកម្ពុជា បារ៉ែន ធ្វើជាម្ចាស់ផ្ទះកីឡាយុវជនអាស៊ី តាមពេលកំណត់

ប្រទេសបារ៉ែន កំពុងរៀបចំធ្វើជាម្ចាស់ផ្ទះ ព្រឹត្តិការណ៍កីឡាយុវជនអាស៊ី លើកទី៣ (Asian Youth Games) ពីថ្ងៃ​ទី​២២-៣១ ខែតុលា ឆ្នាំ២០២៥ ដោយប្រមូលផ្តុំអត្តពលិកវ័យក្មេងជាង ២០០០នាក់ មានអាយុចន្លោះពី ១៤-១៧ឆ្នាំ មកពី ៤៥ប្រទេស។ ការប្រកាសនេះត្រូវបានធ្វើឡើងក្នុងអំឡុងពេលពិធីដ៏ធំមួយនៅសណ្ឋាគារ Ritz-Carlton ក្នុងទីក្រុង Manama ជាកន្លែង​និមិត្តសញ្ញាផ្លូវការត្រូវបានបង្ហាញ។

ត្រូវត្រៀមរៀបចំឡើងក្នុងរយៈពេលតិចជាងមួយឆ្នាំ បន្ទាប់ពីការដកខ្លួនពីម្ចាស់ផ្ទះអ៊ូសបេគីស្ថាន ព្រឹត្តិការណ៍នេះនឹងមាន ២១​ប្រភេទកីឡា ស្មើ​នឹង​វិញ្ញាសាចំនួន២០៧។ លោក Faris Mustafa Alkooheji អគ្គលេខាធិការគណៈកម្មាធិការអូឡាំពិកបារ៉ែន បានបញ្ជាក់ពីការចូលរួមរបស់កីឡាករ-កីឡាការិនី ចំនួន ៩៤នាក់ និងកីឡាការិនីចំនួន ៩២នាក់ ព្រមទាំងវិញ្ញាសាចម្រុះផងដែរ។ ទីតាំងប្រកួតនានានឹងរួមបញ្ចូលទីតាំងល្បីៗដូចជា Khalifa Sports City, Bahrain International Circuit និង Royal Golf Club។

ថ្លែងក្នុងពិធីនោះ ព្រះអង្គម្ចាស់ Shaikh Khalid bin Hamad Al Khalifa អនុប្រធានទីមួយនៃឧត្តមក្រុមប្រឹក្សាសម្រាប់យុវជន និងកីឡា (SCYS) ប្រធានអាជ្ញាធរកីឡា​ (GSA) និងជាប្រធានគណៈកម្មាធិការអូឡាំពិកបារ៉ែន (BOC) បានគូសបញ្ជាក់អំពីសារៈសំខាន់នៃការប្រកួតនេះ ជាវេទិកាមួយដើម្បីបង្ហាញពីសម្ភារៈបរិក្ខា​លំដាប់ពិភពលោក និងការប្តេជ្ញាចិត្តរបស់បារ៉ែនចំពោះយុវជន និងកីឡា។

ទ្រង់បានមានរាជបន្ទូលថា ៖«ការប្រកួតកីឡាយុវជនអាស៊ីផ្តល់នូវឱកាសដ៏មានតម្លៃក្នុងការលើកកម្ពស់ការយល់ដឹងអំពីសម្ភារៈបរិក្ខា​ដែលមាននៅក្នុងប្រទេសបារ៉ែន»។ ដោយសង្កត់ធ្ងន់លើការប្តេជ្ញាចិត្តរបស់ប្រទេសក្នុងការជំរុញទំនាក់ទំនងស្ថិរភាពនៅទូទាំងអាស៊ី។

រូបសញ្ញាដែលមានរាងជាភ្លើងដែលទើបនឹងបង្ហាញនេះរួមបញ្ចូលអក្សរអារ៉ាប់សម្រាប់ “បារ៉ែន” ជាមួយនឹងភ្លើងអូឡាំពិក និង​និមិត្តសញ្ញាព្រះអាទិត្យ Asian Games ដែលជានិមិត្តរូបនៃការរួបរួម មហិច្ឆតា និងការរួមបញ្ចូល។ ការរចនានេះឆ្លុះបញ្ចាំងពីស្មារតីនៃភាពជាកីឡា និងរំលេចអត្តសញ្ញាណជាតិរបស់ប្រទេសបារ៉ែនតាមរយៈពណ៌ក្រហមដិតរបស់វា។

ត្រឹមតែប៉ុន្មានខែប៉ុណ្ណោះក្នុងការត្រៀមខ្លួន បារ៉ែនបានឈានដល់ការប្រជែង។ លោក Alkooheji បានកត់សម្គាល់ថា ៖«បារ៉ែនមិនត្រឹមតែជាអ្នករត់ប្រណាំងប៉ុណ្ណោះទេ ប៉ុន្តែជាអ្នករត់ប្រណាំងដែលមានកម្លាំងខ្លាំង» ដែលបញ្ជាក់ពីការត្រៀមខ្លួនរបស់ប្រទេសជាតិក្នុងការផ្តល់នូវព្រឹត្តិការណ៍។

លោកបណ្ឌិត Husain Al Musallam អគ្គនាយកក្រុមប្រឹក្សាអូឡាំពិកអាស៊ី (OCA) បានកោតសរសើរចំពោះការរីកចម្រើនយ៉ាងឆាប់រហ័សរបស់ប្រទេសបារ៉ែន ដោយមានប្រសាសន៍ថា ៖«OCA មានទំនុកចិត្តពេញលេញលើប្រទេសបារ៉ែនក្នុងការធ្វើជាម្ចាស់ផ្ទះព្រឹត្តិការណ៍កីឡាចម្រុះដ៏ធំដូចជា ព្រឹត្តិការណ៍កីឡាយុវជនអាស៊ីនេះ»។

ស្របជាមួយនឹងការប្រកួត ព្រឹត្តិការណ៍កីឡាអូឡាំពិកយុវជន ឆ្នាំ២០២៦ នៅទីក្រុងដាកា ព្រឹត្តិការណ៍កីឡាយុវជនអាស៊ីលើកទី៣ គឺជាព្រឹត្តិការណ៍ដ៏សំខាន់មួយក្នុងការអភិវឌ្ឍន៍កីឡានៅក្នុងប្រទេសបារ៉ែន និងតំបន់អាស៊ីដ៏ធំទូលាយ។

សូមបញ្ជាក់ថា ក្រោយចប់ព្រឹត្តិការណ៍ខាងលើ នៅឆ្នាំ២០២៩ កម្ពុជានឹងធ្វើជាម្ចាស់ផ្ទះវិញម្ដង សម្រាប់ព្រឹត្តិការណ៍កីឡាយុវជនអាស៊ី លើកទី៤ ដែលជាលើកដំបូងផងដែរសម្រាប់ព្រះរាជាណាចក្រយើង គ្រា​បច្ចុប្បន្ន គណៈកម្មាធិការជាតិអូឡាំពិកកម្ពុជា កំពុងត្រៀមខ្លួនជាមួយព្រឹត្តិការណ៍ជាប្រវត្តិសាស្ត្រថ្មីមួយទៀតនេះ បន្ទាប់ពីស៊ីហ្គេម ឆ្នាំ២០២៣៕

ប្រែសម្រួល ៖ មន្នីរ័ត្ន
ប្រភព៖ Inside The Games