កីឡា
អ្នកចាំទីឆ្នើម ជា ហ្វារីយ៉ា ដាក់គោលដៅទៅលេងនៅជប៉ុន
អ្នកចាំទីដៃទី១របស់ក្រុមបាល់ទាត់នារីជម្រើសជាតិកម្ពុជា និងក្រុមនារីភ្នំពេញក្រោន ជា ហ្វារីយ៉ា បានដាក់គោលដៅទៅលេងបាល់ទាត់នៅប្រទេសជប៉ុនដើម្បីប្រកួតប្រជែងនៅក្នុងកម្រិតខ្ពស់។

ជា ហ្វារីយ៉ា ដែលទើបតែបានជួយភ្នំពេញក្រោនឈ្នះជើងឯកលីគនារីកម្ពុជារដូវកាល២០២៤-២៥ បានប្រាប់សារព័ត៌មាន«កម្ពុជាថ្មី»ថា ៖«ខ្ញុំសូមអបអរសាទរសម្រាប់កីឡាការិនីកម្ពុជាយើង២នាក់បានទៅលេងនៅថៃ ពីព្រោះកីឡាបាល់ទាត់នារីនៅថៃក៏មានការប្រកួតប្រជែងខ្ពស់ដែរ។ លីគគេមានគុណភាព ហើយក៏ចង់ឃើញកីឡាការិនីផ្សេងៗទៀត តាមបណ្តាក្លិប ឬតាមខេត្តផ្សេងអាចទៅលេងនៅក្រៅប្រទេស មិនថៃ ឡាវ ឬប្រទេសណាទេ បើខ្លាំងទៅដល់ជប៉ុនទៀត»។
កាលពីដំបូងឡើយ ជា ហ្វារីយ៉ា បានដាក់គោលដៅទៅលេងត្រឹមតែប្រទេសថៃប៉ុណ្ណោះ ប៉ុន្តែបន្ទាប់ពីសមត្ថភាពកាន់តែរីកចម្រើនទាំងនៅក្លិប និងជម្រើសជាតិបានជំរុញឲ្យកីឡាការិនីរូបនេះដាក់គោលដៅរហូតដល់ប្រទេសជប៉ុន។

ជា ហ្វារីយ៉ា បានបញ្ជាក់ថា ៖«នេះជាគោលដៅដែលខ្ញុំដាក់ខ្លួនឯង។ ពេលខ្ញុំចាប់ផ្តើមលេងបាល់ដំបូង ខ្ញុំចង់ទៅលេងនៅថៃ។ តែឥឡូវនេះ ខ្ញុំដាក់ឲ្យខ្ពស់ជាងមុនគឺខ្ញុំចង់ទៅលេងនៅជប៉ុន ពីព្រោះខ្ញុំមើលឃើញដូច មិត្តរួមក្រុមរបស់ខ្ញុំគឺ Miki លេខ១៤។ គាត់មានគុណភាពលេងល្អ ហើយខ្ញុំចង់ទៅអភិវឌ្ឍខ្លួន និងប្រកួតប្រជែងនៅកន្លែងដែលមានកម្រិតខ្ពស់»។
អ្នកចាំទីដែលបានឈ្នះស្រោមដៃមាសប្រចាំព្រឹត្តិការណ៍លីគបាល់ទាត់កម្ពុជាបានឲ្យដឹងថា បច្ចុច្បន្ននេះ កម្ពុជាមានធនធានកីឡាការិនីដែលចូលចិត្តលេងបាល់ទាត់ ទាំងនៅភ្នំពេញ និងតាមបណ្តាខេត្ត ប៉ុន្តែពួកគាត់មិនសូវមានឱកាសបង្ហាញសមត្ថភាព។ ប្រសិនបើសហព័ន្ធកីឡាបាល់ទាត់កម្ពុជារៀបចំកម្មវិធីប្រកួតបាល់ទាត់សម្រាប់នារីកាន់តែច្រើនគឺកាន់តែល្អ។
ហ្វារីយ៉ា បាននិយាយថា ៖«តាមខ្ញុំមើលឃើញគឺមានធនធានកីឡាការិនីច្រើន តែពានបាល់ទាត់សម្រាប់នារីអត់មានច្រើនទេ។ ចង់ឲ្យបាល់ទាត់នារីយើងដើរទៅមុខកាន់តែខ្លាំង ខ្ញុំសូមសំណូមពរដល់ថ្នាក់ដឹកនាំបង្កើតពានឲ្យបានច្រើន។ មិនថាពានតូច ឬពានធំទេ គឺបង្កើតឲ្យច្រើនដើម្បីឲ្យកីឡាការិនីបានចូលរួមប្រកួតប្រជែង ហើយយើងអាចជ្រើសរើសកីឡាការិនីល្អៗសម្រាប់ជម្រើសជាតិ»។

«បើយើងអត់មានការប្រកួតប្រជែង យើងអត់ដឹងថា មានកីឡាការិនីណាខ្លះដែលគាត់មានទេពកោសល្យ។ ខ្ញុំចង់ឲ្យសហព័ន្ធផ្តោតទៅតាមខេត្ត ពីព្រោះខេត្តក៏មានកីឡាការិនីចូលចិត្តលេងបាល់ទាត់ដែរ។ ដូចជាខ្ញុំអីចឹងគឺជាអ្នកមកពីខេត្ត»។
ជា ហ្វារីយ៉ា បានជួយក្រុមបាល់ទាត់នារីកម្ពុជាទទួលបានចំណាត់ថ្នាក់លេខ២ក្នុងពានរង្វាន់ ASEAN Women’s Cup កាលពីចុងឆ្នាំ២០២៤ នៅប្រទេសឡាវ ដើម្បីទទួលបានកៅអីសម្រាប់ចូលរួមប្រកួតពានរង្វាន់លំដាប់ទី១ ASEAN Women’s Championship នៅឆ្នាំ២០២៥ និងត្រូវប្រកួតក្នុងកីឡាស៊ីហ្គេម លើកទី៣៣ នៅប្រទេសថៃ។ ជាមួយគ្នានេះ ក្រុមនារីភ្នំពេញក្រោន ក្នុងនាមជាជើងឯកលីគនារីកម្ពុជារដូវកាល២០២៤-២៥ នឹងតំណាងក្លិបកម្ពុជាដំបូងចូលរួមប្រកួតពានរង្វាន់អាស៊ី AFC Women’s Champions League៕


អត្ថបទ៖ វីរបុត្រ

-
ព័ត៌មានអន្ដរជាតិ៥ ថ្ងៃ ago
រថយន្តដឹកសិស្សចុះកម្មសិក្សានៅថៃ ក្រឡាប់ពេលចុះភ្នំ ស្លាប់១៧នាក់ របួសជាង៤០នាក់
-
ព័ត៌មានអន្ដរជាតិ១ សប្តាហ៍ ago
ចិន រកឃើញមេរោគស៊ីសួតថ្មី បង្កក្តីបារម្ភផ្ទុះជំងឺរាតត្បាត ដូច កូវីដ-១៩
-
ព័ត៌មានជាតិ៤ ថ្ងៃ ago
កូនប្រុសអភិបាលខណ្ឌ៧មករា ស្លាប់ទាំងវ័យក្មេង ដោយសារគាំងបេះដូង
-
សន្តិសុខសង្គម៦ ថ្ងៃ ago
បង្ក្រាបហាងផឹកស៊ីបង្កប់សេវាកម្មផ្លូវភេទមួយកន្លែងក្នុងមូលដ្ឋានខណ្ឌសែនសុខ ឃាត់ខ្លួននារីជាង២០នាក់
-
ព័ត៌មានអន្ដរជាតិ៧ ថ្ងៃ ago
ហ្សេលេនស្គី ផ្តាំទៅ ត្រាំ ថា អ៊ុយក្រែន មិនសងអាមេរិក ដាច់ខាត
-
សន្តិសុខសង្គម២ ថ្ងៃ ago
Update៖ អគ្គិភ័យឆេះនៅជិតស្ពានជ្រោយចង្វារ មានទារកពីរនាក់បាត់បង់ជីវិត
-
ព័ត៌មានជាតិ៦ ថ្ងៃ ago
ឯកឧត្តម ឌី វិជ្ជា ប្រាប់ទៅលោក សម រង្ស៊ី ថា ល្មមៗបានហើយ កម្ពុជា មានច្បាប់ត្រឹមត្រូវ មិនមែនធ្វើអ្វីស្រេចលើការនឹកឃើញទេ
-
ជីវិតកម្សាន្ដ១ សប្តាហ៍ ago
គ្រឿងអលង្ការរបស់កញ្ញា លីនដា បង្ហាញខ្លួននៅ Bvlgari ថ្ងៃមុន តម្លៃសរុបចូលដល់ខ្ទង់លានដុល្លារ