Pete Hegseth គំរាមរុស្ស៊ី ខ្លាំងៗ រឿងសង្គ្រាមនៅអ៊ុយក្រែន

លោក Pete Hegseth រដ្ឋមន្ត្រីសង្គ្រាមអាមេរិក បានគំរាមខ្លាំងៗទៅរុស្ស៊ី ដោយសារតែសង្គ្រាមនៅអ៊ុយក្រែន មិនឃើញមានសញ្ញានៃការថយកម្តៅសោះ។ នេះបើតាមការផ្សាយរបស់ RT កាលពីថ្ងៃពុធទី១៥ខែតុលាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងចេញពីមូលដ្ឋានកងទ័ពអាកាសអាមេរិក Ramstein ស្ថិតនៅតំបន់ Rhineland-Palatinate ភាគនិរតីប្រទេសអាល្លឺម៉ង់ លោក Hegseth គំរាមថា «ប្រសិនបើសង្គ្រាមនេះមិនចប់ទេ ហើយប្រសិនបើគ្មានផ្លូវទៅរកសន្តិភាពក្នុងរយៈពេលខ្លីទេនោះ សហរដ្ឋអាមេរិករួមជាមួយសម្ព័ន្ធមិត្ត នឹងចាត់វិធានការចាំបាច់ដើម្បីដាក់បន្ទុកលើរុស្ស៊ី ហើយប្រសិនបើយើងត្រូវតែចាំបាច់ចាត់វិធានការមែន ក្រសួងសង្គ្រាមអាមេរិក ត្រៀមខ្លួនរួចជាស្រេចដើម្បីបំពេញតួនាទីរបស់យើង តាមមធ្យោបាយដែលមានតែសហរដ្ឋអាមេរិកប៉ុណ្ណោះ ដែលអាចធ្វើបាន»។

ការគំរាមនេះកើតឡើងកើតឡើងប៉ុន្មានថ្ងៃប៉ុណ្ណោះ បន្ទាប់ពីប្រមុខសេតវិមាន ដូណាល់ ត្រាំ ព្រមានថា​ លោកនឹងបញ្ជូនមីស៊ីល Tomahawk ទៅឲ្យអ៊ុយក្រែន ប្រសិនបើសង្គ្រាមរបស់រុស្ស៊ី មិនបញ្ចប់ទេនោះ។

លោកប្រាប់អ្នកកាសែតថា «ខ្ញុំនឹងប្រាប់ទៅលោកពូទីនថា បើសង្គ្រាមមិនចប់ទេនោះ អ៊ុយក្រែននឹងទទួលបានមីស៊ីលរយៈចម្ងាយឆ្ងាយ Tomahawk ហើយ។ ខ្ញុំនឹងបញ្ជូនមីស៊ីលនេះឲ្យពួកគេ»។

មុននោះ លោកត្រាំ និងប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី ក៏ពិភាក្សាគ្នាតាមទូរសព្ទរួចហើយដែរ អំពីវិធី​បញ្ចប់ការឈ្លានពានរបស់រុស្ស៊ី ដោយក្នុង​នោះ​ការផ្គត់ផ្គង់​មីស៊ីល Tomahawk ​របស់​ក្រុង​វ៉ាស៊ីនតោន​ដល់អ៊ុយក្រែន ហាក់​ទំនងជា​អាច​កើត​មានឡើង។

សូមជម្រាបជាថ្មី មីស៊ីល Tomahawk រយៈចម្ងាយ២ ៥០០គីឡូម៉ែត្រមួយគ្រាប់តម្លៃ១.៣លានដុល្លារអាមេរិក គឺ​ផលិត​ដោយក្រុមហ៊ុន RTX របស់​សហរដ្ឋ​អាមេរិក ដែល​បាន​រចនា​ឡើង​ដើម្បី​វាយប្រហារ​គោលដៅលើ​ដីគោក​ដោយ​ភាពជាក់លាក់​ខ្ពស់។

ជាធម្មតា មីស៊ីលនេះផ្ទុកក្បាលគ្រាប់ទម្ងន់ ៤០០-៤៥០គីឡូក្រាម មានការផ្ទុះខ្លាំងអាចបំផ្លាញគោលដៅរឹងមាំ ឬបញ្ចេញគ្រាប់បែកចង្កោម ដើម្បីកម្ទេចសព្វាវុធសត្រូវ។

ប្រសិនបើបាញ់ចេញពីអ៊ុយក្រែន មីស៊ីល Tomahawk អាចហោះដល់គោលដៅគ្រប់កន្លែងនៅក្នុងប្រទេសរុស្ស៊ីផ្នែកខាងទ្វីបអឺរ៉ុប រួមទាំងរដ្ឋធានីមូស្គូផងដែរ៕

អត្ថបទ៖ សុខ សុវណ្ណ

ចុចអាន៖ រុស្ស៊ី គំរាមអាមេរិកថា៖ បើ Tomahawk ទៅដល់ដៃអ៊ុយក្រែន គ្រប់គ្នាអាចជួប «អវសានដ៏អាក្រក់» ជាពិសេស ត្រាំ