តម្លៃប្រេងប្រចាំសប្ដាហ៍អាចបន្តធ្លាក់ចុះ ជុំវិញកំណើនការផ្គត់ផ្គង់ និងភាពតានតឹងពាណិជ្ជកម្ម

តម្លៃប្រេងអន្តរជាតិ​បាន​ធ្លាក់ចុះសម្រាប់ការជួញដូរថ្ងៃសុក្រ ដែលជាថ្ងៃបិទការជួញដូរប្រចាំសប្ដាហ៍នេះ ចំពេលមាន​ភាពតានតឹងពាណិជ្ជកម្ម​ និង​ការរំពឹងទុកពីការផ្គត់ផ្គង់ និងដំណោះស្រាយបញ្ចប់សង្រ្គាម​អ៊ុយក្រែន។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។ ​

តម្លៃប្រេងឆៅនាពេលអនាគត ម៉ាក Brent បាន​ធ្លាក់ចុះ ៨ សេន ឬ ០,១៣ ភាគរយ ដល់ ៦០,៩៨ ដុល្លារ/បារ៉ែល គិតត្រឹមម៉ោង ៨ និង ៣០ នាទីព្រឹក នៅទីក្រុងហុងកុង។ នេះជាកម្រិតទាបបំផុតរាប់តាំងពីដើមខែមេសា នៅពេលតម្លៃប្រេងប្រេង Brent ធ្លាក់ចុះទាបក្រោម ៦០ ដុល្លារ/បារ៉ែល ជាលើកដំបូងរាប់តាំងពីខែកុម្ភៈ ឆ្នាំ ២០២១។

ចំណែកឯតម្លៃប្រេងអាមេរិក ម៉ាក West Texas Intermediate (WTI) វិញ​ បាន​ធ្លាក់ចុះ ៩ សេន ឬ ០,១៦ ភាគរយ ដល់ ៥៧,៣៧ ដុល្លារ/បារ៉ែល។ ​

ក្នុងអត្រាប្រចាំសប្ដាហ៍វិញ តម្លៃប្រេងទាំង ២ វិញ បាន​ធ្លាក់ចុះ ៣ ភាគរយ ទៅហើយ ដែលរួមចំណែកដោយ​ការរំពឹងទុករបស់​ទីភ្នាក់ងារថាមពលអន្តរជាតិ (IEA) ដែលថា ការផ្គត់ផ្គង់ប្រេងនៅឆ្នាំក្រោយ​នៅកើនឡើងច្រើន។ ​

ការធ្លាក់ចុះក៏រួមចំណែកផងដែរ ចំពេលដែល​ការរំខានផ្នែកផ្គត់ផ្គង់ធ្លាក់ចុះ ក្រោយ​បទឈប់បាញ់នៅតំបន់ហ្កាហ្សាចូលជាធរមាន​ ហើយជាមួយ​គ្នានោះ ប្រធានាធិបតីអាមេរិក លោក ដូណាល់ ត្រាំ និងសមភាគីរុស្ស៊ី លោក វ្ល៉ាឌីមៀរ ពូទីន បាន​ព្រមព្រៀងគ្នានៅប្រទេសហុងគ្រី ដើម្បីចរចាគ្នាបញ្ចប់សង្រ្គាម​នៅអ៊ុយក្រែន។

ក្រៅពីនេះ ភាព​តានតឹងនៃសង្រ្គាមពាណិជ្ជកម្ម​អាមេរិក-ចិន បាន​បង្កក្ដីបារម្ភជាថ្មីសម្រាប់សេដ្ឋកិច្ចសកល ដែលធ្វើឱ្យ​តម្រូវការប្រេងខ្សោយ ជាហេតុធ្វើឱ្យតម្លៃប្រេងបន្តធ្លាក់ចុះ៕