កម្ពុជារៀបចំពិព័រណ៍ម្ហូបអាហារ ភេសជ្ជៈ សណ្ឋាគារ និងបដិសណ្ឋារកិច្ចអន្តរជាតិរយៈពេល៣ថ្ងៃនៅកោះពេជ្រ

កម្ពុជាបានរៀបចំពិព័រណ៍ម្ហូបអាហារ ភេសជ្ជៈ សណ្ឋាគារ និងបដិសណ្ឋារកិច្ចអន្តរជាតិឆ្នាំ២០២៥(CAMFood & CAMHotel 2025”) រយៈពេល៣ថ្ងៃចាប់ពីថ្ងៃទី២២ដល់ថ្ងៃទី២៤ ខែតុលា ឆ្នាំ២០២៥ នៅមជ្ឈមណ្ឌលសន្និបាតនិងតាំងពិព័រណ៍កោះពេជ្រ រាជធានីភ្នំពេញ ក្រោមអធិបតីភាព លោក ហួត ហាក់ រដ្ឋមន្ត្រីក្រសួងទេសចរណ៍និងមានការចូលរួមពី តំណាងក្រសួងស្ថាប័នពាក់ព័ន្ធ តំណាងសភាពាណិជ្ជកម្មកម្ពុជានិងតាមបណ្តាខេត្ត វិស័យ ឯកជន អង្គការជាតិ អន្តរជាតិ និងភាគីពាក់ព័ន្ធជាច្រើនទៀត។

ថ្លែងបើកពិព័រណ៍ម្ហូបអាហារ ភេសជ្ជៈ សណ្ឋាគារ និងបដិសណ្ឋារកិច្ចអន្តរជាតិឆ្នាំ២០២៥ នៅព្រឹកថ្ងៃទី២២តុលានេះ លោក ហួត ហាក់ រដ្ឋមន្ត្រីក្រសួងទេសចរណ៍បានមានប្រសាសន៍ថា ព្រឹត្តិការណ៍នេះបានបង្កើតបរិយាកាសអំណោយផលខ្ពស់សម្រាប់អន្តរកម្មទីផ្សារសំខាន់ៗ និងផ្តល់ឱកាសសម្រាប់អ្នកវិនិយោគក្នុងស្រុក និងអន្តរជាតិក្នុងការបង្កើតបណ្តាញ និងចូលរួមពិភាក្សាជាមួយអ្នកជំនាញជាតិ និងអន្តរជាតិក៏ដូចជាលើកកម្ពស់កំណើនអាជីវកម្ម និងពង្រីកទីផ្សារក្នុងព្រះរាជាណាចក្រកម្ពុជា និងទូទាំងតំបន់អាស៊ីអាគ្នេយ៍។

លោកបានបន្តថា លើសពីនេះទៀតការរៀបចំពិព័រណ៍នេះនាំមកនូវឱកាសថ្មីសម្រាប់អ្នកផ្គត់ផ្គង់ និងអ្នកចែកចាយក្នុងស្រុក និងអន្តរជាតិ ដើម្បីជួបជាមួយអ្នកជំនាញមកពីឧស្សាហកម្មទេសចរណ៍ និងបដិសណ្ឋារកិច្ច រួមទាំងអ្នកផលិតអាហារ និងភេសជ្ជៈឈានមុខគេលំដាប់អន្តរជាតិផងដែរ។

លោក រដ្ឋមន្ត្រីបានបន្តថាតាមការលើកឡើងរបស់លោកឧកញ៉ា លឹម សុជាតិ និងតំណាងក្រុមហ៊ុន Informa Markets មានស្តង់លក់ទំនិញចន្លោះពី ២៥០ ទៅ ៣០០ស្តង់ មកពីប្រទេសចំនួន ៩ រួមមាន កម្ពុជា វៀតណាម ម៉ាឡេស៊ី សហរដ្ឋអាមេរិក ចិន សាធារណរដ្ឋកូរ៉េ អ៊ីតាលី ហ្វាំងឡង់ និងសិង្ហបុរីហើយព្រឹត្តិការណ៍នេះត្រូវបានគេរំពឹងថានឹងទាក់ទាញអ្នកចូលទស្សនាប្រហែល១២០០០នាក់។

លោករដ្ឋមន្ត្រីបានចាត់ទុក “ពិព័រណ៍ម្ហូបអាហារ ភេសជ្ជៈ សណ្ឋាគារ និងបដិសណ្ឋារកិច្ចអន្តរជាតិឆ្នាំ២០២៥នៅកម្ពុជា”ដើរតួជាព្រឹត្តិការណ៍ដ៏សំខាន់មួយ ដែលរួមចំណែកដល់ការការអភិវឌ្ឍប្រកបដោយចីរភាពនៃវិស័យទេសចរណ៍របស់កម្ពុជា តាមរយៈការផ្សារភ្ជាប់ទេសចរណ៍ប្រកបដោយប្រសិទ្ធភាពជាមួយពាណិជ្ជកម្ម និងពាណិជ្ជកម្ម។

លោករដ្ឋមន្ត្រីបានលើកឡើងទៀតថា ការរៀបចំព្រឹត្តិការណ៍ “CAMFood & CAMHotel 2025” បង្ហាញពីការប្តេជ្ញាចិត្តយ៉ាងមុតមាំរបស់គ្រប់ភាគីពាក់ព័ន្ធក្នុងការចូលរួមចំណែកក្នុងការអភិវឌ្ឍន៍វិស័យទេសចរណ៍របស់កម្ពុជា ជាពិសេសវិស័យឧស្សាហកម្ម MICE (Meeting, Incentive, Convention, Exhibition)។ ព្រឹត្តិការណ៍នេះជួយសម្រួលដល់អន្តរកម្មរវាងធុរកិច្ច និងធុរកិច្ចទាំងក្នុងស្រុក និងក្រៅស្រុក ដោយទាក់ទាញអ្នកវិនិយោគ និងម្ចាស់អាជីវកម្មអន្តរជាតិឱ្យស្វែងយល់ពីសក្តានុពលវិនិយោគក្នុងវិស័យទេសចរណ៍ និងបរិយាកាសអំណោយផលសម្រាប់ការវិនិយោគក្នុងខ្សែសង្វាក់ផ្គត់ផ្គង់ថ្មី។

លោករដ្ឋមន្ត្រីបានកោតសរសើរ និងវាយតម្លៃខ្ពស់ជាថ្មីម្តងទៀតចំពោះ Informa Markets និងអ្នកសហការជាដៃគូទាំងអស់សម្រាប់ការរៀបចំកម្មវិធីផ្នែកខាងសំខាន់ៗនៅក្នុងពិព័រណ៍នេះ ដែលរួមមានការប្រកួតប្រជែងជំនាញសេវាកម្មសម្រាប់សេវាកម្មស្រា ការប្រកួតប្រជែងជំនាញផលិតកាហ្វេនិងរៀបចំសិក្ខាសាលាស្តីពី “ការបណ្តុះបណ្តាលវិជ្ជាជីវៈទេសចរណ៍ និងការអភិវឌ្ឍន៍អាជីពក្នុងវិស័យទេសចរណ៍” ដែលរៀបចំដោយនាយកដ្ឋានបណ្តុះបណ្តាលវិជ្ជាជីវៈទេសចរណ៍ នៃក្រសួងទេសចរណ៍ ដែលនឹងប្រព្រឹត្តទៅនៅថ្ងៃទី២៣ ខែតុលា ឆ្នាំ២០២៥។

លោករដ្ឋមន្ត្រីបានស្នើឱ្យមានការរៀបចំព្រឹត្តិការណ៍បែបនេះ ក្នុងលក្ខណៈទ្រង់ទ្រាយធំជាងនេះដើម្បីចូលរួមលើកកម្ពស់វិស័យទេសចរណ៍ឱ្យកាន់តែប្រសើរបន្ថែមទៀត៕

អត្ថបទ ៖សំអឿន