តម្លៃប្រេងអន្តរជាតិស្ទុះឡើង ក្រោយអាមេរិកប្រកាសទណ្ឌកម្មថ្មីលើក្រុមហ៊ុនប្រេងរុស្ស៊ី

តម្លៃប្រេងអន្តរជាតិស្ទុះងើបឡើងវិញសម្រាប់ការជួញដូរលើទីផ្សារអាស៊ីនៅព្រឹកថ្ងៃព្រហស្បតិ៍នេះ ក្រោយសហរដ្ឋអាមេរិកប្រកាសទណ្ឌកម្មលើក្រុមហ៊ុនប្រេងរុស្ស៊ីធំៗរួមមាន​ Rosneft​ និង Lukoil ពាក់ព័ន្ធនឹង​សង្រ្គាម​ឈ្លានពានអ៊ុយក្រែន។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

​តម្លៃប្រេងឆៅនាពេលអនាគត ម៉ាក​ Brent បាន​កើនឡើង ១,៧៦ ដុល្លារ ឬ ២,៨១ ភាគរយ ដល់ ៦៤,៣៥ ដុល្លារ/បារ៉ែល គិតត្រឹមម៉ោង ៨ និង ៤០ នាទីព្រឹក​នៅទីក្រុងហុងកុង ខណៈប្រេងឆៅអាមេរិក ម៉ាក ​West Texas Intermediate (WTI) បាន​កើនឡើង ១,៦៨ ដុល្លារ ឬ ២,៨៧ ភាគរយ ដល់ ៦០,១៨ ដុល្លារ/បារ៉ែល​។

តម្លៃប្រេងអន្តរជាតិ​បាន​ធ្លាក់់ចុះប៉ុន្មានសប្ដាហ៍ជាប់ៗគ្នាកន្លងមកនេះរហូតដល់ត្រឹម ឬក្រោម​ ៦០ ដុល្លារ/បារ៉ែល​ ដោយសារតែកង្វល់ពាក់ព័ន្ធនឹង​កំណើននៃការផ្គត់ផ្គង់ ក៏ដូចជា​ភាពតានតឹងជម្លោះពាណិជ្ជកម្មអាមេរិក-ចិន ដែល​បង្កភាពស្រពិចស្រពិលសេដ្ឋកិច្ច និងកម្សោយតម្រូវការ។

ប៉ុន្តែតម្លៃស្ទុះងើបឡើងវិញ​ បន្ទាប់ពីក្ដីរំពឹងពីភាពស្រាកស្រាន្តនៃជម្លោះអ៊ុយក្រែនបាន​រលត់ទៅវិញ ដោយ​ប្រធានាធិបតីអាមេរិកលោក ដូណាល់ ត្រាំ និងសមភាគីរុស្ស៊ី លោក វ៉្លាឌីមៀរ ពូទីន បាន​លុប​ចោល​គម្រោងជួបចរចាគ្នាពាក់ព័ន្ធនឹង​សង្រ្គាម​អ៊ុយក្រែន។ លោក ត្រាំ តែងតែគំរាមបន្ថែមទណ្ឌកម្ម​ប្រេងរុស្ស៊ី ដែល​ជាប្រភព​ចំណូលដ៏សំខាន់សម្រាប់យកទៅប្រើប្រាស់ក្នុងសង្រ្គាម​។

កាលពីពុធ ក្រសួងរតនាគារអាមេរិក​ក៏ប្រកាសទណ្ឌកម្ម​កញ្ចប់ថ្មីដោយ​កំណត់គោលដៅលើក្រុមហ៊ុនថាមពលរដ្ឋ និងឯកជន រួមមាន​ Rosneft​ និង Lukoil ។ ក្រៅពីទណ្ឌកម្ម សហភាពអឺរ៉ុបឯណោះវិញ បាន​ព្រមព្រៀងគ្នា​លើកញ្ចប់ទណ្ឌកម្មរុស្ស៊ីទី ១៩ ដែលរាប់បញ្ចូលទាំងការបិទការនាំចូលឧស្ម័នធម្មជាតិទាំងស្រុងពីរុស្ស៊ីត្រឹមឆ្នាំ ២០២៨។

ការកាត់ផ្ដាច់ប្រេង ឬថាមពលរុស្ស៊ី អាចធ្វើឱ្យ​តម្រូវការពីប្រទេសផលិតប្រេងផ្សេងៗកើនឡើង ជាហេតុធ្វើឱ្យតម្លៃហក់ឡើងទៅតាមនោះដែរ នៅពេលការផ្គត់ផ្គង់មាន​កម្រិត។ ទោះបីបែបនេះក្ដី អ្នកវិភាគទីផ្សារបាន​ប្រាប់រ៉យទ័រថា កំណើនតម្លៃប្រេងថ្ងៃនេះ នៅតែមាន​កំណត់ ដោយសារតែការរំពឹងទុកពីកំណើនផលិតកម្ម និងហានិភ័យសេដ្ឋកិច្ចដែល​កើតចេញពីគោលនយោបាយការពារនិយមពន្ធគយរបស់សកល៕