លោក ហ្សេលេនស្គី  រឹតបន្តឹងក្រុមហ៊ុនរដ្ឋ ក្រោយផ្ទុះរឿងអាស្រូវពុករលួយ ពាក់ព័ន្ធប្រាក់១០០លាន​ដុល្លារ

ប្រធានាធិបតីអ៊ុយក្រែន លោក  វ៉ូឡូឌីមៀរ ហ្សេលេនស្គី បានបញ្ជាក់ពីចេតនារឹតបន្តឹងការគ្រប់គ្រងលើក្រុមហ៊ុនរដ្ឋ ចំពេលមានរឿងអាស្រូវអំពើពុករលួយ ដែលកំពុងកើតឡើងនៅក្នុងវិស័យថាមពល។ នេះបើតាមការចុះផ្សាយពីសារព័ត៌មាន NHK នាថ្ងៃនាថ្ងៃ ១៥ ខែវិច្ឆិកា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យប្រឆាំងអំពើពុករលួយជាតិអ៊ុយក្រែន និងអង្គភាពមួយផ្សេងទៀតបានប្រកាសកាលថ្ងៃចន្ទ អំពីការចាប់ផ្តើមនៃការស៊ើបអង្កេតលើការចោទប្រកាន់ទាំងនេះ។ អំពើពុករលួយនេះ ត្រូវបានគេចោទប្រកាន់ថា ពាក់ព័ន្ធនឹងប្រាក់ប្រហែល ១០០លានដុល្លារ ជាមូលនិធិខុសច្បាប់ ដែលត្រូវបានទទួលជាចម្បង ទាក់ទងនឹងកិច្ចសន្យារបស់ក្រុមហ៊ុន Energoatom ជាក្រុមហ៊ុនថាមពលនុយក្លេអ៊ែររដ្ឋរបស់អ៊ុយក្រែន។

ក្រោយមក មេដឹកនាំអ៊ុយក្រែនរូបនេះ បានបណ្តេញរដ្ឋមន្ត្រីក្រសួងយុត្តិធម៌ និងរដ្ឋមន្ត្រីថាមពលចេញគឺលោក ហឺមេន ហាលូឆេនកូ (Herman Halushchenko) ដោយផ្អែកលើការចោទប្រកាន់ទាំងនេះ។

តាមរបាយការណ៍ពីប្រព័ន្ធផ្សព្វផ្សាយក្នុងស្រុកបាននិយាយថា សហគ្រិនម្នាក់ទៀតគឺលោក ធីមួរ មីនឌីច (Timur Mindich)  ដែលជាអ្នកស្គាល់ជិតស្និទ្ធជាមួយលោកហ្សេលេនស្គី ជាយូរមកហើយនោះ ក៏កំពុងស្ថិតក្រោមការស៊ើបអង្កេតផងដែរ។

ដោយឡែក អធិការបតីអាល្លឺម៉ង់ លោក Friedrich Merz បាននិយាយជាមួយលោកហ្សេលេនស្គី តាមទូរស័ព្ទ ហើយបានជំរុញឲ្យគាត់អនុវត្តវិធានការប្រឆាំងអំពើពុករលួយ។ មេដឹកនាំអឺរ៉ុបផ្សេងទៀត ក៏បានសម្តែងការរិះគន់ និងការព្រួយបារម្ភរបស់ពួកគេផងដែរ។

យ៉ាងណាមិញ លោក ហ្សេលេនស្គី បានបង្ហោះនៅលើប្រព័ន្ធផ្សព្វផ្សាយសង្គមកាលពីថ្ងៃសុក្រដែរថា គាត់បានបញ្ជាក់ជាមួយនាយករដ្ឋមន្ត្រី Yuliia Svyrydenko អំពីការអនុវត្តដំណើរការសវនកម្មយ៉ាងឆាប់រហ័សនៅក្នុងក្រុមហ៊ុនដែលគ្រប់គ្រងដោយរដ្ឋ។ គាត់បាននិយាយថា ពួកគេក៏បានបញ្ជាក់ផងដែរថា លទ្ធផលទាំងអស់ គួរតែត្រូវបានផ្ញើទៅអ្នកស៊ើបអង្កេត។

ទោះជាយ៉ាងណា អ្នកសង្កេតការណ៍និយាយថា លោក ហ្សេលេនស្គី មានបំណងកាត់បន្ថយការព្រួយបារម្ភកាន់តែខ្លាំងឡើងពីទាំងក្នុងស្រុក និងក្រៅប្រទេស ដោយបញ្ជាក់ពីការប្តេជ្ញាចិត្តរបស់គាត់ ក្នុងការទប់ស្កាត់ការកើតឡើងវិញតាមរយៈការគ្រប់គ្រងកាន់តែតឹងរ៉ឹងលើក្រុមហ៊ុនដែលគ្រប់គ្រងដោយរដ្ឋតែប៉ុណ្ណោះ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ទីប្រឹក្សាលោក ហ្សេលេនស្គី ស្តីបន្ទោស រុស្ស៊ី ចំពោះរឿងអាស្រូវពុករលួយដ៏ធំនៅ អ៊ុយក្រែន