ជប៉ុន ព្រមានពលរដ្ឋខ្លួនក្នុងប្រទេសចិនឲ្យប្រុងប្រយ័ត្ន ខណៈភាពតានតឹងផ្នែកការទូតកើនឡើង

ជប៉ុនបានចេញការព្រមានសុវត្ថិភាពដល់ពលរដ្ឋរបស់ខ្លួននៅក្នុងប្រទេសចិន ដោយជំរុញឱ្យពួកគេជៀសវាងកន្លែងមានមនុស្សច្រើន ប្រុងប្រយ័ត្នចំពោះបរិស្ថានជុំវិញខ្លួន និងប្រុងប្រយ័ត្ននៅពេលប្រាស្រ័យទាក់ទងជាមួយអ្នកស្រុកចិន។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី១៨ខែវិច្ឆិកា។

ការណែនាំនេះកើតឡើងចំពេលដែលទំនាក់ទំនងរវាងទីក្រុងតូក្យូ និងទីក្រុងប៉េកាំងកាន់តែអាក្រក់ទៅៗ បន្ទាប់ពីមតិយោបល់ថ្មីៗរបស់នាយករដ្ឋមន្ត្រីជប៉ុន Sanae Takaichi អំពីតៃវ៉ាន់ធ្វើឱ្យប្រទេសចិនខឹងសម្បារ។ ចិនអះអាងថាតៃវ៉ាន់ជារបស់ខ្លួន ខណៈដែលជប៉ុននិយាយថា ជម្លោះណាមួយលើកោះនេះអាចគំរាមកំហែងដោយផ្ទាល់ដល់សន្តិសុខរបស់ខ្លួន ។

លោក Minoru Kihara អគ្គលេខាធិការគណៈរដ្ឋមន្ត្រី បានមានប្រសាសន៍ថា ប្រទេសជប៉ុនបានចេញការព្រមាននេះ ដោយសារតែស្ថានភាពសន្តិសុខ និងនយោបាយនៅក្នុងប្រទេសចិនកាន់តែតានតឹង ហើយមនុស្សកាន់តែច្រើននៅទីនោះកំពុងបង្ហាញអារម្មណ៍អវិជ្ជមានចំពោះប្រទេសជប៉ុន។ ស្ថានទូតជប៉ុនបានប្រាប់ពលរដ្ឋឱ្យជៀសវាងការចេញទៅក្រៅតែម្នាក់ឯង តាមដានកូនៗរបស់ពួកគេយ៉ាងដិតដល់ និងចាកចេញភ្លាមៗ ប្រសិនបើពួកគេឃើញនរណាម្នាក់ដែលមើលទៅគួរឱ្យសង្ស័យសូម្បី។

ភាពតានតឹងផ្នែកការទូតថែមទាំងបានប៉ះពាល់ដល់ឧស្សាហកម្មកម្សាន្ត ដោយប្រទេសចិនបានផ្អាកការចេញផ្សាយខ្សែភាពយន្តជប៉ុនជាច្រើនដោយសារតែអារម្មណ៍អវិជ្ជមានរបស់សាធារណជន។

គួរបញ្ជាក់ថា ទោះបីជាមានការខិតខំប្រឹងប្រែងដើម្បីបន្ធូរបន្ថយជម្លោះក៏ដោយ ចិនបានឆ្លើយតបដោយការណែនាំប្រជាជនឲ្យជៀសវាងការធ្វើដំណើរទៅកាន់ប្រទេសជប៉ុន និងបដិសេធកិច្ចប្រជុំដែលបានគ្រោងទុករវាងនាយករដ្ឋមន្ត្រីចិន Xi Jinping និងលោកស្រី Takaichi នៅក្នុងកិច្ចប្រជុំកំពូល G20 នៅអាហ្វ្រិកខាងត្បូងថែមទៀត៕

អត្ថបទ៖ ប៊ុន សុភាព