ព័ត៌មានអន្ដរជាតិ

លោករូតេ៖ រុស្ស៊ីគ្មានសិទ្ធិលូកមាត់រឿងអ៊ុយក្រែនចូលជាសមាជិកណាតូឡើយ

បានផុស

៦ ខែ មុន

នៅ

ថ្ងៃព្រហស្បតិ៍ ២៧ វិច្ឆិកា ២០២៥

ដោយ

Chheang

អគ្គលេខាធិការអង្គការណាតូ លោក ម៉ាក រូតេ បាននិយាយថា ប្រទេសរុស្ស៊ីគ្មានសិទ្ធិអំណាចក្នុងការរារាំងផ្លូវរបស់អ៊ុយក្រែនឆ្ពោះទៅរកការចូលជាសមាជិកសម្ព័ន្ធភាពនោះទេ ដោយសង្កត់ធ្ងន់ថា ការសម្រេចចិត្តចូលជាសមាជិកគឺអាស្រ័យលើការយល់ព្រមជាឯកច្ឆន្ទពីបណ្តារដ្ឋជាសមាជិកណាតូតែប៉ុណ្ណោះ។ សម្តីរបស់លោកធ្វើឡើងក្នុងបទសម្ភាសន៍មួយជាមួយកាសែត El Pais។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករូតេ បានលើកឡើងកាលពីថ្ងៃពុធទី២៦ខែវិច្ឆិកាឆ្នាំ២០២៥ថា «រុស្ស៊ីគ្មានសិទ្ធិបោះឆ្នោត ឬសិទ្ធិវេតូលើអ្នកណាដែលនឹងក្លាយជាសមាជិកណាតូនោះឡើយ» ខណៈពេលដែលលោកបានកត់សម្គាល់ថា សម្ព័ន្ធមិត្តមួយចំនួន រួមទាំងសហរដ្ឋអាមេរិក បច្ចុប្បន្នកំពុងជំទាស់នឹងការចូលជាសមាជិករបស់អ៊ុយក្រែន ទោះបីជាណាតូបានប្រកាសហើយថា ទីក្រុងកៀវកំពុងស្ថិតនៅលើ«ផ្លូវដែលមិនអាចបកក្រោយវិញបាន» ឆ្ពោះទៅរកការចូលជាសមាជិកក៏ដោយ។

លោករូតេ បានបញ្ជាក់ថា ផែនការសន្តិភាពដែលដឹកនាំដោយអាមេរិក ទាមទារឲ្យមានការធានាសន្តិសុខខ្លាំងក្លាសម្រាប់អ៊ុយក្រែន បើការចូលជាសមាជិកណាតូមិនអាចធ្វើទៅបានភ្លាមៗ។ លោកបានបន្ថែមថា កិច្ចចរចាកំពុងផ្តោតលើការរក្សាភាពរឹងមាំផ្នែកយោធារបស់អ៊ុយក្រែន ការរួមចំណែកដោយ«សម្ព័ន្ធយោធាសុច្ឆន្ទៈ coalition of the willing» និងតួនាទីរបស់ទីក្រុងវ៉ាស៊ីនតោន។

ប្រមុខណាតូ បានបន្តទៀតថា អ៊ុយក្រែនអាចចូលរួមក្នុងសម្ព័ន្ធភាពនាពេលអនាគតក្រោមសន្ធិសញ្ញាវ៉ាស៊ីនតោនឆ្នាំ១៩៤៩ ប៉ុន្តែត្រូវមានការគាំទ្រជាឯកច្ឆន្ទ។ លោកបានព្រមានថា រុស្ស៊ីនៅតែជាការគំរាមកំហែងរយៈពេលវែងដល់ទ្វីបអឺរ៉ុប ដោយនិយាយថា ថ្នាក់ដឹកនាំទីក្រុងមូស្គូបានបង្ហាញពីឆន្ទៈក្នុងការលះបង់«ប្រជាជនខ្លួនឯងមួយលាននាក់» សម្រាប់គោលដៅសង្រ្គាមរបស់ខ្លួន។

មតិយោបល់របស់លោក ធ្វើឡើងស្របពេលដែលព័ត៌មានលម្អិតបានលេចចេញពីកិច្ចពិគ្រោះយោបល់របស់សហរដ្ឋអាមេរិកជាមួយរុស្ស៊ីលើសំណើសន្តិភាពថ្មីមួយ។ យោងតាម Axios សេចក្តីព្រាងមួយដែលមាន២៨ចំណុច ហើយក្រោយមកត្រូវបានកាត់បន្ថយមកត្រឹម១៩ចំណុច បន្ទាប់ពីកិច្ចចរចានៅទីក្រុងហ្សឺណែវ បានរួមបញ្ចូលការរំពឹងទុកដែលថា អ៊ុយក្រែននឹងបោះបង់ចោលទឹកដីដុនបាស់មួយចំនួន កាត់បន្ថយកងកម្លាំងប្រដាប់អាវុធរបស់ខ្លួន និងបោះបង់ចោលអាវុធមួយចំនួន ជាថ្នូរនឹងការធានាសន្តិសុខរបស់អាមេរិកសម្រាប់ទីក្រុងកៀវ និងទ្វីបអឺរ៉ុប។

អ្នកចរចាអ៊ុយក្រែន និងអាមេរិកនៅទីក្រុងហ្សឺណែវ បានយល់ព្រមបន្តធ្វើការលើក្របខ័ណ្ឌរួមមួយដែលគោរពអធិបតេយ្យភាពរបស់អ៊ុយក្រែន និងធានា«សន្តិភាពប្រកបដោយចីរភាព និងយុត្តិធម៌»។ មន្ត្រីអ៊ុយក្រែននិយាយថា បញ្ហាដែលនៅសេសសល់ទាក់ទងនឹងសហភាពអឺរ៉ុប (EU) និងណាតូ នឹងត្រូវបានដោះស្រាយតាមរយៈការទូតដាច់ដោយឡែកមួយ៕

ប្រែសម្រួល៖ ឈាង

ហ្សេលេនស្គីត្រៀមលើកយកចំណុចចម្រូងចម្រាសក្នុងផែនការសន្តិភាពទៅនិយាយផ្ទាល់ជាមួយត្រាំ

ព័ត៌មានអន្ដរជាតិ២ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា