សមត្ថកិច្ចរឹតបន្តឹងចរាចរណ៍ផ្លូវទឹកបន្ថែម ការពារអ្នកលួចឆ្លងតាមទូកចូលរាជធានី

កម្លាំងនគរបាលចរាចរណ៍ជើងទឹកសហការណ៍ជាមួយនគរបាលមូលដ្ឋាន បានដាក់កម្លាំងតាមមើលអ្នកធ្វើដំណើរតាមទូកឆ្លងចូលរាជធានីភ្នំពេញ ខណៈដែលចរាចរណ៍ផ្លូវគោកត្រូវបានបិទខ្ទប់។

ជាក់ស្តែងនៅព្រឹកថ្ងៃទី១៩ ខែមេសានេះ កម្លាំងនគរបាលចរាចរណ៍ជើងទឹក ដែលឈរជើងការពារគោលដៅក្រោមស្ពាន​ព្រះមុនីវង្សចាស់ ថ្មី ក្នុងមូលដ្ឋានខណ្ឌច្បារអំពៅបានសហការជាមួយនគរបាលមូលដ្ឋានខណ្ឌច្បារអំពៅ ចុះពិនិត្យមើលការធ្វើដំណើតាមទូក ដោយក្នុងនោះគឺអនុញាតត្រឹមទូកអ្នកនេសាទប៉ុណ្ណោះ។

តាមការបញ្ជាក់ពីលោក ពៅ ហួត ចៅសង្កាត់ច្បារអំពៅទី១ ដែលម្ចាស់មូលដ្ឋានបានឲ្យដឹងថា ពិតជាមានការរឹតបន្តឹងផ្នែក​ផ្លូវទឹកពិតប្រាកដមែន។ ព្រោះអាចអ្នកដែលរស់នៅភ្នំពេញហើយលបលួចធ្វើដំណើតាមទូកចូលមករាជធានីភ្នំពេញដោយបន្លំតាមគ្រប់រូបភាព។ ដូច្នេះហើយសាលារាជធានីភ្នំពេញសម្រេចបង្កើតកម្លាំងនគរបាលចរាចរណ៍ផ្លូវទឹកឲ្យធ្វើការ​ត្រួតពិនិត្យទៅលើទូកគ្រប់ប្រភេទដែលកំពុងធ្វើចរាចរណ៍តាមផ្លូវទឹក លើកលែងតែទូកអ្នកនេសាទប៉ុណ្ណោះ។ នេះគឺជាវិធានការណ៍ទប់ស្កាត់មិនអនុញាតឲ្យមានចរាចរណ៍ចេញចូលក្នុងរាជធានីភ្នំពេញ ខណៈដែលជំងឺកូវីដ១៩កំពុងវាយលុក៕

អត្ថបទ ៖ នរា