វៀតណាម ចាប់​ផ្តើម​សាងសាង់ពហុកីឡដ្ឋានធំជាងគេបំផុតទី ២ ក្នុងពិភពលោក

ប្រទេស វៀតណាម បាន​ចាប់​ផ្តើម​សាងសង់ពហុកីឡដ្ឋានថ្មីមួយកម្រិតស្តង់ដា​អូឡាំពិក ហើយនឹងក្លាយជាពហុកីឡដ្ឋានធំជាងគេបំផុតទី ២ នៅក្នុងពិភពលោក។

យោងតាមសារព័ត៌មាន វៀតណាម VN Express បានឱ្យដឹងថា ថ្មីៗនេះអាជ្ញាធរ វៀតណាម បានអនុម័តគម្រោងអភិវឌ្ឍពហុកីឡដ្ឋានថ្មីមួយឈ្មោះ ថា “Trong Dong Stadium” ទៅឱ្យក្រុមហ៊ុន Vingroup ដើម្បី​សាង​សង់​ពហុកីឡដ្ឋានដ៏ទំនើបស្តង់ដា​អូឡាំពិក ដែលមានសមត្ថភាពផ្ទុកអ្នកទស្សនាបានចំនួន ១៣៥,០០០ នាក់ ហើយនឹងក្លាយជាពហុកីឡដ្ឋានធំជាងគេបំផុតទី២ នៅលើពិភពលោក។

គម្រោងនេះ គ្រោងសាងសង់លើផ្ទៃដីទំហំ ៤១១ ហិកតា នៅភាគខាងត្បូងទីក្រុងហាណូយ ដែលនឹងប្រើប្រាស់កញ្ចប់ថវិកា​​ចំនួន ៣៥ ប៊ីលានដុល្លារអាមេរិក (៣៥ ពាន់លានដុល្លារអាមេរិក)។ ការរចនាគម្រោងនេះឡើង ដើម្បីបំពេញតាមលក្ខខណ្ឌ សម្រាប់ការធ្វើជាម្ចាស់ផ្ទះព្រឹត្តិការណ៍អន្តរជាតិធំៗ រួមទាំងកីឡាអាស៊ី (Asian Games) និងកីឡា​អូឡាំពិក។ ក្រៅពីផ្តោតលើវិស័យកីឡា គម្រោងនេះក៏រួមបញ្ចូលហេដ្ឋារចនាសម្ព័ន្ធផ្សេងៗ ដូចជា មន្ទីរពេទ្យ និងមជ្ឈមណ្ឌលស្រាវជ្រាវផងដែរ។

គួរឱ្យដឹងថា បច្ចុប្បន្ន ពហុកីឡដ្ឋាន Rungrado 1st of May របស់ប្រទេស កូរ៉េខាងជើង ស្ថិតនៅចំណាត់ថ្នាក់ទី ១ ជាពហុកីឡដ្ឋានធំបំផុត ដោយអាចផ្ទុកអ្នកទស្សនាបានចំនួន ១៥០,០០០ នាក់ ខណៈកីឡដ្ឋាន Michigan Stadium ស្ថិតនៅចំណាត់ថ្នាក់ទី ២ អាចផ្ទុកអ្នកទស្សនាបានចំនួន ១០៧,៦០០ នាក់។

ពហុកីឡដ្ឋាន​ដ៏​ធំ​បំផុត​លំដាប់​ទី២​ក្នុង​លោក​នេះ ស្ថិត​នៅ​ក្នុង​គម្រោង​អភិវឌ្ឍ«ទី​ក្រុង​កីឡា​អូឡាំពិក) ដែល​បាន​​​បញ្ចុះ​បឋម​សិលា​កាល​ពី​ថ្ងៃ​ទី​១៩ ខែ​ធ្នូ ឆ្នាំ ២០២៥ ដែល​គ្រោង​បញ្ចប់​នៅ​ឆ្នាំ ២០៣០ ហើយ​ហេដ្ឋារចនា​សម្ព័ន្ធ​ផ្សេង​ៗ​ទៀត​គ្រោង​បញ្ចប់​ទាំង​ស្រុង​នៅ​ឆ្នាំ ២០៣៥៕

ប្រែសម្រួល​៖ សេម កុសល
ប្រភព៖ VN Express