MoC នឹងរៀបចំកិច្ចប្រជុំក្រុមការងារផ្នែកកែច្នៃសម្រាប់ការនាំចេញ និងកិច្ចសម្រួលពាណិជ្ជកម្មនៅថ្ងៃស្អែក

ក្រសួងពាណិជ្ជកម្ម (MoC) ក្នុងនាម​សហប្រធានក្រុមការងារផ្នែកកែច្នៃសម្រាប់ការនាំចេញ និងកិច្ចសម្រួលពាណិជ្ជកម្ម ឬក្រុម “ឆ” នឹងរៀបចំកិច្ចប្រជុំបូកសរុបលទ្ធផលការងារប្រចាំឆមាសទី២ ឆ្នាំ២០២៥ ជាមួយវិស័យឯកជន ក្រោមអធិបតីភាព លោកស្រី​ ចម និម្មល រដ្ឋមន្ត្រីក្រសួងពាណិជ្ជកម្ម និង ជាសហប្រធានក្រុម «ច» ដែលនឹងប្រព្រឹត្តទៅនាថ្ងៃទី២៤ ខែធ្នូ ឆ្នាំ២០២៥ វេលាម៉ោង ៨៖៣០នាទីព្រឹក នៅទីស្តីការក្រសួងពាណិជ្ជកម្ម។

បើ​តាម​សេចក្តី​ជូន​ដំណឹង​របស់​ក្រសួង​ពាណិជ្ជកម្ម ការ​រៀប​ចំ​កិច្ច​ប្រជុំ​នេះ​ឡើង​ គឺ​ដើម្បី​ពិនិត្យ​ដោះស្រាយ​បញ្ហាប្រឈម និង​កង្វល់នានារបស់វិស័យឯកជនក៏ដូច ជាការ​គិតគូរ​សម្របសម្រួល​បន្ថែម​លើ​ផ្នែក​ផលិតកម្ម​កែច្នៃ​សម្រាប់​នាំចេញ និងកិច្ចសម្រួលពាណិជ្ជកម្ម ក្នុងការ កាត់បន្ថយថ្លៃធ្វើធុរកិច្ច លើកកម្ពស់ភាពប្រកួតប្រជែង និងជំរុញកំណើនសេដ្ឋកិច្ច។

បន្ថែមលើនេះ កិច្ចប្រជុំខាងលើក៏នឹងពិនិត្យ តាមដាន និងវាយតម្លៃអំពីវឌ្ឍនភាពការងាររបស់ ក្រុម “ឆ” ស្របតាមភារកិច្ចដែលត្រូវបានប្រគល់ជូនដោយវេទិការាជរដ្ឋាភិបាល-ផ្នែកឯកជនលើកទី១៩ “សេចក្តី ជូនដំណឹងលេខ ១២៧២ សជណ.អកទ ចុះថ្ងៃទី២២ ខែវិច្ឆិកា ឆ្នាំ២០២៣» ព្រមទាំងដើម្បីស្តាប់នូវមតិយោបល់ បញ្ហាប្រឈម និងសំណូមពរនាពេលថ្មីៗរបស់វិស័យឯកជន សំដៅដាក់ចេញនូវវិធានការមុតស្រួច និងជាក់ស្តែង ឱ្យបានទាន់ពេលវេលា៕

​