ឪពុក​វីរកងទ័ពជួរមុខម្នាក់នៅទិស​ភ្នំទ្រព្យ រងគ្រោះ​ថ្នាក់​ស្លាប់​ដោយគ្រោះថ្នាក់ចរាចរណ៍

វីរកងទ័ពជួរមុខកម្ពុជាម្នាក់ ឈរជើងប្រចាំនៅទិសភ្នំទ្រព្យ ទទួលបានដំណឹងថាឪពុករបស់ខ្លួន​ជួបគ្រោះថ្នាក់ចរាចរណ៍រហូតបណ្ដាលឱ្យបាត់បង់ជីវិត។

លោក ហ៊ួត ចាន់បូរ ជាវីរកងទ័ពបម្រើនៅអង្គភាព ២៨៣ នៃកងពលតូចអន្តរាគមន៍ ១២៨ ខេត្តស្ទឹងត្រែង មានទីលំនៅ រស់នៅភូមិដីសម្បទាន កាកុត ក្នុងឃុំសំបុក ស្រុកចិត្របុរី ខេត្តក្រចេះ។

ក្នុងអំឡុងពេលមានសង្គ្រាមជាមួយសៀមនេះ លោក លោក ហ៊ួត ចាន់បូរ បានទៅឈរជើងប្រចាំការ​នៅចំណុច ៥ មករា ទិសភ្នំទ្រព្យ។ ក្នុងរយៈពេលដែលលោកឈរជើងក៏បានទទួលដំណឹងថា ឪពុកលោកបានជួបគ្រោះថ្នាក់ចរាចរណ៍​រហូតដល់ថ្នាក់បាត់បង់ជីវិត។ ពេលទទួលបានដំណឹងដូច្នេះរូបលោកក៏បានសុំមេ ហើយមេក៏បានអនុញ្ញាតិឱ្យលោកមកធ្វើពិធីបុណ្យជូនឪពុក។

លោកប្រាប់​ដូច្នេះ​ថា៖ «អារម្មណ៍ពេលខ្ញុំទទួលបានដំណឹងឪពុកស្លាប់ភ្លាម មានអារម្មណ៍ក្តុកក្ដួលស្រាល​​ខ្លួន និយាយអ្វីមិនចេញ។ កន្លងមកធ្លាប់តែគិតថា ខ្លួនកំពុងនៅសមរភូមិមុខ កំពុងជាប់ដៃប្រយុទ្ធជាមួយសត្រូវឈ្លានពានទឹកដី មិនដែលគិតថាមានជីវិតត្រឡប់មកជួបពុមម៉ែបងប្អូនវិញ បែរជាអ្នកផ្ទះមានរឿងបែបនេះទៅវិញ»។

លោកបន្តថា៖ «ខ្ញុំតែងតែគិតថា នៅពេលខ្ញុំទៅដល់ទិសមុខ ខ្ញុំបានប្ដេជ្ញានឹងធ្វើតាមបទបញ្ជាថ្នាក់លើ ក៏ដូចជាបទបញ្ជារបស់មេបញ្ជាការផ្ទាល់ ទោះបីដឹងថាផ្លូវនេះគ្រោះថ្នាក់ ផ្លូវនេះពិបាក ខ្ញុំប្តេជ្ញាធ្វើឱ្យបាន មិនដែលគិតថាមានជីវិត​រស់​ត្រឡប់​មកវិញម្តងណាឡើយ។ ពេលខ្ញុំទៅ គឺខ្ញុំគិតថា បងប្អូនយុទ្ធមិត្តនៅខាងមុខ គាត់យ៉ាងម៉េច គឺខ្ញុំដូចគ្នា មិនដែលមាន​​ក្នុងចិត្តមួយថា និងមានជីវិតមកវិញទេ ព្រោះកន្លែងនោះ គឺខ្ញុំជួបផ្ទាល់ឆ្លងកាត់នូវគ្រាប់ រំសេវ និងសភាពកាណ៍សមរភូមិផ្ទាល់ៗមុខ មានអារម្មណ៍ថា ខ្ញុំធ្វើបានតាមបណ្ដាំឪពុក តែមកទល់ពេលនេះដំណឹងសោកសៅដែលខ្ញុំទទួលបាន គឺឪពុកខ្ញុំទទួលមរណៈភាពមុនខ្ញុំបានបទឈប់បាញ់។

«មុនចូលដល់កន្លែងសមរភូមិ កន្លែងប្រយុទ្ធ ដែលជាតំបន់គ្រោះថ្នាក់នេះ វីរកងទ័ព​រូបនេះ​តែងតែទទួលបានពាក្យណែ​នាំពីគឪពុក​ថា កូនឯងត្រូវតស៊ូ ព្យាយាម ខ្ញុំថា ខ្ញុំធ្វើបាន ខ្ញុំតស៊ូបាន តែចុងក្រោយគាត់បែរជាទៅចោលខ្ញុំ មុនខ្ញុំ ខ្ញុំធ្លាប់ទន្ទឹងរងចាំថា ថ្ងៃណាមួយនឹងបានសន្តិភាព និងបានបទឈប់បាញ់មកផ្ទះវិញ ខ្ញុំនឹងយកសាច់ ឈាម ឆ្អឹង និងស្បែក ដែលគាត់ផ្ដល់ឱ្យខ្ញុំនូវជីវិតមួយនេះ ឱ្យគាត់ឃើញ តែទីបំផុត ខ្ញុំមកមិនទាន់ដង្ហើមចុងក្រោយពុកទេ»។

ដោយសារ​​ជីវភាពខ្វះខាត មិនមានលុយសម្រាប់ធ្វើបុណ្យ សូម្បីលុយទិញក្ដាមឈូសក៏គ្មានដែរ ហើយក៏មិនទាន់ដឹងថា បុណ្យនេះ ត្រូវចំណាយអស់ប៉ុណ្ណា តិច ឬច្រើន ក៏មិនទាន់ដឹង តាមរយៈកម្ពុជាថ្មី ទាហានជួរមុខ លោក ហ៊ួត ចាន់បូរ អត្តលេខ ២៥២០០៧ ឈរជើងនៅចំនុច ៥ មករា ទិសភ្នំទ្រព្យ ក៏​អំពាវនាវដល់អាជ្ញាធរខេត្តនិងសប្បុរសជនជួយ​​ឧបត្ថម្ភ​សម្រាប់យកថវិកា​មក​ធ្វើ​បុណ្យ​តាមរយៈលេខទូរសព្ទលេខ 0882972928៕

អត្ថបទ៖ ប្រុញ វិធិន