ក្នុងសង្គ្រាមថៃឈ្លានពានកម្ពុជា! ៦ខែចុងក្រោយ កម្ពុជាចេញញត្តិថ្កោលទោស ការបំភ្លឺ សេចក្តីថ្លែងការណ៍ជិត៧០០លើក

គិតចាប់តាំងពីកម្ពុជា​ទទួលរងសង្គ្រាមឈ្លានពានពីប្រទេសថៃ តាំងពីថ្ងៃទី ២៤ ខែកក្កដា ឆ្នាំ ២០២៥ មក ទាំងថ្នាក់ដឹកនាំ អាជ្ញាធរគ្រប់លំដាប់ថ្នាក់ ចាប់តាំងពីអាជ្ញាធរមូលដ្ឋាន រហូតដល់ក្រសួងស្ថាប័ននានា​ដែលជាសេនាធិការរបស់រដ្ឋាភិបាលបានបំពេញការងារយ៉ាងសកម្មបំផុត ដើម្បីការពារអធិបតេយ្យភាពជាតិ បូរណភាពទឹកដី ក៏ដូចជាយកចិត្តទុកដាក់ជួយប្រជាពលរដ្ឋភៀសសឹក ដោយចាត់ទុកជាកិច្ចការអាទិភាពចម្បងបំផុត។

អ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា បានឱ្យដឹងថា ជាក់ស្តែង ក្នុងអំឡុងពេល ៦ ខែចុងក្រោយនេះ ក្រសួងនិងស្ថាប័ននានារបស់រាជរដ្ឋាភិបាល បានចេញសេចក្តីប្រកាសព័ត៌មាន កំណត់ទូតតវ៉ា សេចក្តីថ្លែងការណ៍ ញត្តិថ្កោលទោស លិខិតបកស្រាយ ឬលិខិតបំភ្លឺឆ្លើយតបផ្សេងៗគ្រប់ទម្រង់សរុបជិត ៧០០ លើក។ ក្នុងនោះមានដូចជា ក្រសួងការពារជាតិចំនួន ៣៨៣ លើក ក្រសួងមហាផ្ទៃ​ ៨៣ លើក ក្រសួងវប្បធម៌ និងវិចិត្រសិល្បៈ ៦៤ លើក ក្រសួងការបរទេស និងសហប្រតិបត្តិការអន្តរជាតិ ៤៩ លើក គណៈកម្មាធិការសិទ្ធិមនុស្សកម្ពុជា ២៧ លើក អាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការ ២៥ លើ​ក រដ្ឋលេខាធិការដ្ឋានកិច្ចការព្រំដែន  ២០ លើក មជ្ឈមណ្ឌលកម្ចាត់មីនកម្ពុជា ១៦ លើក និងក្រសួងធម្មការ និងសាសនា ចំនួន ១លើក។

ដោយឡែកអង្គភាពអ្នកនាំពាក្យរាជរដ្ឋាភិបាល សហការការជាមួយស្ថាប័ននានា ដោយមានការសម្របសម្រួលពីបញ្ជាការដ្ឋានព័ត៌មានបានរៀបចំធ្វើបច្ចុប្បន្នភាពជិត ២០០ លើក ដើម្បីផ្តល់ព័ត៌មានដល់ប្រជាពលរដ្ឋ ឆ្លើយតបទៅនឹងភាគីថៃ ក៏ដូចជាបញ្ជាក់ជំហរច្បាស់លាស់របស់កម្ពុជាចំពោះការការពារអធិតេយ្យភាពជាតិ បូរណភាពទឹកដី ក៏ដូចជាសហគមន៍អន្តរជាតិបានជ្រាប។

ក្រៅពីនេះ ក្រសួងការបរទេសធ្វើបទបង្ហាញចំនួន ១៤ លើជូនប្រធាន និងតំណាងស្ថានបេសកកម្មការទូត និងអង្គការអន្តរជាតិ អំពីបច្ចុប្បន្នភាពនៃស្ថានការណ៍វិវត្តតាមបណ្តោយព្រំដែនកម្ពុជា-ថៃ និងបានដឹកនាំអង្គទូត និងអង្គការអន្តរជាតិចុះពិនិត្យមើលស្ថានភាពជាក់ស្តែងតាមបណ្តាខេត្តជាប់ព្រំដែនចំនួន ៤លើក។

ជាការកត់សម្គាល់ ក្រសួងការបរទេស​បានចេញសេចក្តីថ្លែងការណ៍ជាបន្តបន្ទាប់ តវ៉ាប្រឆាំងចំពោះសកម្មភាពរបស់កងកម្លាំងប្រដាប់អាវុធថៃដែលរំលោភដែនអធិបតេយ្យភាពទឹកដីកម្ពុជា តាមរយៈការដាក់កុងតឺន័រ សាងសង់លេណដ្ឋានក្នុងទឹកដីកម្ពុជា។ រីឯក្រសួងវប្បធម៌ បានចេញសេចក្តីថ្លែងការណ៍ថ្កោលទោសយោធាថៃដែលបានបំផ្លិចបំផ្លាញប្រាង្គប្រាសាទ និងគម្រោងនានានៅជុំវិញ ប្រាសាទតាក្របី ដោយចាត់ទុកជាសកម្មភាពគឃ្លើននិងបំពានច្បាប់ទាំងកម្រោល។ ចំណែកអាជ្ញាធរមីនកម្ពុជា ក៏បានថ្កោលទោសក្រុមយោថៃ ប្រើប្រាស់គ្រាប់បែកចង្កោមមកលើកម្ពុជាដែលច្បាប់អន្តរជាតិហាមឃាត់ កំពុងបង្កការគំរាមកំហែងដល់ការរស់នៅរបស់ប្រជាពលរដ្ឋក្នុងពេលបច្ចុប្បន្ន និងថ្ងៃអនាគត៕