សភាពាណិជ្ជកម្មកម្ពុជានៅអាមេរិក ​ប្ដេជ្ញាចូលរួម​ផ្សព្វផ្សាយសក្ដានុពលទេសចរ ​និងវិនិយោគ​

សភាពាណិជ្ជកម្មកម្ពុជា​ប្រចាំ​រដ្ឋកាលីហ្វ័រញ៉ាបាន​ប្ដេជ្ញា ក្នុងការចូលរួមព្វផ្សាយពីសក្តានុពលទេសចរណ៍ និង​កាលា​នុវត្តភាពវិនិយោគកម្ពុជា ​នៅសហរដ្ឋអាមេរិក។

ការប្ដេជ្ញានេះ បានធ្វើឡើងនៅក្នុងជំនូបរវាង លោក ហួត ហាក់ រដ្ឋមន្ត្រីក្រសួងទេសចរណ៍​ និង​លោក HOUT Kim Chha ​អគ្គកុងស៊ុលកិត្តិយសកម្ពុជា ​ប្រចាំរដ្ឋកាលីហ្វ័រញ៉ា និងជាប្រធានសភាពាណិជ្ជកម្មកម្ពុជារដ្ឋកាលីហ្វ័រញ៉ា ​នៅថ្ងៃទី ២៦ ​ខែមករា ​ឆ្នាំ ​២០២៦។

​ប្រធានសភាពាណិជ្ជកម្មរដ្ឋកាលីហ្វ័រញ៉ា និងគណៈប្រតិភូទាំងអស់បានស្វែងយល់ពីសក្តានុពលទេសចរណ៍ ព្រម​ទាំងកាលានុវត្តភាពវិនិយោគរបស់កម្ពុជា។

​លោក ហួត ហាក់ ​រដ្ឋមន្រ្តីក្រសួងទេសចរណ៍​ បានជម្រាបជូនពីវិធានការណ៍គន្លឹះបន្ទាន់ និងរយៈ​មធ្យមដែលបានរៀបចំសម្រាប់ឆ្លើយតបនឹងស្ថានការណ៍នាពេលបច្ចុប្បន្ននេះ ហើយ​ក្រសួង​ទេសចរណ៍ ចាត់ទុកសភាពាណិជ្ជកម្មកម្ពុជារដ្ឋកា​លីហ្វ័រញ៉ាជាដៃគូសហការដ៏ល្អ និងមិនអាច​ខ្វះ​បាន ក្នុងការចូលរួមចំណែកអភិវឌ្ឍ និងការវិនិយោគវិស័យទេសចរណ៍កម្ពុជាឱ្យកាន់តែរីកចំរើន និង​កើនឡើងបន្ថែមទៀត។ ​

តាមរយៈជំនួបនេះ គូភាគី ព្រមព្រៀងនឹងជួយជំរុញឱ្យមានការបង្កើតជា «មជ្ឈមណ្ឌលពាណិជ្ជកម្ម» នៅរដ្ឋកាលីហ្វ័រញ៉ា ដើម្បីផ្សព្វផ្សាយពីសក្តានុពលទេសចរណ៍ និងកាលានុវត្តភាពវិនិយោគ​កម្ពុជានៅសហរដ្ឋអាម៉េរិក ព្រមទាំងប្រឹងប្រែងរួមគ្នាឱ្យមានជើងហោះហើរត្រង់រវាងរដ្ឋ Los Angeles ដែលមានសហគមន៍ខ្មែររស់នៅច្រើន។ ​

តាមរយៈគំនិតផ្តួចផ្តើមដ៏ល្អនេះ កម្ពុជានឹងរំពឹងទទួលបានភ្ញៀវទេសចរអាមេរិកច្រើនថែមទៀត ជាមួយនឹងកំណើនវិនិយោគផ្ទាល់ពីសហរដ្ឋអាមេរិក៕​​

​