តម្លៃប្រេងអន្តរជាតិ​​បន្តហក់ឡើងជាង ១% ព្រឹកនេះ ជុំវិញភាពតានតឹងមជ្ឈិមបូព៌ា

តម្លៃប្រេងអន្តរជាតិ​បាន​បន្តហក់ឡើងសម្រាប់ការជួញដូរនៅលើទីផ្សារអាស៊ីនាព្រឹកថ្ងៃពុធនេះ បន្ទាប់ពីសហរដ្ឋអាមេរិក​បាន​អះអាងថាខ្លួនបាន​បាញ់ទម្លាក់ដ្រូនអ៊ីរ៉ង់​ ហើយ​កប៉ាល់ប្រដាប់អាវុធរបស់អ៊ីរ៉ង់បើកសំដៅ​នាវាបំពាក់ទង់ជាតិអាមេរិក​ក្នុងច្រកសមុទ្រ Hormuz ដោយ​បង្កើនភាពតានតឹងរវាងក្រុងវ៉ាស៊ីនតោន-តេហេរ៉ង់ជាថ្មី។ នេះបើតាមការចុះផ្សាយរបស់ទីភ្នាក់ងារសារព័ត៌មា​នរ៉យទ័រ។ ​

តម្លៃប្រេងនាពេលអនាគត ម៉ាក Brent បាន​កើនឡើង ៧៧ សេន ឬ ១,១៤% ដល់ ៦៨,១០ ដុល្លារ/បារ៉ែល គិតត្រឹមម៉ោង ១០ ព្រឹក នៅទីក្រុងហុងកុង ខណៈតម្លៃប្រេងអាមេរិក ម៉ាក West Texas Intermediate (WTI) បាន​កើនឡើង ៧៩ សេន ឬ ១,២៥% ដល់ ៦៤ ដុល្លារ/បារ៉ែល។

តម្លៃប្រេងទាំង២ម៉ាក បាន​កើនឡើងប្រហែល ២% ពេលបិទការជួញដូរនៅថ្ងៃអង្គារ។ នៅសប្ដាហ៍មុន តម្លៃដដែល​បាន​ហក់ឡើងខ្ពស់បំផុតក្នុងរយៈពេលជាច្រើនខែដោយសារតែភាពតានតឹងមជ្ឈិមបូព៌ា ប៉ុន្តែបាន​ធ្លាក់ចុះមកវិញ ដោយសារតែភាពតានតឹងបាន​ធូរស្រាលនៅចុងសប្ដាហ៍មុន និងដើមសប្ដាហ៍នេះ។

ភាពតានតឹងផ្ទុះឡើងជាថ្មីនៅថ្ងៃអង្គារ ក្រោយ​យោធាអាមេរិកបាននិយាយថា ខ្លួនបានបាញ់ទម្លាក់​ដ្រូនរបស់អ៊ីរ៉ង់មួយគ្រឿង ដែលហោះកៀកនាវាផ្ទុកយន្តហោះរបស់អាមេរិកនៅក្នុងសមុទ្រអារ៉ាប់។ ក្នុងពេលជាមួយគ្នានោះ ទូកប្រដាប់អាវុធរបស់អ៊ីរ៉ង់បានបើកចូលទៅជិតនាវាដឹកប្រេងបំពាក់ទង់ជាតិអាមេរិកនៅ​ច្រកសមុទ្រ Hormuz។ ចំពេលដែលភាពតានតឹងកើនឡើង អ៊ីរ៉ង់ឯណោះវិញ​ទាមទារឱ្យមានការផ្លាស់ប្តូរកន្លែងចរចានៅសប្ដាហ៍នេះ​ ពីប្រទេសតួកគី ទៅប្រទេសអូម៉ង់វិញ ​ដែលបង្កើនការចោទសួរថាតើកិច្ចប្រជុំអាចឆ្ពោះទៅមុខដែរឬយ៉ាងណា។

អ្នកជំនាញទីផ្សារបាន​លើកឡើងថា ការវិវត្តចុងក្រោយកំពុងបង្កើនក្ដីបារម្ភពាក់ព័ន្ធនឹង​ការរំខានផ្នែកផ្តត់ផ្គង់ប្រេង ជាពិសេសតាមច្រក Hormuz ដែលរួមចំណែកដល់ការដឹកប្រេង​របស់សកល​ប្រហែល ២០ លាន​បារ៉ែល/ថ្ងៃ ពោលគឺចន្លោះពី ២០-៣០% នៃការប្រើប្រាស់សកល។

តម្លៃប្រេងក៏កើនឡើងផងដែរ ដោយកិច្ចព្រមព្រៀងពាណិជ្ជកម្ម​អាមេរិក និងឥណ្ឌា ដែលបង្កើតសុទិដ្ឋិនិយមផ្នែកសេដ្ឋកិច្ច ហើយអាចជួយបង្កើនតម្រូវការ ខណៈ​ជម្លោះអ៊ុយក្រែន និងរុស្ស៊ី បន្តរារាំងដល់ការនាំចេញប្រេងរបស់រុស្ស៊ីសម្រាប់ទីផ្សារសកល៕