ត្រាំ ប្រកាសថា នឹងបញ្ជូនកងនាវាចម្បាំងដ៏មហិមាបន្ថែមទៀត សំដៅទៅអ៊ីរ៉ង់

នៅចំពោះមុខសភាពការណ៍ដ៏តានតឹង មេដឹកនាំសេតវិមាន ដូណាល់ ត្រាំ ប្រកាសថា សហរដ្ឋអាមេរិកនឹងបញ្ជូនកងនាវាចម្បាំងដ៏មហិមាទីពីរ ទៅកាន់តំបន់មជ្ឈិមបូព៌ា ពោលគឺសំដៅទៅអ៊ីរ៉ង់តែម្តង។

តាមការផ្សាយរបស់ RT កាលពីថ្ងៃទី១០ខែកុម្ភៈឆ្នាំ២០២៦ ប្រធានាធិបតីអាមេរិកបានប្រាប់ទៅសារព័ត៌មាន Axios ថា៖ «យើងមានកងនាវាចម្បាំងមួយកំពុងធ្វើដំណើរទៅទីនោះ ហើយមួយទៀតក៏អាចនឹងទៅដែរ។ យើងនឹងសម្រេចកិច្ចព្រមព្រៀងមួយ បើមិនដូច្នោះ យើងនឹងចាត់វិធានការយ៉ាងតឹងរ៉ឹងបំផុត ដូចកាលពីលើកមុន»។

ទន្ទឹមនោះ លោកបានប្រៀបធៀបកងនាវានេះថា មានទំហំធំជាងកងនាវាដែលលោកធ្លាប់បញ្ជូនទៅកាន់ប្រទេសវេណេស៊ុយអេឡាកាលពីមុនទៅទៀត។ កងនាវានេះដឹកនាំដោយនាវាផ្ទុកយន្តហោះ USS Abraham Lincoln រួមជាមួយនាវាចម្បាំងអមដំណើរជាច្រើនទៀត។

កាលពីខែមុន សហរដ្ឋអាមេរិកបានបញ្ជូនកងនាវាចម្បាំងដ៏ធំមួយរួចទៅហើយ ឆ្ពោះទៅកាន់ប្រទេសអ៊ីរ៉ង់។ នោះគឺនាវាផ្ទុកយន្តហោះ USS Abraham Lincoln និងក្រុមនាវាអមដំណើរ ដែលធ្វើដំណើរឆ្ពោះទៅកាន់តំបន់នោះ ខណៈនាវា USS George H.W. Bush កំពុងប្រតិបត្តិការនៅមហាសមុទ្រអាត្លង់ទិក។

យ៉ាងណា ទីក្រុងតេហេរ៉ង់ បានបោះសម្តីថា ការបង្កើនកម្លាំងយោធាដ៏ធំសម្បើមរបស់អាមេរិកនៅមជ្ឈិមបូព៌ា មិនបានធ្វើ​ឲ្យអ៊ីរ៉ង់ខ្លាចសោះ​ឡើយ។

ថ្លែងក្នុងវេទិកាមួយកាលពីថ្ងៃអាទិត្យ​ រដ្ឋមន្ត្រីការបរទេសអ៊ីរ៉ង់ Abbas Araghchi បាននិយាយអំពីការមកដល់នៃនាវាផ្ទុកយន្តហោះ USS Abraham Lincoln នៅក្នុងសមុទ្រអារ៉ាប់ ដែលជាផ្នែកមួយនៃអ្វីដែលប្រធានាធិបតី ត្រាំ ហៅថា «កងនាវាចម្បាំង (armada)» ដោយលោកចាត់ទុកថាវាជាការប៉ុនប៉ងគំរាមកំហែងដែលគ្មានប្រសិទ្ធភាព។

លោក Araghchi បញ្ជាក់ថា អំណាចរបស់អ៊ីរ៉ង់ស្ថិតនៅលើសមត្ថភាពក្នុងការឈរប្រឈមមុខនឹង «ការសម្លុត» ហើយការគំរាមកំហែងសង្រ្គាមនឹងមិនអាចបង្ខំ​ឲ្យប្រទេសលោកបោះបង់កម្មវិធីចម្រាញ់អ៊ុយរ៉ាញ៉ូម ដែលជាបញ្ហាអធិបតេយ្យភាពជាតិ​នោះ​ទេ៕

អត្ថបទ៖ សុខ សុវណ្ណ