តម្លៃប្រេងអន្តរជាតិហក់ឡើងដល់កម្រិតខ្ពស់បំផុតក្នុងរយៈពេលកន្លះឆ្នាំ

តម្លៃប្រេងអន្តរជាតិ​បាន​បន្តកើនឡើងនៅថ្ងៃសុក្រ (២០ កុម្ភៈ)នេះ បន្ទាប់ពីបិទការជួញដូរក្នុងតម្លៃខ្ពស់បំផុតក្នុងរយៈពេល​កន្លះឆ្នាំកាលពីថ្ងៃព្រហស្បតិ៍ ដែលជំរុញដោយភាពតានតឹងភូមិសាស្រ្តនយោបាយ​រវាងសហរដ្ឋអាមេរិក និងអ៊ីរ៉ង់។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងឆៅនាពេលអនាគត ម៉ាក​ Brent ​បានកើនឡើង ២១ សេន ឬ ០,៣% ដល់ ៧១,៨៧ ដុល្លារ/បារ៉ែល ខណៈ​តម្លៃប្រេងឆៅ​អាមេរិក ម៉ាក West Texas Intermediate (WTI) បានកើនឡើង ២៣ សេន ឬ ០,៤% ដល់ ៦៦,៦៦ ដុល្លារ/បារ៉ែល។

តម្លៃប្រេងទាំង២ម៉ាក បាន​កើនដល់កម្រិតខ្ពស់បំផុតក្នុងរយៈពេល ៦ ខែ ពេលបិទការជួញដូរម្សិលមិញ បន្ទាប់ពីប្រធានាធិបតីអាមេរិក លោក ដូណាល់ ត្រាំ បាន​ព្រមានថា «រឿងអាក្រក់ខ្លាំងមែនទែន» អាចកើតឡើង ប្រសិនបើអ៊ីរ៉ង់មិនសម្រេចបាន​កិច្ចព្រមព្រៀងទាក់ទិននឹង​កម្មវិធីនុយក្លេអ៊ែរ។ លោក ត្រាំ បាន​កំណត់ឱ​សានុវាទចន្លោះពី ១០-១៥ ថ្ងៃខាងមុខ។

កន្លងមក អ៊ីរ៉ង់និយាយថា កម្មវិធីនុយក្លេអ៊ែររបស់ខ្លួនបង្កើតឡើងក្នុងគោលបំណងសន្តិភាពប៉ុណ្ណោះ ប៉ុន្តែសហរដ្ឋអាមេរិក និងសម្ព័ន្ធមិត្ត ជឿថា វាជាកម្មវិធីយោធា។ ​

អ្នកជំនាញលើកឡើងថា ភាពតានតឹងនៅមជ្ឈិមបូព៌ាបង្កើនកង្វល់ពាក់ព័ន្ធនឹង​ការផ្គត់ផ្គង់ប្រេង ជាពិសេសប្រេង​ដឹកជញ្ជូនតាមច្រកសមុទ្រ Hormuz ដែលរួមចំណែកដល់លំហូរផ្គត់ផ្គង់សកលប្រមាណ ២០%៕