វៀតណាមគ្រោងដកពន្ធ​លើប្រេងនាំចូល​ ដើម្បីធានាការចែកចាយអំឡុងវិបត្តិមជ្ឈិមបូព៌ា

ក្រសួងហិរញ្ញវត្ថុវៀតណាម បានស្នើ​កាត់បន្ថយពន្ធនាំចូលលើផលិតផលសាំង និងប្រេងឥន្ធនៈមួយចំនួនមកត្រឹម ០% ដើម្បី​ធានាការផ្គត់ផ្គង់ និងធ្វើឱ្យទីផ្សារក្នុងស្រុកមានស្ថិរភាព ចំពេល​ជម្លោះនៅមជ្ឈិមបូព៌ាធ្វើឱ្យទីផ្សារប្រេងសកលធ្លាក់ចូលទៅក្នុងភាពចលាចល។ នេះបើតាមការចុះផ្សាយរបស់កាសែត Tuoi Tre នាថ្ងៃចន្ទ (៩ មីនា) នេះ។

ក្រសួងបានស្នើឱ្យកាត់បន្ថយពន្ធនាំចូលលើផលិតផលប្រេងឥន្ធនៈ និងវត្ថុធាតុដើមប្រេងឥន្ធនៈជាច្រើនមកត្រឹម ០% ក្រោមសេចក្តីព្រាងក្រឹត្យ ដែលកំពុងស្ថិតក្រោមការពិនិត្យដោយក្រសួងយុត្តិធម៌។ សំណើដដែល​នឹងបន្ថយពន្ធលើប្រេងសាំងគ្មានសារធាតុសំណ និងសមាសធាតុលាយពី ១០​% មកត្រឹម ០% និងលើប្រេងម៉ាស៊ូត ប្រេងឥន្ធនៈ ប្រេងឥន្ធនៈអាកាសចរណ៍ និងប្រេងកាត ពីអត្រាចាស់ ៧% មកត្រឹម ០%។

លើសពីនេះ ពន្ធលើវត្ថុធាតុដើមគីមីឥន្ធនៈជាច្រើន រួមទាំង xylene, condensate និង para-xylene នឹងត្រូវកាត់បន្ថយមកត្រឹម ០% ពីអត្រាចាស់ ៣%។ ​

ក្រសួងហិរញ្ញវត្ថុបាននិយាយថា សេចក្តីព្រាងច្បាប់នេះ​ គឺជាការ​ឆ្លើយតបយ៉ាងឆាប់រហ័សចំពោះការវិវត្ត​ក្នុងទីផ្សារថាមពលពិភពលោក ដែលធ្លាក់ចូលទៅក្នុង​ស្ថានភាពសកលនៅតែមិនប្រាកដប្រជាខ្លាំង ជាពិសេស​បញ្ហា​មជ្ឈិមបូព៌ា ដែល​ធ្វើឱ្យ​តម្លៃថាមពល ជាពិសេសប្រេង និងឧស្ម័ន មា​នការប្រែប្រួលខ្លាំង​។

ក្រសួងបាននិយាយថា ជម្លោះ​មជ្ឈិមបូព៌ា បានជះឥទ្ធិពលយ៉ាង​ធ្ងន់ធ្ងរ​ទៅលើពាណិជ្ជកម្មប្រេងឥន្ធនៈសកល ដោយ​រយៈការហក់ឡើងនៃតម្លៃ និងប៉ះពាល់ជាបណ្ដើរៗហើយលើ​ទីផ្សារប្រេងឥន្ធនៈក្នុងស្រុករបស់វៀតណាម។

​ធំជាងគេ គឺការបិទច្រកសមុទ្រហ័រមូហ្ស ដែល​បានរារាំងប្រេងឆៅប្រហែល ២០ លានបារ៉ែល/ថ្ងៃ ពីមជ្ឈិមបូព៌ា​ទៅ​រោងចក្រចម្រាញ់ប្រេងតាមបណ្ដាប្រទេសផ្សេងៗ ជាពិសេសនៅអាស៊ី។ ជាលទ្ធផល រោងចក្រចម្រាញ់ប្រេងជាច្រើននៅទូទាំងតំបន់ ត្រូវ​បង្ខំ​ចិត្តកាត់បន្ថយផលិតកម្ម ​ប្រើប្រាស់ប្រេងឆៅបម្រុង និង​កម្រិតការនាំចេញផលិតផលប្រេងឥន្ធនៈចម្រាញ់ ដែលជំរុញឱ្យតម្លៃកើនឡើង។

ការលំបាកស្រដៀងគ្នានេះ អាចកើតឡើង​ក្នុងប្រទេសវៀតណាម ដែលរោងចក្រចម្រាញ់ប្រេងក្នុងស្រុកមួយចំនួន អាចប្រឈមមុខនឹងកង្វះខាតប្រេងឆៅនាំចូល ដែលអាចធ្វើឱ្យ​ពួកគេពិបាក​​ដឹកជញ្ជូនឱ្យអតិថិជនតាមកុងត្រា។

បច្ចុប្បន្ននេះ ការនាំចូលប្រេងឥន្ធនៈភាគច្រើនរបស់វៀតណាមបានមកពីប្រទេសអាស៊ាន និងកូរ៉េខាងត្បូង ដែលពន្ធភាគច្រើនត្រូវបានកំណត់នៅ ០% ក្រោមកិច្ចព្រមព្រៀងពាណិជ្ជកម្មសេរី។ យ៉ាងណាមិញ​ ប្រសិនបើការផ្គត់ផ្គង់សកលនៅតែបន្តតានតឹង ការទិញផលិតផលប្រេងឥន្ធនៈ​ពីទីផ្សារទាំង​នោះ អាច​ប្រឈមនឹង​ការលំបាកជាងមុន។

គួរគូសបញ្ជាក់ថា ក្រឹត្យថ្មីរបស់វៀតណាម ត្រូវបានគេរំពឹងថានឹងចូលជាធរមាន​ក្រោយ​ចុះហត្ថលេខា ហើយ​មានសុពលភាពរហូតដល់ថ្ងៃទី ៣០ ខែមេសា៕