អ៊ីរ៉ង់ប្ដេជ្ញាប្រយុទ្ធ រហូតដល់អាមេរិកព្រមទទួលស្គាល់ថា ការ​វាយ​អ៊ីរ៉ង់គឺ «ខុស»​

រដ្ឋមន្ត្រីការបរទេសអ៊ីរ៉ង់ លោក ​Abbas Araghchi បាននិយាយ​​​​នៅ​ថ្ងៃចន្ទទី១៦ ខែមីនា ឆ្នាំ២០២៦ ថា កងកម្លាំងប្រដាប់អាវុធ​របស់​អ៊ីរ៉ង់​ នឹងបន្តប្រយុទ្ធ​​ទប់ទល់នឹងការវាយប្រហាររបស់សហរដ្ឋអាមេរិក​និង​អ៊ីស្រាអែល​ រហូតដល់ប្រធានាធិបតី ដូណាល់ ត្រាំ «ព្រមទទួលស្គាល់កំហុសរបស់ខ្លួន»។ នេះបើតាមការចុះផ្សាយពីទីភ្នាក់ងារ​​​ព៏ត៌មានរុស្ស៊ី​ Tass ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Araghchi បានសរសេរនៅក្នុងសារមួយនៅលើបណ្តាញសង្គម X ថា៖«​កងកម្លាំងប្រដាប់អាវុធដ៏មានឥទ្ធិពលរបស់​យើង នឹងបន្តបាញ់​​ផ្លោង​​រហូតដល់ប្រធានាធិបតីអាមេរិកដឹងថា ការផ្តួចផ្តើមសង្គ្រាមជាមួយអ៊ីរ៉ង់គឺជាកំហុសដែលមិន​គួរធ្វើម្តងទៀតឡើយ»។

លោកក៏បានបញ្ជាក់ទៀតថា នេះគឺជាជម្លោះខុសឆ្គងមួយដែលបង្កគ្រោះថ្នាក់ដល់ទាំងប្រជាជនអាមេរិក និងប្រជាជនអ៊ីរ៉ង់ ហើយបានស្នើសុំយ៉ាងម៉ឺងម៉ាត់ឲ្យអាមេរិកមានវិធានការ​ផ្តល់​សំណងសមស្រប សម្រាប់ជនរងគ្រោះដែលរងផលប៉ះពាល់ដោយជម្លោះ​ដែល​ពួក​គេ​​ផ្តើម​ឡើង​នោះ​។

ដោយឡែក នៅក្នុងបទសម្ភាសន៍ជាមួយទូរទស្សន៍ CBS លោក Araghchi ក៏បានបញ្ជាក់ដោយត្រង់ៗថា ទីក្រុង​តេហេរ៉ង់​មិនឃើញមានហេតុផលណាមួយ ដើម្បីចរចាជាមួយរដ្ឋបាលរបស់លោក​ ដូណាល់ ត្រាំ នោះទេ។ ការអះអាង​​ដែល​ថា​​អ៊ីរ៉ង់​ចរចា​​ឬ​​ក៏​​ចង់ឲ្យ​មាន​បទ​ឈប់បាញ់​គឺជាការស្រមើស្រមៃសុទ្ធសាធ ព្រោះ​អ៊ីរ៉ង់មិនដែលស្វែងរកការពិភាក្សាជាមួយអាមេរិក ក្រោមសម្ពាធយោធាឡើយ។

ទោះជាយ៉ាងណាក៏ដោយ ជំហររបស់អ៊ីរ៉ង់ត្រូវបានវាយតម្លៃដោយអ្នកវិភាគថា ជាការវាយប្រហារសងសឹកដោយផ្ទាល់ទៅលើយុទ្ធនាការការទូតដាក់សម្ពាធ ដែលប្រធានាធិបតីត្រាំកំពុងអនុវត្ត ខណៈពេលដែលអាមេរិកកំពុងព្យាយាមប្រើប្រាស់​អំណាចយោធា និងទណ្ឌកម្មដើម្បីបង្ខំអ៊ីរ៉ង់ឲ្យចុះចាញ់។

មិនត្រឹម​តែប៉ុណ្ណោះ ការភ្ជាប់លក្ខខណ្ឌបទ​​ឈប់បាញ់របស់អ៊ីរ៉ង់ជាមួយនឹងការទទួលខុសត្រូវផ្ទាល់ខ្លួនរបស់លោកត្រាំ បង្ហាញថាប្រទេសនេះបានត្រៀមខ្លួនសម្រាប់ការប្រឈមមុខដាក់គ្នារយៈពេលវែង ជំនួសឲ្យការសម្របសម្រួលសម្ពាធ​ផ្នែក​សេដ្ឋកិច្ច។ ជាក់ស្ដែង អ្នកសង្កេតការណ៍ជឿថា ដរាបណាទីក្រុងវ៉ាស៊ីនតោនមិនមានសញ្ញានៃការកែតម្រូវគោលនយោបាយទេ ចំណុចក្តៅនៅក្នុងតំបន់ឈូងសមុទ្រនឹងនៅតែស្ថិតក្នុងស្ថានភាពប្រុងប្រយ័ត្ន​​​​ដ៏​ក្តៅ​គុក​​​​ក្នុងថ្ងៃអនាគត​​៕

អត្ថបទ៖ សាង ស្រីល័ក្ខ