ណាតូនិង​សម្ព័ន្ធមិត្ត​អឺរ៉ុបរួម​ទាំង​ជប៉ុន-អូស្រ្តាលី​​ មិន​​ធ្វើតាម​សំណើត្រាំ​ជុំវិញសន្តិសុខ​កប៉ាល់​ប្រេង​

សម្ព័ន្ធមិត្តអង្គការ​ណាតូ (NATO) និង​ប្រទេសលោក​ខាងលិចដទៃទៀត បាន​​ច្រាន​ចោល​ការ​ទាមទារ​របស់ប្រធានាធិបតីសហរដ្ឋ​អាមេរិក ដូណាល់ ត្រាំ ដែលមាន​បំណង​ឱ្យ​សមាជិក​សម្ព័ន្ធ​មិត្ត​ជួយ​ផ្នែក​យោធា​បើក​ច្រក​សមុទ្រ ​Hormuz ឡើងវិញ។ នេះ​បើយោង​តាម CNA ផ្សាយ​កាល​ថ្ងៃ​ទី១៦ ខែមីនា ឆ្នាំ​២០២៦ ។

នាយក​រដ្ឋមន្ត្រីចក្រភពអង់គ្លេស លោក Keir Starmer និយាយ​កាលពីថ្ងៃ​ចន្ទ​ថា ចក្រភពអង់គ្លេសនឹង​មិនពាក់​ព័ន្ធ​ជាមួយ​សង្គ្រាម​នៅ​មជ្ឈិមបូព៌ាទេ ទោះ​បីជាខ្លួន​ធ្វើ​ការជាមួយសហរដ្ឋអាមេរិក ដៃគូ​អឺរ៉ុប និងសម្ព័ន្ធមិត្តក្នុង​ឈូង​សមុទ្រលើផែន​ការ​រួមដើម្បីបើកច្រកសមុទ្រ Hormuz ឡើងវិញក៏​ដោយ​។

ខណៈរដ្ឋមន្ត្រីការបរទេសអាល្លឺម៉ង់ លោក Johann Wadephul មាន​ប្រសាសន៍​នៅទីក្រុងព្រុចសែលកាលពីថ្ងៃចន្ទថា ប្រទេស​អាល្លឺម៉ង់​មិន​ឃើញ​មាន​តួនាទីសម្រាប់សម្ព័ន្ធមិត្តណាតូ ក្នុង​ការដោះស្រាយ​ការ​បិទ​ច្រក​សមុទ្រ Hormuz ទេ។​

លោក Wadephul ថា៖ «ខ្ញុំមិនឃើញថាណាតូបាន​ធ្វើការសម្រេចចិត្តណា​មួយ​ក្នុងទិសដៅនេះ ឬ​អាចទទួលខុសត្រូវចំពោះ​ច្រក​សមុទ្រ Hormuz ​នោះ​ទេ​។ ប្រសិន​បើដូច្នោះមែន នោះស្ថាប័នណាតូនឹងចូល​ដោះ​ស្រាយ» ។

មិន​ខុស​គ្នា​ប៉ុ​ន្មាន​ អធិការបតីអាល្លឺម៉ង់ លោក Friedrich Merz លើក​ឡើង​​ថា​៖ «ច្បាស់​ណាស់ថាសង្គ្រាមនេះ​មិនមែន​ជាបញ្ហារបស់​ណាតូទេ»។

ចំណែក​ប្រទេសប៉ូឡូញ អេស្ប៉ាញ ក្រិក និងស៊ុយអែត ស្ថិត​ក្នុង​ចំណោមប្រទេសអឺរ៉ុបដទៃទៀត ដកខ្លួនចេញ​ពីការចូលរួម​ផ្នែក​យោធា​ក្នុង​ច្រកសមុទ្រ Hormuz  បន្ទាប់ពី​ការហៅ​ទូរស័ព្ទរបស់លោក ដូណាល់ ត្រាំ សុំ​ជំនួយ​។

ប្រទេសជប៉ុន និងអូស្ត្រាលី សម្តែងអារម្មណ៍ស្រដៀងគ្នាកាល​ពីព្រឹក​ថ្ងៃចន្ទ ដោយ​ទីក្រុងកង់​បេ​រ៉ានិយាយថា ខ្លួន​នឹង​មិន​បញ្ជូននាវាចម្បាំង​ទៅ​កាន់ច្រកសមុទ្រ Hormuz ទេ៕

ប្រែសម្រួល៖ ណឺ មិនា