ព័ត៌មានជាតិ

កម្ពុជាគ្រោងរៀបចំការប្រឡងទទួលស្គាល់ជំនាញរបស់អតីតពលករមកពីប្រទេសថៃ

បានផុស

៣ ខែ មុន

នៅ

ថ្ងៃព្រហស្បតិ៍ ១៩ មីនា ២០២៦

ដោយ

អ្នកនាំពាក្យក្រសួងការងារលោក ស៊ុន មេសា បានឱ្យដឹងថាក្រសួងគ្រោងនឹងរៀបចំធ្វើការប្រឡងតេស្តសមត្ថភាពលើជំនាញ និងចេញវិញ្ញាបនបត្រដល់អតីតពលករខ្មែរមកពីប្រទេសថៃនៅខែមេសាខាងមុខ។ លោកថាការធ្វើបែបនេះគឺដើម្បីផ្ដល់នូវការទទួលស្គាល់ជំនាញពិតប្រាកដមួយជូនដល់អតីតពលករខ្មែរទាំងនោះងាយស្រួលក្នុងការស្វែងរកការងារ និងឱកាសការងារកាន់តែល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាប់កម្ពុជាថ្មីតាមសារអេឡិចត្រូនិកតេឡេក្រាម លោក ស៊ុន មេសា បានបញ្ជាក់ថា ការផ្ដល់សញ្ញាប័ត្រទទួលស្គាល់ជំនាញនេះជាការផ្ដល់តម្លៃ និងបង្កើនការទុកចិត្តពីភាគីពាក់ព័ន្ធ និងវិស័យឯកជនក្នុងការជ្រើសរើសយកអតីតពលករទាំងនោះទៅធ្វើការនៅតាមស្ថាប័នរបស់ពួកគេ។

លោកថា៖ «យើងស្រមៃមើលថាពលរដ្ឋម្នាក់ពេលដែលយើងមានជំនាញហើយមានទាំងសញ្ញាបត្រថែមទៀតផង។ អ៊ីចឹងវាគ្រប់ធាតុដែលវិស័យឯកជនគាត់ហ្នឹងទទួលយក។ ក្រសួងការងារចង់បញ្ជាក់ដែរថាការធ្វើរបស់យើងនេះគឺមានស្ដង់ដាជាក់លាក់ច្បាស់លាស់ ការប្រឡងរបស់យើងជាក់លាក់ច្បាស់លាស់ដែលមានគ្រូក្នុងការត្រួតពិនិត្យដែលមានភាពជាក់លាក់ច្បាស់លាស់ផងដែរ»។

ជាជំហានដំបូងនៃការទទួលស្គាល់លើជំនាញនេះក្រសួងសម្រេចទទួលស្គាល់លើជំនាញលើវិស័យសំណង់ដែលមាន៨មុខគឺការងារកំបោរ ការងារការ៉ូ ការងារដំឡើងពុម្ព ការងារតបណ្ដាញបំពង់ទឹក ដំឡើងបណ្ដាញអគ្គិសនីក្នុងអាគារ ការងាររន្ទា ការដំឡើងសរសៃដែក និងការផ្សារអគ្គិសនី។

លោកបានបញ្ជាក់ថាការធ្វើតេស្តសមត្ថភាព និងការផ្ដល់សញ្ញាប័ត្រទទួលស្គាល់ជំនាញនេះនឹងមិនតម្រូវឱ្យបង់ប្រាក់នោះទេ។

លោកអំពាវនាវឱ្យអតីតពលករមកពីថៃដែលមានជំនាញដូចរៀបរាប់ខាងលើត្រៀមខ្លួនដើម្បីប្រឡងយកវិញ្ញាបនបត្រទទួលស្គាល់ជំនាញរបស់ពួកគេដែលមានដើម្បីមានការងារធ្វើកាន់តែល្អ។

ក្នុងជម្លោះព្រំដែនរវាងកម្ពុជា និងថៃកាលពីឆ្នាំ២០២៥ មានអតីតពលករខ្មែរមកពីប្រទេសថៃត្រលប់ចូលប្រទេសវិញប្រមាណជាង៩០ម៉ឺននាក់ ខណៈដែលក្រសួងការងារបានផ្គូរផ្គងរកការងារជូនដល់អតីតពលករទាំងនោះបានមួយភាគធំ ខណៈនៅសល់ការងាររាប់ម៉ឺនកន្លែងទៀតដែលក្រសួងកំពុងបន្តស្វែងរកមនុស្សដើម្បីចូលធ្វើការផងដែរ៕

អត្ថបទដោយ ហ៊ុន សិរីវឌ្ឍន៍