ប្រទះឃើញបុរសម្នាក់ ដេកស្លាប់លើស្ពានថ្មផ្លូវក្រវ៉ាត់ក្រុងទី ៣ ក្នុងស្ថានភាពមានរបួសផ្ទៃមុខ ខណៈសាច់ញាតិអះអាងថា បាត់ម៉ូតូ ១ គ្រឿង

ប្រជាពលរដ្ឋ​បានប្រទះឃើញ​បុរសម្នាក់ ដេកស្លាប់នៅលើដងផ្លូវ​ ដោយមានស្នាមរបួសលើផ្ទៃមុខ​ ខណៈសាច់ញាតិអះអាងថា បាត់ម៉ូតូ ១ គ្រឿង ដែលហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង ៦ និង ១០ នាទីព្រឹក ​ថ្ងៃ​ទី​ ២៣​ ខែមីនា​ ឆ្នាំ​ ២០២៦​ ស្ថិតនៅចំណុចស្ពានថ្ម ផ្លូវក្រវ៉ាត់ក្រុងទី ៣​ ភូមិគងណយ​ សង្កាត់​គងណយ​ ខណ្ឌដង្កោ​ រាជធានី​ភ្នំពេញ​។

តាមប្រភពពីសាច់ញាតិសពបុរសរងគ្រោះ បានឲ្យដឹងថា មុនពេលស្លាប់ ជនរងគ្រោះ បានជិះម៉ូតូ ១ គ្រឿង ម៉ាកសេ ១២៥​ ស៊េរីឆ្នាំ ២០២៥ ពីកន្លែងធ្វើការ ឆ្ពោះទៅផ្ទះ​ តាមបណ្តោយផ្លូវក្រវ៉ាត់ក្រុងទី ៣​ ប៉ុន្តែមិនដឹងថាជួបបញ្ហាអ្វីបានជាស្លាប់នៅលើស្ពាន ហើយបាត់ម៉ូតូពីកន្លែងកើតហេតុ​ទៀតផង។

ក្រោយទទួលបានព័ត៌មានភ្លាមៗ កម្លាំងសមត្ថកិច្ចជំនាញពាក់ព័ន្ធ បានចុះមកពិនិត្យជាក់ស្តែង ដើម្បីធ្វើការស្រាវជ្រាវជុំវិញទីតាំងកើតហេតុឲ្យបានដឹងច្បាស់ថា ករណីខាងលើនេះជាករណីអ្វីឲ្យពិតប្រាកដ​។ ចំណែកសព ត្រូវបានសមត្ថកិច្ចធ្វើលិខិតប្រគល់ជូនសាច់ញាតិយកទៅធ្វើបុណ្យតាមប្រពៃណី៕
អត្ថបទ ៖ សុខា