អាមេរិកបង្កើនវត្តមាន​កម្លាំងទ័ព​ឡើង​ដល់​ជាង​ ៣៥០០នាក់​ហើយ​នៅមជ្ឈិមបូព៌ា

សហរដ្ឋអាមេរិកបានសម្រេចបង្កើនវត្តមានយោធាយ៉ាងខ្លាំងក្លានៅតំបន់មជ្ឈិមបូព៌ា ដោយដាក់ពង្រាយកងទ័ពជាង ៣៥០០នាក់ហើយ ចំពេលដែលសង្គ្រាម​ពាក់ព័ន្ធនឹងប្រទេសអ៊ីរ៉ង់កំពុងតែ​ឆេះរាលដាល​ខ្លាំង​មែនទែន។

តាម​ការ​ផ្សាយ​របស់ CBS News ចុះ​ផ្សាយ​ថ្ងៃទី​២៩​ខែ​មីនា​ឆ្នាំ​២០២៦ ដោយ​យោងតាមបញ្ជាការដ្ឋានកណ្តាលអាមេរិក នាវាដឹកជញ្ជូនកងទ័ពជើងទឹក USS Tripoli ដែលផ្ទុកកងម៉ារីនប្រមាណ ២៥០០នាក់ បានធ្វើដំណើរទៅដល់តំបន់ប្រតិបត្តិការហើយ រួមជាមួយការបញ្ជូននាវា USS Boxer និងអង្គភាពជើងទឹកផ្សេងទៀតពីទីក្រុង San Diego បន្ថែមទៀត។ ចាប់តាំងពីប្រតិបត្តិការ «Epic Fury» បានចាប់ផ្តើមនៅថ្ងៃទី២៨ខែកុម្ភៈ គោលដៅជាង ១១០០០កន្លែងត្រូវបានវាយប្រហារ។

ភាពតានតឹងបានកើនឡើងបន្ទាប់ពីអ៊ីរ៉ង់បានបាញ់មីស៊ីល និងដ្រូនទៅលើមូលដ្ឋានទ័ពអាកាស Prince Sultan ក្នុងប្រទេសអារ៉ាប៊ីសាអូឌីត ដែលបណ្តាល​ឲ្យ​បុគ្គលិកអាមេរិក ១០នាក់រងរបួស។ ទន្ទឹមនឹងនេះ ក្រុមហ៊ូធី​ក្នុងប្រទេសយេម៉ែនដែលគាំទ្រដោយអ៊ីរ៉ង់ ក៏បានប្រកាសទទួលខុសត្រូវលើការបាញ់មីស៊ីលសំដៅទៅលើប្រទេសអ៊ីស្រាអែលផងដែរ។ រដ្ឋមន្ត្រីការបរទេសអាមេរិក លោក Marco Rubio បានបញ្ជាក់ថា វ៉ាស៊ីនតោនមានគោលបំណងសម្រេច​ឲ្យ​បាននូវគោលដៅរបស់ខ្លួនដោយមិនប្រើប្រាស់កងទ័ពជើងគោក ប៉ុន្តែលោកបានសង្កត់ធ្ងន់ថា ប្រធានាធិបតី ដូណាល់ ត្រាំ «ត្រូវតែត្រៀមខ្លួនជានិច្ចសម្រាប់សេណារីយ៉ូដែលកំពុងវិវត្ត»។

ទោះបីជាមានកិច្ចខិតខំប្រឹងប្រែងផ្នែកការទូតតាមរយៈបេសកជន លោក Steve Witkoff ដែលបានស្នើក្របខ័ណ្ឌបទឈប់បាញ់ដើម្បីទប់ស្កាត់កម្មវិធីនុយក្លេអ៊ែររបស់អ៊ីរ៉ង់ក៏ដោយ ក៏ទីក្រុងតេហេរ៉ង់បានបដិសេធសំណើនេះ។ អ៊ីរ៉ង់បានទាមទារ​ឲ្យ​មានការសងការខូចខាត និងការទទួលស្គាល់អធិបតេយ្យភាពរបស់ខ្លួនជាថ្នូរមកវិញ។ បច្ចុប្បន្ន ការបិទច្រកសមុទ្រ Hormuz និងការគំរាមកំហែងនៅច្រកសមុទ្រ Bab el-Mandeb កំពុងរំខានដល់ការដឹកជញ្ជូនប្រេងសកល និងធ្វើ​ឲ្យ​តម្លៃថាមពលហក់ឡើងខ្ពស់៕

ប្រែសម្រួល៖ ឈាង