មេដឹកនាំរបប​សឹក​មីយ៉ាន់ម៉ា លាលែង​ពីតំណែង ដើម្បី​​ត្រៀមឡើងធ្វើ​ជាប្រធានាធិបតី

មេបញ្ជាការយោធាជាន់ខ្ពស់មីយ៉ាន់ម៉ា លោក Min Aung Hlaing បាន​​លាលែង​ពីតំណែង​ហើយ និង​ត្រូវបានគេតែងតាំងជាបេក្ខភាពប្រធានាធិបតីជាផ្លូវការ នៅក្នុងកិច្ចប្រជុំសភាដែលបានធ្វើឡើងនៅថ្ងៃចន្ទ​ទី​៣០​ខែ​មីនា​ឆ្នាំ​២០២៦។ នេះ​បើយោងតាម​ការចុះផ្សាយរបស់ Reuters និង BBC។

ការឡើងកាន់តំណែងនេះត្រូវបានគេមើលឃើញថាជា «រឿងដែល​ត្រៀមទុកជាមុន» ព្រោះបេក្ខជនពីររូបផ្សេងទៀតដែលឈរឈ្មោះជាមួយលោក សុទ្ធតែជាមនុស្សជំនិតរបស់លោក ហើយមិនមែនជាគូប្រជែងពិតប្រាកដឡើយ។ លោក Min Aung Hlaing ធ្លាប់រងទណ្ឌកម្មពីបស្ចិមប្រទេស ចំពោះការដឹកនាំរដ្ឋប្រហារកាលពី៥​ឆ្នាំមុន ប៉ុន្តែពេលនេះ លោកកំពុងត្រៀមខ្លួនដឹកនាំរដ្ឋាភិបាលថ្មី ដែលក្រុមអ្នករិះគន់ចាត់ទុកថាគ្រាន់តែជា «យោធាក្នុងឈុតស៊ីវិល» ប៉ុណ្ណោះ។

ការឈានជើងឡើងមកកាន់តំណែងកំពូលនេះ កើតឡើងបន្ទាប់ពីការបោះឆ្នោតកាលពីចុងឆ្នាំមុន ដែលត្រូវបានគេរិះគន់យ៉ាងចាស់ដៃថាជា «ការបោះឆ្នោតបង្គ្រប់កិច្ច» ដោយសារតែគណបក្សប្រឆាំងធំៗត្រូវបានហាមឃាត់មិន​ឲ្យ​ចូលរួម ហើយតំបន់ដែលមានជម្លោះជាច្រើនក៏មិនអាចបោះឆ្នោតបានដែរ។ បច្ចុប្បន្ន ៩០% នៃសមាជិកសភាសុទ្ធតែជាអ្នកស្មោះស្ម័គ្រនឹងយោធា។ ទោះជាយ៉ាងណា យោងតាមរដ្ឋធម្មនុញ្ញ លោក Min Aung Hlaing ត្រូវតែលះបង់តំណែងជាមេបញ្ជាការកងទ័ពដើម្បីក្លាយជាប្រធានាធិបតី។ ដើម្បីកុំ​ឲ្យ​បាត់បង់អំណាចបញ្ជាទ័ព លោកបានតែងតាំងឧត្តមសេនីយ៍ Ye Win Oo ដែលជាមនុស្សទុកចិត្តបំផុត​ឲ្យ​មកជំនួសតំណែងលោក និងបានបង្កើតក្រុមប្រឹក្សាប្រឹក្សាថ្មីមួយដើម្បីបន្តក្ដោបក្ដាប់អំណាចទាំងផ្នែកយោធា និងស៊ីវិលក្នុងដៃដដែល។

ការផ្លាស់ប្តូរនយោបាយនេះ កើតឡើងចំពេលដែលសង្គ្រាមស៊ីវិលក្នុងប្រទេសមីយ៉ាន់ម៉ាកំពុងឆាបឆេះយ៉ាងខ្លាំង ដែលបានសម្លាប់មនុស្សរាប់ពាន់នាក់ និងធ្វើ​ឲ្យ​មនុស្សរាប់លាននាក់បាត់បង់ផ្ទះសម្បែង។ ដែនដីជាច្រើននៃប្រទេសនេះ នៅតែស្ថិតនៅក្រោមការគ្រប់គ្រងរបស់ក្រុមប្រឆាំងប្រដាប់អាវុធនៅឡើយ ហើយគេក៏មិនទាន់ឃើញមានសញ្ញាណាមួយដែលថា រដ្ឋាភិបាលថ្មីនេះនឹងបញ្ឈប់ការបង្ក្រាបដោយហិង្សាលើអ្នកដែលមានមតិផ្ទុយនោះដែរ។ ការចង់បានតំណែងប្រធានាធិបតីនេះ ត្រូវបានគេជឿថាជាមូលហេតុចម្បងដែលនាំ​​ឲ្យ​លោក Min Aung Hlaing សម្រេចចិត្តធ្វើរដ្ឋប្រហារកាលពីឆ្នាំ២០២១ បន្ទាប់ពីគណបក្សរបស់លោកបានចាញ់ឆ្នោតយ៉ាងអាម៉ាសកាលពីឆ្នាំ២០២០៕

ប្រែសម្រួល៖ ឈាង