តម្លៃប្រេង Brent កើនដល់ជិត ១២០ ដុល្លារ/បារ៉ែល ជាថ្មី ​ក្រោយបំបែកកំណត់ត្រាខ្ពស់បំផុតនៅខែមីនា​

តម្លៃប្រេងអន្តរជាតិ​តែបន្តអស្ថិរភាពខ្លាំងសម្រាប់ការជួញដូរនៅដើមខែមេសានេះ​ បន្ទាប់ពី​តម្លៃប្រេង Brent បានកើនឡើងជិតដល់ ១២០ ដុល្លារ/បារ៉ែលកាលពីថ្ងៃអង្គារ និងបំបែកកំណត់ត្រា​ប្រចាំខែ​ខ្ពស់បំផុត ដែលជំរុញដោយ​កំណើន​ភាពតានតឹងនៃជម្លោះមជ្ឈិមបូព៌ា។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងម៉ាក Brent សម្រាប់កុងត្រាខែឧសភា ដែលត្រូវផុតកំណត់កាលពីថ្ងៃអង្គារ បាន​កើនឡើងដល់ ១១៨,៣៥ ដុល្លារ/បារ៉ែល។ តម្លៃប្រេងម៉ាកនេះ បាន​កើនខ្ពស់រហូតដល់ទៅ ៦៤% កាលពីខែមីនា។

វិនិយោគិន​ឥឡូវនេះ ងាកទៅកាន់កុងត្រាខែមិថុនា ដែលឆ្លុះបញ្ជាំងពីស្ថានភាពទីផ្សារជាក់ស្ដែង។ តម្លៃប្រេង Brent សម្រាប់កុងត្រាខែមិថុនា បាន​កើនឡើងបន្តិចដល់ប្រហែល ១០៤ ដុល្លារ/បារ៉ែល សម្រាប់ការជួញដូរលើទីផ្សារអាស៊ីនាព្រឹកថ្ងៃពុធ (១ មេសា) នេះ។ ​

អ្នកវិភាគ​នៅតែយល់ឃើញថា ទីផ្សារប្រេងបច្ចុប្បន្ននៅតែបន្តប្រែប្រួលខ្លាំង ដោយ​កើនឡើង ឬចុះអាស្រ័យទៅលើការវិវត្តប្រចាំថ្ងៃនៃជម្លោះមជ្ឈិមបូព៌ា។

​ទោះបីជា​មាន​របាយការណ៍ថា ប្រធានាធិបតីអ៊ីរ៉ង់ ​លោក Masoud Pezeshkian អាចនឹងបើកចំហចំពោះការបញ្ចប់ជម្លោះ និង​ការលើកឡើងរបស់លោកប្រធានាធិបតី ដូណាល់ ត្រាំ ​ថាសង្គ្រាមអាចបញ្ចប់ក្នុងរយៈពេលប៉ុន្មានសប្តាហ៍​ខាងមុខក៏ដោយ​ ក៏​វិនិយោគិន​នៅតែមានការប្រុងប្រយ័ត្ន។

អ្នកវិភាគកត់សម្គាល់ថា កង្វះវឌ្ឍនភាពការទូតជាក់ស្តែង ការបន្តការវាយប្រហារតាមសមុទ្រ​ រួមទាំងការបិទច្រកសមុទ្រហ័រមូហ្ស និងការគំរាមកំហែងដល់ហេដ្ឋារចនាសម្ព័ន្ធថាមពល នៅតែបន្តបង្កហានិភ័យផ្គត់ផ្គង់យ៉ាងសំខាន់​ដល់ទីផ្សារប្រេងសកល។ ​

ទន្ទឹមនឹងនេះ ​ផលិតកម្មប្រេងរបស់ OPEC (អង្គការនៃប្រទេសនាំចេញប្រេងកាត) បានធ្លាក់ចុះយ៉ាងខ្លាំងនៅក្នុងខែមីនា ដែលបង្ហាញពីទំហំនៃការរំខានដែលបណ្តាលមកពីជម្លោះ។ ការរួមបញ្ចូលគ្នានៃការផ្គត់ផ្គង់ដែលថយចុះ និងអស្ថិរភាពភូមិសាស្ត្រនយោបាយ បាននាំឱ្យអ្នកវិភាគបង្កើនការព្យាករ​តម្លៃប្រេងសម្រាប់ឆ្នាំ ​២០២៦ នេះ​៕

​