អ៊ីរ៉ង់ បញ្ឈឺលោកត្រាំ ថា ទាំងអាមេរិកនិងអ៊ីស្រាអែល គ្មានដឹងច្បាស់ពីសមត្ថភាពយោធាអ៊ីរ៉ង់ទេ  

ក្រោយប្រមុខសេតវិមាន ដូណាល់ ត្រាំ បញ្ចប់សុន្ទរកថាអំពីស្ថានការណ៍វិវឌ្ឍនៃសង្គ្រាមអ៊ីរ៉ង់មិនបានប៉ុន្មានម៉ោងផង ស្រាប់តែទីក្រុងតេហេរ៉ង់ បានបោះពាក្យសម្តីបញ្ឈឺទៅកាន់អាមេរិក ដោយនិយាយបែបមើលស្រាលថា ទាំងអាមេរិកនិងអ៊ីស្រាអែលសុទ្ធតែមិនទទួលបានព័ត៌មានគ្រប់ជ្រុងជ្រោយអំពីសមត្ថភាពយោធានិងគ្រឿងសព្វាវុធរបស់ទីក្រុងតេហេរ៉ង់ ហើយការផលិតអាវុធយោធារបស់អុីរ៉ង់ ត្រូវបានធ្វើឡើងនៅក្នុងទីកន្លែងគ្មាននរណាស្គាល់។

សម្តីនេះគឺចេញពីមាត់អ្នកនាំពាក្យយោធាអ៊ីរ៉ង់ Ebrahim Zolfaghari និងត្រូវបានយកមកផ្សាយដោយសារព័ត៌មានរដ្ឋ Tasnim នៅថ្ងៃព្រហស្បតិ៍ទី២ខែមេសាឆ្នាំ២០២៦។

ក្នុងសេចក្តីថ្លែងការណ៍នោះ លោក Zolfaghari បានច្រានចោលការអះអាងរបស់លោក ត្រាំ ដែលថាឃ្លាំងអាវុធរបស់អុីរ៉ង់ត្រូវបានកម្ទេចស្ទើរតែទាំងស្រុង។ លោកនិយាយថា អាមេរិកនិងអ៊ីស្រាអែល គ្មានព័ត៌មានច្បាស់អំពីសមត្ថភាពយោធារបស់អ៊ីរ៉ង់ទេ។ យ៉ាងណា ប្រទេសទាំងពីរនេះ ត្រូវតែទទួលខុសត្រូវចំពោះការឈ្លានពានដែលពួកគេបានចាប់ផ្តើម។

ទន្ទឹមនោះ អ្នកនាំពាក្យរូបនេះព្រមានថា នាពេលខាងមុខ អាមេរិកនិងអ៊ីស្រាអែល នឹងរងការវាយប្រហារដែលមានកម្លាំងខ្លាំងមហិមា ខ្ទេចខ្ទី និងមានការបំផ្លិចបំផ្លាញបំផុត។

ការព្រមាននេះកើតឡើង បន្ទាប់ពីលោកត្រាំគំរាម​ទម្លាក់​គ្រាប់បែក​សន្ធឹកសន្ធាប់​លើ​អ៊ីរ៉ង់ ហើយវាយទាល់តែ​​ក្លាយ​ជា «សម័យយុគថ្ម» វិញ។

ក្នុងការថ្លែងការណ៍ពិសេសនៅសេតវិមាន ប្រមុខរដ្ឋាភិបាលទីក្រុងវ៉ាស៊ីនតោន បានប្រកាសក្ដែងៗ​ថា សហរដ្ឋអាមេរិកជិតសម្រេចបាននូវការបញ្ចប់សង្គ្រាមនៅអ៊ីរ៉ង់ហើយ ដោយ​​នឹង​មាន​យុទ្ធនាការទម្លាក់គ្រាប់បែកយ៉ាងសន្ធាប់ក្នុងរយៈពេល​២​ទៅ៣សប្តាហ៍ចុងក្រោយ ដើម្បីផ្ដាច់ព្រ័ត្រ​សង្គ្រាម​នេះ​តែម្ដង។

លោកត្រាំ បានគំរាមវាយ​ប្រហារ​ទាល់តែ​​អ៊ីរ៉ង់​ត្រឡប់​ទៅ​កាន់ «សម័យ​យុគ​ថ្ម» វិញ ហើយ​ថា នឹងកម្ទេចរោងចក្រអគ្គិសនីទាំងអស់ រួមទាំងអាចឈានទៅដល់ការបាញ់កម្ទេចអណ្តូងប្រេងនៅទូទាំងប្រទេសអ៊ីរ៉ង់ផងដែរ ប្រសិន​បើមិនមានកិច្ចព្រមព្រៀងសន្តិភាព​ណាមួយត្រូវបានធ្វើឡើងនោះទេ៕

អត្ថបទ៖ សុខ សុវណ្ណ