ព័ត៌មានអន្ដរជាតិ

តម្លៃប្រេងសាំងនៅសិង្ហបុរីហក់ឡើងខ្លាំង បង្កើនបន្ទុកគ្រួសារ និងអាជីវកម្ម

បានផុស

២ ខែ មុន

នៅ

ថ្ងៃសៅរ៍ ៤ មេសា ២០២៦

ដោយ

តម្លៃប្រេងឥន្ធនៈនៅក្នុងប្រទេសសិង្ហបុរីបានកើនឡើងដល់កម្រិតខ្ពស់បំផុតជាថ្មី បន្ទាប់ពីក្រុមហ៊ុនលក់រាយ Caltex, Shell និង SPC បានដំឡើងថ្លៃប្រេងឥន្ធនៈ ដោយសារតែការរំខានផ្នែកផ្គត់ផ្គង់បណ្ដាលមកពីជម្លោះនៅមជ្ឈិមបូព៌ា។ នេះបើតាមការចុះផ្សាយរបស់ VnExpress។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃព្រហស្បតិ៍ Caltex ដំឡើងថ្លៃប្រេង RON95 ដល់ ៣,៤៧ ដុល្លារសិង្ហបុរី (២,៧៩ ដុល្លារអាមេរិក)/លីត្រ ខណៈ SPC បានដំឡើងតម្លៃប្រេងដូចគ្នាដល់ ៣,៤៦ ដុល្លារសិង្ហបុរី/លីត្រ។ នេះបើយោងតាមវេទិកាទិន្នន័យប្រេងឥន្ធនៈ Motorist.sg។

តម្លៃប្រេងម៉ាស៊ូតវិញ បានកើនឡើងម្តងទៀតនៅថ្ងៃសុក្រ។ Caltex បានដំឡើងតម្លៃម៉ាស៊ូត ដល់ ៤,៤៣ ដុល្លារសិង្ហបុរី/លីត្រ ខណៈ Sinopec បានដំឡើងតម្លៃដល់ ៤,២៣ ដុល្លារសិង្ហបុរី/លីត្រ។

គេមើលឃើញថា តម្លៃប្រេងបានកើនឡើងជាបន្តបន្ទាប់នៅក្នុងប្រទេសសិង្ហបុរី ដែលជាមជ្ឈមណ្ឌលផ្គត់ផ្គង់ប្រេងចម្រាញ់ដ៏សំខាន់ក្នុងតំបន់ ក្រោយជម្លោះនៅមជ្ឈិមបូព៌ាផ្ទុះឡើងនៅថ្ងៃទី ២៨ ខែកុម្ភៈ។ មែនទែនទៅ កំណើនតម្លៃប្រេងនៅប្រទេសនេះ គឺស្របទៅនឹងនិន្នាការសកល។ គិតត្រឹមថ្ងៃព្រហស្បតិ៍ តម្លៃប្រេងអន្តរជាតិគឺជួញដូរនៅប្រហែល ១១០ ដុល្លារ/បារ៉ែល។

ក្នុងសារវីដេអូមួយដែលចេញផ្សាយកាលពីថ្ងៃព្រហស្បតិ៍ នាយករដ្ឋមន្ត្រីសិង្ហបុរី លោក Lawrence Wong បានទទួលស្គាល់ពីបន្ទុកសម្រាប់គ្រួសារ និងអាជីវកម្មនានា ដោយសារតែកំណើនថ្លៃថាមពល និងភាពមិនប្រាកដប្រជាជាបន្តបន្ទាប់។

លោកបានបន្តថា រដ្ឋាភិបាលនឹង «កាត់បន្ថយផលប៉ះពាល់ភ្លាមៗ» ដោយបង្កើនវិធានការដែលមានស្រាប់ និងពន្លឿនគំនិតផ្តួចផ្តើមមួយចំនួនដើម្បីផ្តល់ជំនួយសង្គ្រោះមុន៕