​​​មីស៊ីលនិង​ដ្រូន​អ៊ីរ៉ង់​​ជាង១០០០គ្រាប់ វាយ​ប្រហារ​លើ​គុយវ៉ែត ចាប់​តាំង​ពី​ផ្ទុះ​សង្គ្រាម​ថ្ងៃទី​២៨​កុម្ភៈ

ក្រសួងការពារជាតិគុយវ៉ែតបានរាយការណ៍ថា មីស៊ីល និងដ្រូនរបស់អ៊ីរ៉ង់ជាង ១០០០គ្រាប់/គ្រឿង បានកំណត់គោលដៅវាយប្រហារលើទឹកដីរបស់ខ្លួន ចាប់តាំងពីសង្គ្រាមអាមេរិក-អ៊ីស្រាអែលប្រឆាំងនឹងអ៊ីរ៉ង់បានចាប់ផ្តើមនៅថ្ងៃទី២៨ខែកុម្ភៈ​ឆ្នាំ​២០២៦។

យោងតាម Yeni Safak ចុះផ្សាយ​ថ្ងៃទី​៦​ខែ​មេសា ចំនួនសរុបនេះរួមមាន មីស៊ីលបាលិស្ទិក​៣៣៦​គ្រាប់ មីស៊ីល​គ្រូស​១៣​គ្រាប់ និងដ្រូន​៧៤០​គ្រឿង ដោយឡែកក្នុងរយៈពេល​២៤​ម៉ោងចុងក្រោយនេះ ប្រព័ន្ធការពារអាកាស​គុយវ៉ែត​បានស្ទាក់ចាប់ដោយជោគជ័យនូវមីស៊ីលបាលិស្ទិក​៩​គ្រាប់ មីស៊ីលគ្រូស​៤​គ្រាប់ និងដ្រូន៣១គ្រឿងបន្ថែមទៀត។

ក្រសួងការ​ពារ​ជាតិ​គុយវ៉ែតបានបង្ហាញថា ការវាយប្រហារនាពេលថ្មីៗនេះបានផ្តោតគោលដៅជាពិសេសលើហេដ្ឋារចនាសម្ព័ន្ធសំខាន់ៗ រួមមានអង្គភាពផលិតអគ្គិសនី រោងចក្រចម្រោះទឹកស្អាត មូលដ្ឋានប្រេង និងទីតាំងប្រតិបត្តិការរបស់សាជីវកម្មប្រេងគុយវ៉ែត។ ទោះបីជាមិនមានព័ត៌មានលម្អិតអំពីជនរងគ្រោះ ប៉ុន្តែការវាយប្រហារនេះហាក់មានបំណងបង្អាក់ប្រព័ន្ធថាមពល និងទឹករបស់ប្រទេសនេះ ដែលជាផ្នែក​មួយ​នៃយុទ្ធនាការសងសឹកកាន់តែធំ បន្ទាប់ពីមនុស្សជាង ១៣៤០នាក់ត្រូវបានសម្លាប់នៅក្នុងប្រទេសអ៊ីរ៉ង់ រួមទាំងអតីតមេដឹកនាំកំពូល Ali Khamenei ផងដែរ។

ការកើនឡើងនៃភាពតានតឹងនេះបានបង្ក​ឲ្យ​មានការព្រួយបារម្ភជាអន្តរជាតិ ជាពិសេសពីប្រទេសតួកគី ខណៈដែលទីក្រុងតេហេរ៉ង់នៅតែបន្តវាយប្រហារគោលដៅក្នុងតំបន់ និងរឹតបន្តឹងការដឹកជញ្ជូនតាមច្រកសមុទ្រ Hormuz។ តួកគីបានព្រមានថា ការកំណត់គោលដៅលើហេដ្ឋារចនាសម្ព័ន្ធស៊ីវិលនៅក្នុងបណ្តាប្រទេសឈូងសមុទ្រ អាចបង្ក​ឲ្យ​មានវិបត្តិមនុស្សធម៌ និងសេដ្ឋកិច្ច ហើយបានអំពាវនាវ​ឲ្យ​មានការវិលត្រឡប់ទៅរកផ្លូវការទូតជាបន្ទាន់ ដើម្បីទប់ស្កាត់អស្ថិរភាពក្នុងតំបន់បន្ថែមទៀត៕

ប្រែសម្រួល៖ ឈាង